تۋرنير 2020 جىلدىڭ 25 قازانى مەن 1 قاراشا ارالىعىندا وتەدى جانە الەمدىك رەيتينگتىڭ توپ-100 تەننيسشىنىڭ قاتارىنداعى 60-تان اسا قاتىسۋشى باق سىنايدى. قازىردىڭ وزىندە الەمنىڭ ەڭ مىقتى دەگەن بىرقاتار تەننيسشىسى نۇر-سۇلتانعا كەلەتىنى مالىمدەلدى. اتاپ ايتار بولساق, بەنۋا پەر (26), ادريان ماننارينو (39), دجون ميللمان (43) جانە تاعى باسقا دا تەننيسشىلەر جارىس كورىگىن قىزدىرماق. ال ەلىمىزدە تۇڭعىش رەت ۇيىمداستىرىلىپ جاتقان حالىقارالىق دوداعا قازاقستان ۇلتتىق قۇراماسىنىڭ ۇزدىكتەرى – الەكساندر بۋبليك (49), ميحايل كۋكۋشكين (88) جانە دميتري پوپكو (171) قاتىسادى.
«قازاقستان تەننيس فەدەراتسياسىنىڭ جۇمىسى اتر-ءدىڭ جوعارى باعاسىنا يە بولدى. وعان قازاقستان استاناسىندا وسىنداي ءىرى جارىستىڭ ءوتۋى دالەل بولا الادى. بۇل بىزگە بەرىلگەن ۇلكەن مۇمكىندىك جانە ءتۋرنيردى جوعارى دەڭگەيدە وتكىزۋگە بار كۇشىمىزدى جۇمسايمىز. بۇعان بارلىق جاعداي جاسالعان», دەيدى قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ.
الەمدىك اتر 250 ءتۋرنيرى نەگىزى جىل سايىن 40-قا جۋىق جارىس ۇيىمداستىراتىن. الايدا بيىلعى پاندەميا جاعدايىندا جارىس سانى قىسقارىپ, بۇگىنگە دەيىن نەبارى 17 دودا ۇيىمداستىرىلدى. ال نۇر-سۇلتاندا وتەتىن حالىقارالىق باسەكە وسى ماۋسىمداعى سوڭعى جارىس بولماق. سونداي-اق بۇل تەننيسشىلەردىڭ اتر رەيتينگىندە 250 ۇپاي ولجالاپ قالۋىنا دا سوڭعى مۇمكىندىك.
ءتۋرنيردى وتكىزۋ كەزىندە سانيتارلىق-ەپيدەميالىق قاۋىپسىزدىكتىڭ جوعارى شارالارىن ەسكەرە وتىرىپ, ويىندار كورەرمەنسىز جانە قاتاڭ حاتتاما اياسىندا وتەدى. «Astana Open ۇيىمداستىرۋشىلارى ويىنشىلاردىڭ قاۋىپسىزدىگىن بارىنشا قامتاماسىز ەتۋ ماقساتىندا بىرقاتار شەكتەۋ شارالارىن ەنگىزگەن. جارىس وتەتىن «داۋلەت» ۇلتتىق تەننيس ورتالىعىنىڭ اۋماعى پتر-دياگنوستيكاعا ارنالعان ارنايى جىلجىمالى زەرتحانالارمەن جانە تەرموسكانەرلەرمەن جابدىقتالادى. سونىمەن قاتار ويىنشىلاردىڭ, ۇيىمداستىرۋشىلار مەن قىزمەتكەرلەردىڭ قاجەتسىز بايلانىس تۋعىزبايتىن قاتاڭ مارشرۋتتار دايىندالدى», دەيدى قازاقستان تەننيس فەدەراتسياسىنىڭ ۆيتسە-پرەزيدەنتى يۋري پولسكي.
ء«بىزدىڭ بارلىق ماتچتى ونلاين-ترانسلياتسيا رەجىمىندە كورسەتەمىز. حالىقارالىق سەرىكتەسىمىز IMG كومپانياسى الەمنىڭ بارلىق نەگىزگى وڭىرلەرىندە ترانسلياتسيانى تاراتادى. ال قازاقستان اۋماعىندا ەكسكليۋزيۆتى حابار تاراتۋ قۇقىعى Qazsport تەلەارناسىنا تيەسىلى. قازىرگى تاڭدا دايىندىق جۇمىستارى ءجۇرىپ جاتىر, الدا ءبىزدى قىزىقتى ماتچتار كۇتىپ تۇر», دەپ سەندىردى ءتۋرنيردىڭ ديرەكتورى اتيللا ريحتەر.
سونىمەن قاتار ۇلتتىق تەننيس ورتالىعىنىڭ اۋماعىندا ۆيرتۋالدى ءباسپاسوز ورتالىعى جۇمىس ىستەيدى. بۇل قازاقستاندىق جانە حالىقارالىق بۇقارالىق اقپارات قۇرالدارىنىڭ ءباسپاسوز كونفەرەنتسيالارىنا, ويىنشىلارمەن ەكسكليۋزيۆتى سۇحبات الۋعا جانە Astana Open شەڭبەرىندە كوزدەلگەن تەننيسشىلەردىڭ ءىس-شارالارعا ەركىن قول جەتكىزۋگە تولىق مۇمكىندىك قاراستىرىلعان.
ايتا كەتەيىك, قازاقستاننىڭ تەننيس فەدەراتسياسى جىل سايىن 50-گە جۋىق حالىقارالىق تۋرنير وتكىزەدى. ولاردىڭ قاتارىندا پرەزيدەنت كۋبوگى مەن دەۆيس كۋبوگى بار.
