ارمان وتى جاعىلعان جانارىڭدا «سول ءبىر اياۋلى بەينەگە قايتا ءبىر جولىعىپ قالسام» دەگەن ءۇمىت جاڭبىرلى ءتۇن قويناۋىندا مازداي تۇسەدى. كوز جاسىنداي سىرعىپ بارا جاتقان اينەكتەگى تامشى «ساعىندىڭ با؟» دەپ سىبىرلاعانداي. سۇيگەنىن ساعىنعان عاشىق جۇرەك «تەرەزەمدى ۇرماڭدارشى, تامشىلار» دەپ انتەك ءۇن قاتادى. اقىننىڭ جۇرەگىنە تۇنعان تاڭعى شىقتاي ءمولدىر جىر جۇرەكتەرگە ورنەك سالدى.
«الدى-ارتىما قاراماي ماسكەۋگە وقۋعا اتتاندىم. ءبىر جىل ۇيرەنە الماي ءجۇردىم. ماسكەۋدىڭ جاڭبىرى دا, ادامدارى دا, كوشەلەرى دە ۇنامادى. كوشەدە كەتىپ بارا جاتقان بىرەۋدەن ءجون سۇراساڭ, ۇرسىپ بەرەدى. ايتەۋىر العاشقى كەزدە قالا سۋىق بولىپ كورىندى. ونىڭ ۇستىنە سۇيگەنىمدى ساعىندىم. بىردە ونى ويلاپ تۇرعان ەدىم, كەنەت جاڭبىر جاۋا باستادى. سوسىن ءبىر ولەڭنىڭ تۋىپ كەلە جاتقانىن بايقاپ, دەرەۋ قاعاز-قالامىمدى الىپ جازا باستادىم», دەيدى وتەگەن كۇمىسباەۆ.
...تۇنىمەنەن, تۇنىمەنەن تەرەزەمدى
تامشى ۇردى,
تۇنىمەنەن ايتىپ جاتتى
جان سىردى, جان سىردى.
تۇنىمەنەن, تۇنىمەنەن ءوزىڭ جايلى
ءتۇس كورىپ,
جۇمىر باسقا مازاسىز وي سان كىردى,
سان كىردى.
تەرەزەمدى ۇرماڭدارشى,
تامشىلار...
...ءبىر قىزىعى, كوڭىلدەردى ساعىنىشقا كومكەرىپ, سوزىمەن ۇندەسە جاراسقان ءاننىڭ سازى دا جاڭبىرلى ءتۇنى تۋىپتى. اسىرەلەۋسىز, شىندىعىندا سولاي. سازگەر احماديار ەسمۇقانوۆتىڭ باسپاسوزگە بەرگەن ەرتەرەكتەگى سۇحباتىندا «بۇل – ىڭكار جۇرەكتىڭ ءۇنى ەدى» دەيدى. ء«تۇن ورتاسىندا بىرەۋ ەسىك قاققانداي بولدى. دالا تاستاي قاراڭعى, جاڭبىر جاۋىپ تۇر. سىرتقا جۇگىرىپ شىقسام, ەشكىم جوق. سويتسەم, قىزدىڭ نازىك ساۋساعىمەن ەسىك قاققانداي بولعان ءوز جۇرەگىمنىڭ ءدۇرسىلى ەكەن. سول ءتۇنى ۇيىقتاي الماي, دوڭبەكشىپ شىقتىم. ءبىر اپتا ىڭىلداپ ءجۇرىپ, ءان شىعاردىم», دەپ ەسكە الادى سازگەر. بىراق كوڭىلىنىڭ سىرلى ايناسىنداي بولعان اۋەننىڭ اجارىنا ورايلاسار لايىق ءماتىن تابا الماي قينالادى. كۇندەردىڭ ءبىر كۇنى كىتاپحانادا وتەگەن كۇمىسباەۆتىڭ «اق مونشاق» اتتى جىر جيناعى ويدا جوقتا قولىنا ءتۇسىپ قالىپ, ىزدەپ جۇرگەن جوعىنىڭ ۇستىنەن تۇسكەندەي قاتتى قۋانادى.
ماسكەۋدەگى جاستىق شاعىنىڭ جالىندى جىلدارىن ارتقا تاستاعان وتەگەن كۇمىسباەۆ اعامىز جىرىنا ارقاۋ بولعان جان جارىن قاسىنا ەرتىپ, الماتىعا ورالادى. بۇل ۋاقىتتا تىڭدارمان قاۋىمعا ءانى مەن جىرى اجىراعىسىز ەگىزدەي بولىپ كەتكەن «تامشىلار» ءانى ابك توبىنىڭ ورىنداۋىندا حالىق اراسىنا كەڭ تاراپ كەتكەن شاعى ەدى. ارادا جىلدار وتكەندە ءان اۆتورلارى الماتىدا كەزدەسكەن دە. كەزدەسىپ ريزا بولىپ, ايرىقشا ءىلتيپات بىلدىرگەن.
– ماحاببات تۋرالى شىعارما ەشقاشان وشپەيدى عوي, بۇل تۋىندى كوپ تارالادى دەپ ويلاماعانمىن. 1977 جىلى مەن ءاندى شىعارىپ ەدىم, قازىر ءان مەنىڭ اتىمدى شىعارىپ ءجۇر. شىعارماشىلىعىمداعى شوقتىعى بيىك دۇنيەلەردىڭ بىرەگەيى وسى ءان, – دەيدى سازگەر احماديار ەسمۇقانوۆ.
جان سىرى مەن قالتقىسىز كوڭىلدى, قاراڭعىعا ءسىڭىپ جاتقان جەڭىل تىنىستى ءون بويىنا دارىتقان ءان ماحابباتتىڭ مولدىرىنە, كاۋسار تازالىعىنا ەرىكسىز سەندىرەدى. نازىك ءان سالعان ساكسوفون ءۇنى تەز سۋىناتىن سۇيىسپەنشىلىككە ەمەس, شىنايى جان سىرىنا ەلىتەدى. تەرەڭنەن سىر تارقاتقان ەستەلىكتەردەگى ەسكىرمەيتىن اڭگىمە جۇرەك تۇكپىرىندەگى تۇڭعيىق, ءتۇپسىز ماڭگىلىكتەرگە وسىلاي سالەم جولدايدى. جانارىڭىزدى, جانىڭىزدى كىربىڭ شالىپ جۇرسە, ساعىنىشىڭىزدى الدەقايدا ۇمىت قالدىرعان بولارسىز, بالكىم؟! تەرەڭدە جاتقان تۇنىق دۇنيەڭىزگە ءۇڭىلىپ كورىڭىز, سىرت الەم قۇلاعىڭىزعا «تەرەزەمدى ۇرماڭدارشى, تامشىلار» دەپ سىبىرلاسىن. ال تىڭدارماننىڭ جۇرەگىندە جاتتالعان جاقسى ءاندى بۇگىن تالايلار ورىنداپ ءجۇر, ءالى دە ورىندالا بەرمەك.
