شۆەنتەك – جاڭا جۇلدىز
«رولان گارروس» جارىسى باستالعاندا جانكۇيەرلەر ايەلدەر اراسىنداعى «بيىل جەڭىمپازى كىم بولۋى مۇمكىن؟» دەگەن سۇراق تۋىنداعاندا, كوپشىلىك وزدەرىنىڭ سۇيىكتى تەننيسشىلەرىنىڭ ەسىمىن ايتىپ, ولاردىڭ جەڭىسىنە كۇمانسىز سەندى. بىراق جانكۇيەرلەر اتاعان فاۆوريت تەننيسشىلەردىڭ ىشىندە شۆەنتەكتىڭ ەسىمى جوق ەدى. فرانتسيا اشىق چەمپيوناتىنىڭ فينالىندا بيىلعى Australian Open دوداسىندا توپ جارعان اقش وكىلى سوفيا كەنين مەن WTA ساناتىنداعى بىردە-ءبىر جارىستا جەڭبەگەن, ءتىپتى الەمدىك رەيتينگتە توپ-50 تەننيسشىنىڭ قاتارىنا كىرمەگەن پولياك قىزى يگا شۆەنتەك باق سىنادى. ەكى سەتكە سوزىلعان ويىندا شۆەنتەك سەنساتسيا جاساپ, اپالى-ءسىڭلىلى ۋيليامستاردىڭ ءىزباسارى دەپ سانالعان سوفيا كەنيندى (الەمنىڭ 4-راكەتكاسى) 6:4, 6:1 ەسەبىمەن ەش قيىندىقسىز جەڭىپ كەتتى.
«رولان گارروس» جارىسىنا دەيىن WTA رەيتينگىندە 52-ورىندا تۇرعان شۆەنتەك فينالعا دەيىن كىل مىقتىلارمەن باق سىنادى جانە بارلىعىن 2:0 ناتيجەسىمەن ءبىر دەممەن جەڭىپ شىقتى. اتاپ ايتار بولساق, ءبىرىنشى اينالىمدا الەمنىڭ 20-راكەتكاسى چەحيالىق ۆوندروۋشوۆانى, ەكىنشى كەزەڭدە تايپەيلىك سە شۋۆەيدى (66), ءۇشىنشى باسەكەسىندە بەلگيالىق ەجەني بۋشاردى (140) قاپى قالدىرسا, پلەي-وفف كەزەڭىندە الەمنىڭ ەكىنشى, وسى جارىستىڭ ءبىرىنشى راكەتكاسى رۋمىنيالىق سيمونا حالەپتى جارىس جولىنان ىعىستىرىپ, باس جۇلدەدەن ءۇمىتىن ەرتە ءۇزدى. سونداي-اق شيرەك فينالدا يتاليالىق مارتينا ترەۆيزاننان (83), جارتىلاي فينالدا ارگەنتينالىق ناديا پودوروشكادان (48) ايلاسىن اسىردى.
وسىدان ەكى جىل بۇرىن جاسوسپىرىمدەر اراسىنداعى «رولان گارروس» تۋرنيرىندە باس جۇلدەنى ولجالاعان يگا شۆەنتەك ەكى جىلدان سوڭ ەرەسەكتەر اراسىندا دا توپ جاردى. بۇل ناتيجە ونىڭ WTA رەيتينگىندە 17-ورىنعا كوتەرىلۋىنە مۇمكىندىك بەردى.
قۇمداۋىت كورتتىڭ كورولى
ەرلەر اراسىندا باستى كۋبوكقا تالاس «رولان گارروستىڭ» 12 دۇركىن چەمپيونى رافاەل نادال مەن «ۇلكەن دۋلىعا» ساناتىنداعى جارىستاردىڭ بىرنەشە دۇركىن جەڭىمپازى نوۆاك دجوكوۆيچ اراسىندا ءوربىدى. فينال الدىندا جانكۇيەرلەر تارتىستى ويىن كۇتكەن بولاتىن. ويتكەنى ەكى تەننيسشىنىڭ بۇعان دەيىنگى كەزدەسۋلەرى وتە تارتىستى ءارى قىزىقتى وتەتىن. بىراق بۇل جولعىسى ولاي بولماي شىقتى. ءۇش سەتكە سوزىلعان ماتچتا قۇمداۋىت كورتتىڭ كورولى نادال ەش قيىندىقسىز جەڭىسكە جەتتى. دەسە دە ەكى سەتتى وڭاي بەرە سالعان سەربيالىق ساڭلاق ءۇشىنشى سەتتە نادالعا ءبىراز قارسىلىق كورسەتكەنىمەن, يسپانيالىق تەننيسشى ءبارىبىر تارازى باسىن وزىنە اۋداردى. قورىتىندى ەسەپ – 6:0, 6:2, 7:5. ەكى تەننيسشى اراسىنداعى 56 كەزدەسۋدە نادالدىڭ مەرەيى ۇستەم بولدى. 29 باسەكەدە دجوكوۆيچ جەڭىسكە جەتسە, 27 كەزدەسۋدە نادالدىڭ باعى جانعان.
سونداي-اق بۇل – نادالدىڭ «ۇلكەن دۋلىعا» ساناتىنداعى 20-شى جەڭىسى. وسى جەتىستىگىنىڭ ارقاسىندا ول ايگىلى تەننيسشى رودجەر فەدەرەردىڭ ناتيجەسىن قايتالادى. ءتىپتى شۆەيتساريالىق تەننيسشىنىڭ ءوزى نادالدى «رولان گارروستاعى» جەڭىسىمەن قۇتتىقتادى.
