سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى داۋرەن ادىلبەكوۆ ءسوز الىپ, شاعىن جانە ورتا بيزنەستى قولداۋ مەن دامىتۋعا ارنالعان زاڭناما بويىنشا جۇمىستار اتقارىلىپ جاتقانى تۋرالى حاباردار ەتتى. سوندىقتان پارلامەنتشىلەر ءۇشىن كاسىپكەرلەردىڭ دامۋعا كەدەرگى كەلتىرىپ وتىرعان پروبلەمالارىن انىقتاۋ وتە ماڭىزدى بولىپ وتىر.
قازىرگى كەزدە كوروناۆيرۋس پاندەمياسى كەزەڭىندە 430 مىڭ كاسىپورىننىڭ قىزمەتى توقتاپ قالدى. ولار ءبىر جارىم ميلليوننان استام قىزمەتكەردى اقىسىز دەمالىسقا جىبەرۋگە ءماجبۇر بولدى.
كارانتين ەرەجەلەرى جەڭىلدەگەن تۇستا مەيرامحانا, مۇراجايلار مەن تەاترلارعا ءوز قىزمەتىن قالپىنا كەلتىرۋگە رۇقسات بەرىلگەنىنە قاراماستان, كينوتەاترلار, ويىن-ساۋىق ورىندارى مەن فۋد-كورتتار ءالى دە كەلۋشىلەر ءۇشىن جابىق. دەمەك, بيزنەستىڭ كەيبىر باعىتتارى شىعىنعا باتىپ وتىر. كاسىپكەرلەر بيزنەس قاۋىمداستىعى ازىرلەگەن جوسپاردى تانىستىردى. وندا بارلىق سانيتارلىق نورمالاردى ەسكەرە وتىرىپ, لوكداۋننان شىعۋ بارىسى كورسەتىلگەن. سەناتورلار ءوز كەزەگىندە كاسىپكەرلەرگە بارىنشا كومەك كورسەتۋگە دايىن ەكەنىن جەتكىزدى.
ء"بىز ەلدىڭ باس سانيتارلىق دارىگەرىنە شاعىن جانە ورتا بيزنەس جۇمىسىنا قويىلاتىن بارلىق ەپيدەميولوگيالىق تالاپتار كورسەتىلگەن نورماتيۆتىك قۇقىقتىق اكتى شىعارۋدى ۇسىنامىز. ونىڭ ءبارى تالاپتار بۇزىلعان جاعدايدا, كىنالىلەردى ىزدەۋگە كۇش سالماي, بيزنەس وكىلدەرىنىڭ قاتەلىكتەرىن انىقتاۋ ءۇشىن قاجەت", دەدى سەناتور داۋرەن ادىلبەكوۆ.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى داۋرەن ادىلبەكوۆ مەملەكەت باسشىسىنىڭ جولداۋىندا شاعىن جانە ورتا بيزنەستى دامىتۋ جونىندەگى جۇمىستىڭ نەگىزگى ناتيجەسى ءجىو-دەگى ۇلەستى 2025 جىلعا دەيىن 35%-عا دەيىن, ال بيزنەستە جۇمىسپەن قامتىلعان قازاقستاندىقتاردىڭ سانىن 4 ميلليون ادامعا دەيىن ارتتىرۋ كەرەك دەگەنىن ەسكە سالدى.
