انار جايلعانوۆا بۇۇ دامۋ باعدارلاماسىمەن ىنتىماقتاستىق ۆەدومستۆو قىزمەتىنىڭ ماڭىزدى قۇرامداس بولىگى بولىپ تابىلاتىنىن اتاپ ءوتىپ, اگەنتتىكتىڭ باستامالارىن قولداعانى ءۇشىن العىسىن ءبىلدىردى.
"بۇۇدب قولداۋىمەن بيىل مەملەكەتتىك قىزمەت كورسەتۋ ساپاسىن قوعامدىق مونيتورينگىلەۋ, مەملەكەتتىك قىزمەتتى ەتيكالاندىرۋدىڭ حالىقارالىق ستاندارتتارىن ەسكەرە وتىرىپ, جاڭا ادەپ كودەكسىنىڭ تۇجىرىمداماسىن ازىرلەۋ, iQyzmet پلاتفورماسىنىڭ پيلوتتىق نۇسقاسىن ازىرلەۋ جانە باسقا دا جوبالار ىسكە اسىرىلۋدا", دەپ اتاپ ءوتتى اگەنتتىك توراعاسى.
سونداي-اق ونلاين كەزدەسۋ بارىسىندا انار جايلعانوۆا اعىمداعى جىلدىڭ قىركۇيەك ايىندا مەملەكەت باسشىسىنىڭ جولداۋىندا ايتىلعان تاپسىرمالاردىڭ ماڭىزدىلىعىن اتاپ ءوتىپ, اگەنتتىك وسى باعىتتا ءتيىستى مەحانيزمدەر مەن ءتيىمدى تاسىلدەردى ىسكە اسىرىپ جاتقاندىعى تۋرالى حابارلادى.
اگەنتتىك باسشىلىعىمەن جىل سايىنعى كەزدەسۋلەردى نازارعا الا وتىرىپ, بۇۇدب-نىڭ قازاقستانداعى تۇراقتى وكىلى ياكۋپ بەريش انار جايلعانوۆاعا جوعارى سەنىم مەن ارىپتەستىككە نەگىزدەلگەن ىنتىماقتاستىعى ءۇشىن العىس ايتىپ, اگەنتتىكتىڭ وتكەن جىلعى قىزمەتىنىڭ نەگىزگى باعىتتارىن ىسكە اسىرۋداعى جەتىستىكتەرىن اتاپ ءوتتى. سونىمەن قاتار, ياكۋپ بەريش پاندەميا كەزىندە قازاقستاننىڭ مەملەكەتتىك اپپاراتىنىڭ ساۋاتتىجانە ءتيىمدى جۇمىسىن تىلگە تيەك ەتتى.
سونداي-اق, ول قازىرگى ۋاقىتتا مەملەكەتتىك قىزمەتتەردى كورسەتۋ ساپاسىنا, راسىمدەرىنە جانە قولجەتىمدىلىگىنە قىزمەت الۋشىلاردىڭ قاناعاتتانۋ دەڭگەيىنە قوعامدىق مونيتورينگ جۇرگىزىلىپ جاتقانىن حابارلادى.
الەۋمەتتىك زەرتتەۋ ناتيجەسىندە بارلىق مەملەكەتتىك ورگاندار مەن "ازاماتتارعا ارنالعان ۇكىمەت" مەملەكەتتىك كورپوراتسياسى كورسەتەتىن 70 مەملەكەتتىك قىزمەتتىڭ ساپاسى مەن قولجەتىمدىلىگىنە قاتىستى 9000 رەسپوندەنتپەن ساۋالناما وتكىزىلەتىنبولادى, ونىڭ ناتيجەلەرى 2020 جىلعى جەلتوقساندا جاريالانادى.
سونداي-اق, بۇۇدب وكىلى مەملەكەتتىك قىزمەتشىلەردىڭ ادەپتىلىك دەڭگەيىن انىقتاۋ بويىنشا 7000 رەسپوندەنت اراسىنداعى الەۋمەتتىك ساۋالناما تۋرالى ايتىپ بەردى.
زەرتتەۋ ناتيجەسىندە حالىقتىڭ, كاسىپكەرلەردىڭ جانە ساراپتامالىق قوعامداستىق وكىلدەرىنىڭ مەملەكەتتىك قىزمەتشىلەردىڭ ادەپتىلىك دەڭگەيىن, ونىڭ ىشىندە حالىق پەن كاسىپكەرلەردىڭ مەملەكەتتىك قىزمەتشىلەردىڭ قىزمەتتىك جانە قىزمەتتەن تىس ۋاقىتتاعى مىنەز-قۇلقىنا قاناعاتتانۋشىلىعىن قابىلداۋى ايقىندالاتىن بولادى.
ءوز كەزەگىندە, اگەنتتىك دۇنيەجۇزىلىك بانكتىڭ قولداۋىمەن COVID-19 رەجيمىندە جۇمىس ىستەۋ بويىنشا مەملەكەتتىك قىزمەتشىلەرگە ساۋالناما جۇرگىزدى. قازاقستان بويىنشا 32 مىڭنان استام مەملەكەتتىك قىزمەتشى ساۋالنامادان ءوتتى. ساۋالناما ناتيجەلەرىن تالداۋ ءتيىستى ۇسىنىستاردى ازىرلەۋگە قىزمەت ەتەدى.
تاراپتار سونداي-اق بۇۇدب قولداۋىمەن ىسكە اسىرىلىپ جاتقان iQyzmet كادرلىق پروتسەستەرىن اۆتوماتتاندىرۋ بويىنشا جوبانى تالقىلادى, بۇل ولاردىڭ تيىمدىلىگىن ايتارلىقتاي ارتتىرۋعا باعىتتالعان.
وسىعان بايلانىستى بۇۇدب وكىلى مۇنداي جوبالار پاندەميانىڭ تەرىس سالدارىن ازايتۋ الەۋەتىن نىعايتۋ جونىندەگى ۇيىمنىڭ باسىمدىقتارىمەن سايكەس كەلەتىنىن اتاپ ءوتتى.
كەزدەسۋ قورىتىندىسى بويىنشا اگەنتتىك توراعاسى مەن بۇۇدب تۇراقتى وكىلى مەملەكەتتىك قىزمەتتى جەتىلدىرۋ جانە قازاقستاندا مەملەكەتتىك قىزمەت كورسەتۋ ساپاسىن باقىلاۋ ماسەلەلەرى بويىنشا, اسىرەسە, پاندەميا جاعدايىندا مەملەكەتتىك اپپاراتتى قولداۋ شارالارىن ازىرلەۋدە ودان ءارى تىعىز ىنتىماقتاستىققا دايىن ەكەندىكتەرىن ءبىلدىردى.
