قازىرگى ۋاقىتتا قازۇۋ-دا «گەو-ەنەرگەتيكا» ورتالىعى تابىستى جۇمىس ىستەيدى, ول 2010 جىلى فرانتسيا مەن قازاقستان اراسىنداعى ستراتەگيالىق ارىپتەستىك تۋرالى شارت اياسىندا قۇرىلدى. وسى ۋاقىت ارالىعىندا بىرلەسكەن ءبىلىم بەرۋ باعدارلامالارى بويىنشا «ەسەپتەۋ تەحنيكاسى جانە باعدارلامالىق قامتاماسىز ەتۋ», «ينفورماتيكا» جانە «مەحانيكا» ماماندىقتارى بويىنشا 100-دەن استام ماگيسترانت جانە 20-دان استام دوكتورانت دايىندالدى.
كەزدەسۋ جانە عىلىمي-ءبىلىم بەرۋ ىنتىماقتاستىعىن دامىتۋ ماسەلەلەرىن تالقىلاۋ بارىسىندا فرانتسۋز تاراپى «گەو-ەنەرگەتيكا» ورتالىعىنىڭ نەگىزىندە قازاقستان-فرانتسۋز عىلىم, تەحنولوگيالار جانە ەنەرگەتيكا بىرلەسكەن ينستيتۋتىن قۇرۋ تۋرالى باستاما كوتەردى. قازۇۋ رەكتورى ع. مۇتانوۆ ۇلكەن قىزىعۋشىلىق تانىتىپ, اۋقىمدى جوبانى جۇزەگە اسىرۋعا اتسالىسۋعا دايىن ەكەندىگىن ءبىلدىردى.
ينستيتۋتتىڭ اشىلۋى قازۇۋ مەن فرانتسيا ۋنيۆەرسيتەتتەرى اراسىنداعى ىنتىماقتاستىقتى كەڭەيتۋگە مۇمكىندىك بەرەدى. قازىرگى ۋاقىتتا لوتارينگيا ۋنيۆەرسيتەتىمەن جانە شامپان-اردەنن رەيمس ۋنيۆەرسيتەتىمەن سەرىكتەستىكتە مۇناي-گاز ءىسى, ەنەرگەتيكا, ماتەماتيكا جانە مەحانيكا ماماندىقتارى بويىنشا ءتورت بىرلەسكەن ەكى ديپلومدى ماگيسترلىك باعدارلامالار ازىرلەندى. سونداي-اق, قازۇۋ ستۋدەنتتەرى فرانتسيادا وقىپ, كاسىبي تاعىلىمدامادان ءوتىپ قانا قويماي, فرانتسۋز ءتىلىنىڭ قارقىندى كۋرستارىنان وتۋگە مۇمكىندىك الادى.
كەزدەسۋ سوڭىندا ەلشى فيليپپ مارتينە فرانتسيا مەن قازاقستان ۋنيۆەرسيتەتتەرى اراسىنداعى عىلىمي-ءبىلىم بەرۋ جانە مادەني بايلانىستاردى دامىتۋعا قوسقان زور ۇلەسى ءۇشىن ءال-فارابي اتىنداعى قازۇۋ-دىڭ التىن مەدالىمەن ماراپاتتالدى.
