ەلوردادا سكا-مەن وتكەن ويىندا جەڭىسكە جەتكەن جەرلەستەرىمىز ەكاتەرينبۋرگكە جاقسى كوڭىل كۇيمەن اتتانعان-دى. الايدا «بارىس» ويىنشىلارى ەكى ماتچتان بەرى جەڭىلمەي كەلە جاتقان «اۆتوموبيليست» حوككەيشىلەرىن توقتاتا المادى. ماتچ باستالا سالا گول سوققان ايدىن يەلەرى «بارىستى» ابدىراتىپ قويدى. وتكىزىپ العان گولدان كەيىن جەرلەستەرىمىز ەس جيىپ ۇلگەرەمىن دەگەنشە, «اۆتوموبيليست» ەكىنشى شايباسىن سوعىپ كەتتى. ويىننىڭ 14-مينۋتىندا عانا رومان ستارچەنكو ەسەپ ايىرماسىن قىسقارتۋعا مۇمكىندىك الدى.
ەكىنشى كەزەڭدە «اۆتوموبيليست» تاعى ءبىر شايبا سوعىپ, تابلوداعى كورسەتكىشتى 3:1-گە جەتكىزدى. ال ءۇشىنشى كەزەڭنىڭ ورتا تۇسىندا «بارىس» قاتارىنا بيىل قوسىلعان ياكوب ليليا ءبىر گولمەن جاۋاپ قايتارعانىمەن, كومانداسىنا جەڭىس سىيلاي المادى. قورىتىندى ەسەپ – 3:2. ء«اۆتوموبيليستىڭ» پايداسىنا. ەندى جەرلەستەرىمىز 10 قازاندا «بارىس ارەنادا» سەۆەرستالدىڭ «چەرەپوۆەتس» كلۋبىن قابىلدايدى.
