ادام ومىرىمەن ويناۋعا بولمايدى. ونىڭ ۇستىنە كىسى ءولتىرىلۋى قىلمىستىق كودەكس بويىنشا ەڭ اۋىر قىلمىس بولىپ سانالادى. قاساقانا كىسى ولتىرۋشىلەردىڭ جازاسى دا ەڭ اۋىرى.
قۇرامىندا تەرگەۋشى, كريميناليست, ت.ب. بار جەدەل توپ توتەنشە وقيعانىڭ سەبەبىن انىقتاۋ, كىسى ءولتىرۋشى قىلمىسكەردى ۇستاۋ, تەرگەۋ ماقساتىمەن شۇعىل جولعا شىققان. الايدا ولار ورتا جولعا بارعاندا دابىل قاققان ايەلدىڭ ءوزى حابارلاسىپ, شاقىرتۋدان باس تارتاتىنىن ايتقان. «ايەل ءوزى قوڭىراۋ شالىپ, اقپاراتتى جوققا شىعارعان. اتالعان مەكەنجاي بويىنشا ۋچاسكەلىك پوليتسيا ينسپەكتورى جىبەرىلدى», دەدى پەتروپاۆل قالاسى پب ەكىنشى پوليتسيا ءبولىمىنىڭ باستىعى رۋسلان سىزدىقوۆ.
پوليتسيا كاپيتانى جانات مۇحامەدجانوۆ پاتەردە ماساڭ كۇيدەگى ايەل مەن ەكى ەر ادامنىڭ بولعانىن انىقتاعان. ايەل وتىرىستا ادام ءولىمى تۋرالى ازىلدەپ, كوڭىل كوتەرمەكشى بولعان. ايەلدىڭ مۇنداي ارەكەتكە بۇعان دەيىن دە بارعانى بەلگىلى بولدى. ناۋرىز ايىندا دا ول وسىلاي «ازىلدەمەك» بولىپ, اكىمشىلىك قۇقىقبۇزۋشىلىق كودەكستىڭ «ارناۋلى قىزمەتتەردi كورiنەۋ جالعان شاقىرۋ» بابى بويىنشا جاۋاپقا تارتىلىپ, 80 مىڭ تەڭگەدەن استام ايىپپۇل تولەگەن ەكەن. جاسامىس ايەلدىڭ وسىنداي ارەكەتكە بارۋىنىڭ ءوزى – ءتۇرلى كۇدىكتەر تۋدىرادى. الدە وعان مۇنداي بۇزۋشىلىق ءۇشىن تولەگەن ايىپپۇل از كورىندى مە ەكەن؟ شىنىندا, مۇنداي قۇقىقبۇزۋشىلىقتاردى ۇساق دەمەي, ءتيىمدى جازا قولدانۋ كەرەك قوي. پوليتسيامەن ازىلدەپ, وتىرىك ايتىپ, ويناماق بولعاندار دەموكراتيالىق ەلدەردە دە قاتاڭ جازاعا تارتىلادى. ماسەلەن, وسىنداي وتىرىك دابىل ءۇشىن گەرمانيادا ادام ەكى جىلعا دەيىن باس بوستاندىعىنان ايىرىلۋى مۇمكىن. ال امەريكا مۇندايدى «سۆاتينگ» دەپ اتايدى, وندايدى جاساعاندار 10 مىڭ دوللار كولەمىندە ايىپپۇل تولەيدى. ال ىزگىلەندىرۋدى ءپىر تۇتقان ءبىزدىڭ ەلدەگى ايىپپۇل دوللارعا شاققاندا بار بولعانى 200 دوللار بولىپ وتىر. وسى ماسەلەنى زاڭدارعا تولىقتىرۋلار مەن وزگەرىستەر ەنگىزگەندە ەسكەرۋ كەرەك سياقتى.
پەتروپاۆل
