حالىقارالىق قارجى ينستيتۋتى ماۋسىم ايىندا قازاقستاننىڭ ءىجو بيىل 3%-عا قىسقارادى دەپ بولجاعانى ەسىمىزدە. بۇل بايلامدى قايتا قاراستىرعان ۇيىم ساراپشىلارى ونى ءبىرشاما جاقسارتقانى بايقالادى. بانك ەكونوميستەرىنىڭ پىكىرىنە سەنسەك, 2020 جىلى ايتارلىقتاي سالىقتىق جانە باسقا دا جەڭىلدىكتەرگە قاراماستان رەسپۋبليكادا ەكونوميكالىق بەلسەندىلىكتىڭ كۇرت تومەندەۋى جانە جۇمىسسىزدىق پەن كەدەيلىكتىڭ ءوسۋى ورىن الۋى مۇمكىن.
2021 جىلى ءىجو ءوسىمى 2-3% شەگىندەگى دەڭگەيگە دەيىن قالپىنا كەلۋى, سونداي-اق كەدەيشىلىك دەڭگەيى بىرتىندەپ تومەندەگەن جاعدايدا عانا تەك 2022 جىلعا قاراي پاندەمياعا دەيىنگى احۋالعا ورالۋى مۇمكىن دەپ ناقتىلادى ۇيىم ساراپشىلارى.
ينفلياتسيالىق قىسىم وسى جىلى ساقتالىپ, تەك 2021 جىلى بىرتىندەپ تومەندەيدى دەپ بولجانۋدا جانە ۇلتتىق بانكتىڭ ماقساتتى دياپازونىنان جوعارى قالا بەرمەك.
تولەم بالانسىنىڭ اعىمداعى شوتى 2020 جىلداعى دەفيتسيتپەن پارا-پار كەلۋى ىقتيمال. ويتكەنى وپەك + كەلىسىمى ءوز كۇشىن ساقتاپ قالعانىن ەسكەرسەك, يمپورت قالپىنا ەندى كەلە باستايدى. سونىمەن بىرگە سىرتقى تولەم بالانسى قىسىمىنىڭ ازايۋى ەكسپورت پەن مۇناي باعاسىنىڭ بىرتىندەپ جاقسارۋى مەن فيسكالدى ىنتالاندىرۋلاردىڭ السىرەۋىنە تاۋەلدى.
دۇنيەجۇزىلىك بانك ماماندارى قازاقستان ۇكىمەتى 2021 جىلى بيۋدجەت تاپشىلىعىن قىسقارتۋدى كوزدەپ وتىرعانىن ەسكە سالدى. قارجى ۇيىمى كەلەسى جىلى مۇناي تاپشىلىعىنان تىس ءىجو كورسەتكىشى اعىمداعى 15%-دان شامامەن 9%-عا دەيىن تومەندەيدى دەپ باعامداسا كەرەك. بىراق ورتا مەرزىمدى ماقساتتاعى 6%-دان جوعارى بولادى.
بيىل مەملەكەتتىك قارىز 2019 جىلداعى 20%-دان شامامەن 26,6%-عا دەيىن ۇلعايۋى مۇمكىن. 2021 جىلى ونىڭ مولشەرى 30%-عا جەتۋى عاجاپ ەمەس. ەسەپتە كورسەتىلگەندەي, بۇل ساندار قالىپتى جانە ۇكىمەت قارىزدىڭ وسىنداي كولەمىن وتەۋگە قاۋقارلى.
دۇنيەجۇزىلىك بانكتىڭ بولجامىنا سايكەس, ورتالىق ازيا ەلدەرىنىڭ ەكونوميكاسى وسى جىلى 1,7%-عا قىسقارادى. بۇل بىلتىرعى ءوسۋ قارقىنىمەن سالىستىرعاندا ءوڭىر ءۇشىن قاۋىپتى قۇلدىراۋمەن تەڭ.
بيىل قىرعىزستاندا ءوسۋ قارقىنى 5,5%-عا تومەندەۋى مۇمكىن. تاجىكستان مەن وزبەكستان رەتسەسسيادان قۇتىلا العانىمەن ولاردىڭ ءىجو-ءنىڭ ءوسۋ بولجامى كوڭىل كونشىتەرلىكتەي ەمەس. مىسالى, تاجىكستاندا – 1,6%, وزبەكستاندا – 0,6%. سايكەسىنشە, 2019 جىلى ونىڭ دەڭگەيى 7,5% جانە 5,6% مەجەسىندە بولعان-دى.
ۇلتتىق ەكونوميكا ۆيتسە-ءمينيسترى ءمادي تاكيەۆ 8 شىلدەدە ۇكىمەت 2020 جىلدى وڭ ەكونوميكالىق وسىممەن اياقتاۋعا ءۇمىتتى ەكەنىن حابارلاعان ەدى. الايدا الەمدىك قارجى ينستيتۋتتارى بيىلعى توقساننىڭ قورىتىندىسى بويىنشا قازاقستان ەكونوميكاسىن قۇلدىراۋ كۇتىپ تۇر دەپ ەسەپتەيدى.
