بۇل كاسىپورىن پەتروپاۆلدا عانا ەمەس اۋىلشارۋاشىلىعى شيكىزاتىن وڭدەيتىن رەسپۋبليكاداعى اسا ءىرى كاسىپورىنداردىڭ ءبىرى. كومپانيانىڭ پەتروپاۆلدا ەكى زاۋىتى بار. 2004 جىلى اشىلعان زاۋىتتا قازىر سارى ماي, پاستەرلەنگەن ءسۇت, ايران, قاتىق جانە ت.ب. ونىمدەر شىعارادى. زاۋىت جىلىنا 88 مىڭ توننا ءسۇت وڭدەيدى. 2018–2020 جىلداردا تاۋلىكتىك قۋاتىن 60 توننادان 450 تونناعا دەيىن جەتكىزۋدى كوزدەگەن جاڭارتۋ شارالارى جۇرگىزىلدى. كەشە قۇمار ىرگەباي ۇلى وسى زاۋىتتا بولدى.
بيىل وبلىس 600 مىڭ توننا ءسۇت ءوندىرۋدى جوسپارلاپ وتىر. وعان قول جەتكىزۋگە قاجەتتى رەسۋرستار بار. قازىر وبلىستا ءسۇت وڭدەۋ زاۋىتتارى شيكىزاتپەن 91% قامتاماسىز ەتىلگەن. ءسۇت وبلىستاعى 80 ءسۇت كەشەنىنەن الىنادى. كەشەندەردىڭ 18-ءى وسى زامانعا ساي جابدىقتالعان. سوڭعى ەكى جىلدا وسىنداي 7 كەشەن سالىنسا, بيىل تاعى 12 فەرمانىڭ قۇرىلىسى جالعاسۋدا. ءسويتىپ, ءسۇت ءوندىرىسى تاعى 30 مىڭ تونناعا دەيىن وسپەك. ءسويتىپ, ءسۇت زاۋىتتارىن شيكىزاتپەن 94 % قامتاماسىز ەتۋگە قول جەتكىزۋ كوزدەلگەن.
كاسىپورىن جەلتوقسان ايىندا جاڭا جەلىنى ىسكە قوسادى. ونىڭ تاۋلىكتىك قۋاتتىلىعى 32 مىڭ توننا. قۇيىلعان ينۆەستيتسيا كولەمى 4,8 ملرد.تەڭگە. جاڭا جەلى قوسىمشا 85 جۇمىس ورنىن اشادى. ءسويتىپ, زاۋىتتىڭ جىلدىق قۋاتتىلىعى 88 مىڭنان 120 مىڭ تونناعا دەيىن ارتپاق.
قازىر «ماسلودەل» زاۋىتى ءسۇت پەن مايلى داقىلداردان 70 ءتۇرلى ءونىم ءتۇرىن شىعارادى. ال قوسىمشا جەلىنىڭ ارقاسىندا ول ءونىم ءتۇرىن تاعى دا سەگىزگە ارتتىراتىن بولادى. وبلىس اكىمى ق.اقساقالوۆ: «قازىر ءبىز وبلىستا ءسۇتتىڭ 46% قايتا وڭدەيمىز. جاڭا جەلىنىڭ ارقاسىندا بۇل كورسەتكىش 50% جەتەدى. بۇگىنگى تاڭدا وبلىس سارى ىرىمشىكپەن ءوزىن 31 % قامتاماسىز ەتەدى. قازىر جىلىنا 600 توننا وندىرەمىز. جىلدىق سۇرانىس – 1700 توننا. بۇل دەفيتسيتتى ءبىز «مولوچنىي سويۋز» زاۋىتىنىڭ جاڭا جەلىسى ىسكە قوسىلعان كەزدە جابامىز. جاڭا جەلى جىلىنا 2500 مىڭ توننا ىرىمشىك تۇرلەرىن شىعارۋعا مۇمكىندىك بەرمەك. ءوڭىر نارىعى ىرىمشىكپەن 100% قامتاماسىز ەتىلەدى. وسىنىڭ ارقاسىندا 2021 جىلدىڭ قورىتىندىسى بويىنشا ءسۇتتى قايتا وڭدەۋ كولەمى 50-دەن 55% دەيىن وسەدى», دەدى.
