سۋرەتتى تۇسىرگەن ەرلان الياسقاروۆ
ارباعا تانىلعانىن ار سانامايتىن اسىلبەكتىڭ بۇگىنگى تاڭدا جۇزەگە اسىرىپ جاتقان باستاماسى كەيبىر قالادا جوق دەسەك تە بولادى. ال الماتى وبلىسىنا قاراستى قاراساي اۋدانىندا العاشقىلاردىڭ ءبىرى بولىپ, 2017 جىلى اشقان «كۇش-قۋات» وڭالتۋ ورتالىعىنىڭ جۇمىسى جاندانعاننان بەرى وزىمەن تاعدىرلاس تالاي ادامداردىڭ ومىرگە دەگەن قۇشتارلىق سەزىمىن وياتىپ, جان جاراسىنىڭ جازىلۋىنا سەبەپشى بولىپ كەلەدى.
ورتالىقتى باسقارىپ وتىرعان اسىلبەكتىڭ بۇل باعىتتا جۇمىس ىستەۋىنە ءوزىنىڭ باسىنان كەشكەنى مەن جەكە جاتتىعۋلارىنىڭ ناتيجەسىندە جاعدايىنىڭ كوڭىل قۋانتارلىقتاي قالىپقا جەتكەنى باستى نەگىزگە اينالدى. وسىلايشا, باسقا دا مۇمكىندىگى شەكتەۋلى جاندارعا ءۇمىت ساۋلەسىن سىيلايىن دەگەن نيەتپەن ول اتالعان ورتالىقتى اشۋعا بەل بۋعان. اسىلبەكتىڭ جوسپارلى جۇمىسىن جۇزەگە اسىرۋىنا الماتى وبلىسى «اتامەكەن» كاسىپكەرلىك پالاتاسىنىڭ قاراساي اۋداندىق فيليالى قولعابىس ەتكەنىن دە ايتا كەتكەن ءجون. وسى ورتالىقتان الدىمەن بيزنەستىڭ قىر-سىرىن ۇيرەنەتىندەي ءبىلىمىن جەتىلدىرىپ, ارنايى كۋرستى وقىپ شىقتى. كەيىن وعان اۋداندىق اكىمدىك قاسكەلەڭدەگى «التىن اۋىل» ىقشام اۋدانىنان جەرتولەنى ءتيىمدى باعامەن جالعا الۋىنا قولداۋ ءبىلدىردى.
اشىلعانىنا ءۇش جىل بولسا دا «كۇش-قۋات» وڭالتۋ ورتالىعىنان وسى ۋاقىتقا دەيىن جاعدايى جاقسارىپ, اسىلبەك جالدىباەۆقا العىسىن جەتكىزگەندەر دە جەتەرلىك. كەلۋشىلەردىڭ بارلىعى مۇنداعى ءتۇرلى قۇرال-جابدىقتارعا تولى كەڭ بولمەلەردە جاتتىعۋلارىن جاساپ, بىلىكتى مامانداردىڭ اقىل-كەڭەسىنە جۇگىنە الادى. ءبىر ايتا كەتەرلىگى, وسى جەرگە نۇر-سۇلتان, شىمكەنت سياقتى الىس شالعاي ايماقتاردان دا ادامدار ەم-دومىن قابىلداۋعا كەلىپ تۇرادى. ولار ءۇشىن جاتار ورىن دا قاراستىرىلعان. ال جوعارىدا ءبىز ايتقان جاتتىعۋعا ارنالعان قۇرال-جابدىقتاردىڭ بارلىعى ورتالىق باسشىسىنىڭ جەكە قولداۋىمەن ارنايى جاسالعان. ويتكەنى ونىڭ وسى باعىتتا جۇمىس ىستەيتىن ارنايى شاعىن ءوندىرىس ورنى بار ەكەنىن دە ەرەكشە ايتۋعا بولادى. سول ارقىلى كاسىپكە جانى جاقىن اسىلبەك ءتۇرلى وڭالتۋ ورتالىقتارىنان ارنايى تاپسىرىسپەن جاتتىعۋ قۇرالدارىن دا ءوندىرىپ شىعارۋدا.
تاعدىرلاس جانداردىڭ ومىرگە دەگەن قۇشتارلىعىن ارتتىرسام دەپ جۇرگەن اسىلبەكتىڭ ارقاسىنان قاعىپ, يگى ءىسىن قۇپتايتىن جاندار دا بار. اڭگىمە بارىسىندا ا.جالدىباەۆ اسىرەسە, قاسكەلەڭ قالاسىنىڭ اكىمى اسقار مۇقاشەۆتىڭ جومارتتىعىنا ەرەكشە توقتالدى.
– ارباداعى ادامدار ءۇشىن ءبىزدىڭ ورتالىققا باسپالداقپەن كىرىپ-شىعۋ, راسىمەن دە قيىنعا ءتۇستى. بىردە وسىنى بايقاعان قالا باسشىسى اسقار وكەن ۇلى ءوز قاراجاتى ەسەبىنەن ازاماتتىعىن تانىتىپ, جوعارى-تومەن اۆتوماتتى تۇردە جىلجيتىن پاندۋستى سىيعا تارتتى. وسى قولداۋى ءۇشىن ريزاشىلىعىمدى بىلدىرەمىن, – دەيدى «كۇش-قۋات» وڭالتۋ ورتالىعىنىڭ ديرەكتورى.
اسىلبەك جالدىباەۆ بىلىكتى زاڭگەر بولۋدى ارمانداپ, جوعارى وقۋ ورنىن دا تامامداعان. الايدا ايتىپ كەلمەيتىن اۆتوكولىك اپاتى ونىڭ بولاشاعىن ب ۇلىڭعىر ەتتى... كەيىپكەرىمىز سوندا دا كەلەشەگىنە ك ۇلىمدەپ قاراۋدى ماقسات ەتىپ, ءون بويىنا دارىعان سپورتتىق قابىلەتىن مۇمكىندىگى شەكتەۋلى بولسا دا دامىتا تۇسەدى. سونىڭ ناتيجەسىندە وسى ۋاقىتقا دەيىن ءتۇرلى پاراليمپيادالىق ويىنداردا قول كۇرەسى, ءجۇزۋ سياقتى سپورت تۇرلەرىنەن جەڭىسپەن ورالىپ ءجۇر. ءتىپتى, اۋداننىڭ ابىرويىن وبلىستىق جارىستاردا دا قورعاپ, 1-2 ورىنداردى قانجىعاعا بايلاۋدى ادەتكە اينالدىرعان. وسىنداي جەمىستى جەتىستىكتەرىن ماقتانا ەسكە العان جىگەرلى اسىلبەك بىلاي دەيدى: «ادام قانداي جاعدايعا تۇسسە دە ءوزىن ەشقاشان تومەن ساناماۋى كەرەك. قايعى-مۇڭعا بەرىلمەي, ونىمەن كۇرەسە ءبىلۋ – ناعىز ەرلىكتىڭ ءىسى. بىزگە ءومىر ءبىر-اق رەت بەرىلەدى. ونى تاماشا ءسۇرۋ ءوز قولىمىزدا. ۋاقىتى ءوتىپ كەتكەندەر قانشاما. سوندىقتان عيبراتتى عۇمىر كەشە بىلگەن دۇرىس».
ءبىز تانىعان اسىلبەك, مىنە, وسىنداي. ونىڭ ەندىگى ماقساتى – ءوزى باسشىلىق ەتىپ وتىرعان وڭالتۋ ورتالىعىنىڭ كوكجيەگىن كەڭەيتىپ, مۇگەدەكتىگى بار جانداردى جان-جاقتى قولداپ, قولدان كەلگەنشە ولاردى اياقتارىنان تىك تۇرعىزۋ. ول وسى يدەياسىن جۇزەگە اسىرۋ ءۇشىن مەملەكەت تاراپىنان قولداۋ كۇتەتىنىن ايتتى. «ارمانسىز ادام – قاناتسىز قۇسپەن تەڭ» دەگەندەي, اسىلبەكتىڭ مەجەلى ماقساتى ورىندالۋىنا ءبىز دە تىلەكشىمىز.
ديدار مالىك ۇلى,
جۋرناليست
الماتى وبلىسى,
قاراساي اۋدانى,
قاسكەلەڭ قالاسى
