"اۋىل شارۋاشىلىعى مينيسترلىگى اعىمداعى جىلدىڭ 7 قازانىندا وبلىس اكىمدىكتەرىنە قۇس تۇماۋىنان ولگەن قۇستاردىڭ ورتاشا نارىقتىق قۇنىن وتەۋ ءۇشىن قۇجاتتار پاكەتىن قالىپتاستىرۋ كەزىندە جەكە قوسالقى شارۋاشىلىق يەلەرىنە كومەك كورسەتۋ قاجەتتىلىگى تۋرالى حات جولدادى. 11 قازاندا 2 585 قۇس بويىنشا قۇجاتتار دايىندالدى, وتەماقىنىڭ جالپى سوماسى 8 878 364 تەڭگەنى قۇرايدى", دەدى اشم ۆەتەريناريالىق باقىلاۋ جانە قاداعالاۋ كوميتەتى وكىلى.
بۇعان دەيىن ت.قابدولدانوۆ وكق بريفينگىندە جقش-دا قۇستاردىڭ تاۋلىكتىك ءولىمى 22 باسقا دەيىن قىسقارعانىن حابارلادى. جاڭا جاعدايلار تەك سولتۇستىك قازاقستان وبلىسىنىڭ جەكە اۋلالارىندا تىركەلدى. رەسپۋبليكانىڭ باسقا وڭىرلەرىندە 11 قازاندا ءولىم تىركەلگەن جوق. سوڭعى 10 كۇندەگى ديناميكانى ەسكەرە وتىرىپ, ۆەتەريناريالىق باقىلاۋ جانە قاداعالاۋ كوميتەتىنىڭ ماماندارى قازاقستاندا قۇس تۇماۋىنان قۇستاردىڭ ءولىمى تولىق توقتاعانىن اتاپ ءوتتى.
"قىركۇيەك ايىنىڭ ورتاسىنان باستاپ جەكە قوسالقى شارۋاشىلىقتاردا جوعارى پاتوگەندى قۇس تۇماۋىن جۇقتىرۋدىڭ سالدارىنان 25 مىڭعا جۋىق قۇس ءولىمى تىركەلدى. سونىمەن قاتار, ينفەكتسيا وشاقتارىنان 20 177 باس قۇس تاركىلەندى. وسىلايشا, قازىرگى ۋاقىتتا بارلىعى جەكە قوسالقى شارۋاشىلىقتاعى 45 110 باس قۇسقا, ونىڭ ىشىندە 27 393 باس تاۋىق, 777 كۇركەتاۋىق, 10 141 قاز, 6 799 باس ۇيرەك ءۇشىن وتەماقى بەرىلەدى", دەپ ناقتىلادى سپيكەر.
سونىمەن قاتار ول قۇس فابريكالارىندا ءولىم-ءجىتىمنىڭ تولىعىمەن توقتاعانىن حابارلادى. ەكى كاسىپورىن – "بەسكول قۇس فابريكاسى" جشس جانە "اگروينتەرپتيتسا" قۇس فابريكالارىنا 361 647 قۇس ءۇشىن وتەماقى تولەنەدى.
سونىمەن قاتار, ارقالىق قۇس فابريكاسىندا ولگەن قۇستىڭ تەك 1/3 بولىگى, شامامەن 256 مىڭ تاۋىق قۇس تۇماۋىنان ەمەس, وندىرىستەگى جەلدەتۋدىڭ ۋاقىتشا بولماۋىنان تۇنشىعىپ ولگەن. ت.قابدۋلدانوۆ قازاقستاندا 64 قۇس فابريكاسى جۇمىس ىستەيتىنىن جانە ولاردىڭ تەك ەكەۋىندە عانا قۇس تۇماۋى سالدارىنان ءولىم بولعانىن اتاپ ءوتتى.
"قۇس فابريكالارىندا تەكسەرۋ جۇرگىزۋ كەزىندە ولاردىڭ يەلەرى ۆەتەريناريالىق-سانيتاريالىق تالاپتاردى ساقتاماعانى انىقتالدى. اتاپ ايتقاندا, قۇس فابريكالارىنىڭ اۋماعىندا جەم-شوپكە ەركىن قول جەتكىزە الاتىن جابايى جانە قونىس اۋداراتىن قۇستار تابىلدى", دەدى ت.قابدولدانوۆ.
