ال ورتالىقتاندىرىلعان جىلۋمەن قامتاماسىز ەتەتىن مەكەمەلەردە جالپى 38 قازاندىق بولسا, بۇگىندە ونىڭ 32-ءسى قىسقى ماۋسىمعا تولىق دايىن. ال قالعان 6 قازاندىقتىڭ كۇردەلى جوندەۋ جۇمىستارى 15 قازاندا اياقتالادى. وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى ءابىلحان ابدىقادىروۆتىڭ ايتۋىنشا, وڭىردەگى 1 475 كوپقاباتتى تۇرعىن ءۇي جىلۋ بەرۋ ماۋسىمىنا دايىن. ياعني وبلىستاعى بيۋدجەتتىك مەكەمەلەر مەن كوپقاباتتى تۇرعىن ۇيلەر قىسقى جىلۋ بەرۋ ماۋسىمىنا ساقاداي ساي. سونىمەن قاتار تۇرعىندارعا قاجەتتى قاتتى وتىننان دا تاپشىلىق جوق. قازىر وبلىس اۋماعىنداعى تەمىر جول تۇيىقتارىندا شۇباركول كومىرىنىڭ 1 تونناسى ورتا ەسەپپەن 14 مىڭ تەڭگەدەن بوساتىلۋدا. باسقارما وكىلى بەرگەن مالىمەتكە سۇيەنسەك, ءوڭىردىڭ جالپى قاتتى وتىنعا دەگەن سۇرانىسى 1 ملن توننادان اسىپ جىعىلادى. بۇگىنگە دەيىن سول سۇرانىستىڭ 60 پايىزى تاسىمالدانعان. ونىڭ 167 مىڭ تونناسى بيۋدجەتتىك مەكەمەلەرگە جەتكىزىلگەن. تۇرعىنداردىڭ كومىرگە قاجەتتىلىگى 732,2 مىڭ توننا بولسا, تاسىمالدانعانى – 415 مىڭ توننا. ياعني 56,6 پايىزدى قۇراپ وتىر. تەمىر جول قويمالارىندا 1 توننا كومىر 11 500 دەن 16 500 تەڭگە ارالىعىندا ساتىلۋدا. ال مازۋت وتىنى بويىنشا قاجەتتىلىك كولەمى – 9,6 مىڭ توننا. بۇگىندە 15 قازاننان باستاپ تاسىمالداۋ جونىندە مەكەمەلەرمەن ءتيىستى كەلىسىمشارت جاسالعان.
«جالپى, وبلىس بويىنشا 1 475 كوپقاباتتى تۇرعىن ءۇي بار, ونىڭ 586-سى ورتالىقتاندىرىلعان جىلۋمەن قامتاماسىز ەتىلەدى. بارلىق ۇيلەر 100 پايىز قىسقى ماۋسىمعا دايىن. وبلىستىڭ جىلۋ بەرۋ دايىندىعىنا اپتا سايىن جانە تۇرعىنداردى كومىر وتىنىمەن قامتاماسىز ەتۋ بويىنشا كۇن سايىن تۇراقتى مونيتورينگ جۇرگىزىلۋدە», دەيدى ءابىلحان اسكەر ۇلى.
قىسقى ماۋسىمدا قاۋىپسىزدىك شارالارىن ساقتاۋ دا ماڭىزدى. بۇل ورايدا شاردارا اۋدانى ءورت ءسوندىرۋ بەكەتىنىڭ ماماندارى مەن بەلسەندى جاستار اۋدان تۇرعىندارىمەن كەزدەسىپ, ءتۇسىندىرۋ جۇمىستارىن جۇرگىزۋدە. باستى ماقسات – قاتتى جانە سۇيىق وتىنداردى پايدالانۋ كەزىندە ۋلانۋ فاكتورلارىن بولدىرماۋ. اۋدان حالقىنىڭ 90 پايىزى قىستا قاتتى وتىندى پايدالانادى. سول سەبەپتى قاتتى وتىننان ۋلانۋ جاعدايى تۋىنداۋى مۇمكىن. شاردارا اۋدانى توتەنشە جاعدايلار ءبولىمىنىڭ باسشىسى قانات سارتپاەۆتىڭ ايتۋىنشا, بىلتىرعى جىلىتۋ ماۋسىمى كەزەڭىندە اۋداندا كومىرقىشقىل گازىنان ۋلانۋ فاكتىسى تىركەلمەگەن. وسى تۇراقتىلىقتى ساقتاپ قالۋ ءۇشىن سالا ماماندارى كۇندەلىكتى تۇسىندىرمە جۇمىستارىن جۇرگىزىپ كەلەدى.
ال كەنتاۋ قالاسىنداعى قازاندىقتا قىسقا دايىندىق جۇمىستارىنىڭ 60 پايىزى ورىندالعان. قالعان جۇمىستار 20 قازانعا دەيىن تولىعىمەن اياقتالادى. وسى شارۋالاردى اتقارۋ ءۇشىن وبلىستىق بيۋدجەتتەن ءتيىستى قارجى بولىنگەن. قالانىڭ قىسقى ماۋسىمعا دايىندىق ماسەلەلەرى وبلىس اكىمى ومىرزاق شوكەەۆتىڭ تىكەلەي باقىلاۋىندا. تۇرعىنداردى جىلۋمەن قامتيتىن «كەنتاۋ سەرۆيس» مەكەمەسىنە 14 534 ابونەنت قوسىلعان. بۇگىنگى تاڭدا مەكەمەدە 62 توننا سۇيىق وتىن ازىرلەنگەن بولسا, 27 مىڭ تونناعا جۋىق قاتتى وتىن كەنتاۋعا كەلىسىمشارت نەگىزىندە ەكىباستۇزدان جەتكىزىلەدى.
تۇركىستان وبلىسى
