سەناتورلار اۋىلداعى ناقتى جاعداي مەن وزەكتى ماسەلەلەرگە, سونداي-اق اۋىلدىق اۋماقتاردى قولداۋ مەن دامىتۋعا ارنالعان مەملەكەتتىك باعدارلامالاردىڭ ورىندالۋ ساپاسىنا نازار اۋداردى. سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ ساپارى 2020 جىلعى 23 قازاندا وتەتىن پارلامەنتتىك تىڭداۋعا دايىندىق اياسىندا جۇزەگە استى.
سەناتورلارعا كەلگەن اقپارات بويىنشا اۋىل تۇرعىندارى قالالارعا قونىس اۋدارۋدا. دەپۋتاتتار سونداي-اق اۋىل مەكتەپتەرى مەن دارىگەرلىك مەكەمەلەردىڭ جاي-كۇيىنە نازار اۋداردى. رەسپۋبليكا بويىنشا ولاردىڭ كەيبىرى كۇردەلى جوندەۋدى نەمەسە جاڭا عيماراتتار سالۋدى قاجەت ەتەدى. اۋىل تۇرعىندارى سەناتورلارمەن جۇزدەسۋلەردە اۋىلداعى جۇمىسپەن قامتۋ تاقىرىبىن قوزعادى. سونىمەن قاتار, شارۋا قوجالىقتارىنىڭ باسشىلارى بىلىكتى جاس مامانداردىڭ جەتىسپەيتىنىن تىلگە تيەك ەتتى.
«اۋىلعا جوعارى ءبىلىمدى جاس مامانداردى تارتۋدا كوپتەگەن پروبلەما بار. بىزدە "ديپلوممەن – اۋىلعا" باعدارلاماسى وتە جاقسى, بىراق, وكىنىشكە وراي, بۇل باعدارلامانىڭ ورىندالۋ ساپاسى تومەن», - دەدى سەناتور اقىلبەك كۇرىشباەۆ.
پارلامەنتشىلەر اگرارلىق جوعارى وقۋ ورىندارىن بىتىرگەن جاس مامانداردىڭ 100%-نىڭ تەك 30%-ى عانا اۋىلعا ورالاتىنىن اتاپ ءوتتى. ەلىمىزدىڭ كوپتەگەن اۋىلدارىندا وسىعان ۇقساس جاعداي قالىپتاسىپ وتىر. بىراق "اۋىل - ەل بەسىگى" باعدارلاماسىنىڭ ارقاسىندا اۋىلدىق ەلدى مەكەندەر جاندانا باستادى - الەۋمەتتىك نىساندار قالپىنا كەلتىرىلۋدە جانە جاڭا جۇمىس ورىندارى اشىلۋدا, سوندىقتان اۋىل تۇرعىندارى وسى باعدارلامانى ودان ءارى جۇزەگە اسىرۋعا ۇمىتتەنىپ وتىر.
