جارىستىڭ ۇيىمداستىرىلعانىنا كوپ ۋاقىت وتە قويماسا دا, جىل وتكەن سايىن قاتىسۋشىلاردىڭ سانى دا, قىزىقتى ءارى تارتىستى دودانى ءوز ەلدەرىندە وتكىزگىسى كەلەتىندەرىڭ قاتارى ارتىپ كەلەدى. مىنە, وسىنداي بايراقتى باسەكەنى كەلەسى جىلى وتكىزۋ باقىتى قازاقستانعا دا بۇيىردى.
2015 جىلى نەگىزى قالانعان Oceanman جارىسى بۇگىنگە دەيىن يتاليا, مالايزيا, مەكسيكا, تۇركيا, رەسەي, گرەكيا, فرانتسيا, ۋكراينا, شۆەيتساريا, تايلاند, كيپر جانە كولۋمبيانىڭ ەڭ ادەمى سۋ ايدىندارىندا ۇيىمداستىرىلدى. كەلەسى جىلى بۇل ەلدەردىڭ قاتارىنا قازاقستان دا قوسىلادى.
ەلىمىزدە العاش رەت وتكىزىلگەلى وتىرعان باسەكەگە قاتىسۋشىلار 4 قاشىقتىق بويىنشا باق سىنايدى. 31 تامىزدا بالالارعا ارنالعان 800 مەتر ءجۇزۋ جانە 1,5 شاقىرىم سپرينت جارىسى جوسپارلانسا, 1 قىركۇيەكتە ەرەسەكتەر 5 شاقىرىم (Half Oceanman) جانە 10 شاقىرىم (Oceanman) قاشىقتىقتا سايىسادى.
مەگا-يۆەنتتى ىشكى جانە شەتەلدىك اۋديتورياعا تانىتۋ ماقساتىندا Oceanman قازاقستان ۇيىمداستىرۋشىلارى Kazakh Tourism ۇلتتىق كومپانياسىمەن كەلىسىمگە قول قويدى.
«مۇنداي ءىس-شارا تەك سپورتتىق تۇرعىدان عانا ەمەس, سونىمەن قاتار تۋريستەردىڭ نازارىن اۋداراتىن شارا رەتىندە دە تارتىمدى. جەكە نەمەسە كورەرمەن رەتىندە قاتىسۋ مۇمكىندىگىنەن باسقا, تۋريستەر بۇكىل الماتى وبلىسىنىڭ تۋريستىك نىساندارىندا كورە الادى», دەدى Kazakh Tourism باسقارۋشى ديرەكتورى ت. امانباەۆ.
«2019 جىلى العاش رەت يسپانياداعى Oceanman-عا قاتىسىپ, 10 شاقىرىمدىق جارىس مەنى شابىتتاندىرعانى سونشالىق – مۇنداي شارا ءبىزدىڭ ەلدە دە ءوتۋى ءتيىس دەپ ويلادىم», دەدى Oceanman Kazakhstan فرانشيزاسىنىڭ يەسى ەرالى ۋرالوۆ. «قاپشاعاي سۋى – ءجۇزۋ ءۇشىن وتە ىڭعايلى (ەۋروپالىق ستارتتارمەن سالىستىرعاندا, ەشقانداي جانۋارلار كەدەرگى ەتپەيدى) جانە بۇل جەردە قازاقستاننىڭ باسقا وڭىرلەرىنە قاراعاندا اۋا رايى دا قولايلى. قاپشاعاي ماڭىندا لوگيستيكا وتە ىڭعايلى. ەڭ ماڭىزدىسى – الماتى حالىقارالىق اۋەجايى جاقىن ورنالاسقان, سەبەبى جۇزۋگە قازاقستاندىقتار عانا ەمەس, سونىمەن قاتار ماسكەۋ, بانگكوك, دەلي, بەيجىڭ, شانحاي قالالارىنان كەلەتىن قاتىسۋشىلار بار», دەدى ەرالى ۋرالوۆ.
Oceanman – بۇل جىل سايىن چەمپيوناتقا بىرىكتىرىلگەن الەمنىڭ ءارتۇرلى نۇكتەلەرىندەگى بىرنەشە جارىس. قاتىسۋشى ءبىر نەمەسە بىرنەشە ءجۇزۋدى تاڭداي الادى. ءار ماۋسىمنىڭ سوڭىندا چەمپيوناتتىڭ فينالى وتەدى. بىلىكتىلىك جۇيەسىنە سايكەس ءاربىر OCEANMAN جانە HALF OCEANMAN-نان العاشقى 10 ايەل مەن 10 ەر ادام اۆتوماتتى تۇردە Oceanman Worldwide Championship فينالىنا وتەدى.
