پىكىر • 08 قازان، 2020

كەمەڭگەر جولى – كەلەشەك جولى

51 رەت كورسەتىلدى

قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ «اباي اماناتى» اتتى ماقالاسىندا ۇلتىمىزدىڭ تۇڭعىش لينگۆيست عالىمى قۇدايبەرگەن جۇبانوۆتىڭ «اباي – قازاق ادەبيەتىنىڭ تۇڭعىش كلاسسيگى» ماقالاسىنا سىلتەمە جاسايدى.

ەلباسى حالقىنا «ەسكىنىڭ سوڭى مەن جاڭانىڭ باسىن جالعاعان التىن كوپىر» بولا بىلگەن اباي بابامىز «ۇلكەن ءبىلىمپاز قۇدايبەرگەن جۇبانوۆ ەۋروپا رۋحانياتىمەن سالىستىرا ايتقانداي، اباي – ء«وز ورتاسىنىڭ دانتە سياقتى ادامى»، ياعني حالىقتىڭ ءداستۇرلى ءسوز ونەرىن، تانىم جۇيەسىن، مىنەز ءبىتىمىن تۇبىرىمەن جاڭاشا تۇلەتكەن ساناتكەر. ورىستار ءۇشىن الەكساندر پۋشكين، اعىلشىندار ءۇشىن ۋيليام شەكسپير، نەمىستەر ءۇشىن يوگانن گەتە، امەريكالىقتار ءۇشىن ۋولت ۋيتمەن قانداي بولسا، قازاقستاندىقتار ءۇشىن اباي دا – سونداي رۋحاني ۇلى تۇلعا» دەپ، ۇلى اقىن، دانا ويشىلدىڭ تۇلعاسىنا باعا بەرگەن.

ايتا كەتەر بولساق، اباي قايتىس بولعاننان كەيىن 30 جىلدان سوڭ جازىلعان قۇدايبەرگەن جۇبانوۆتىڭ اتالعان ماقالاسى ءوز زامانىندا تۇيدەك-تۇيدەك ويلارىمەن ادەبي ورتانى سەلت ەتكىزىپ، قارىمدى، وتكىر، شىنشىل تۋىندى رەتىندە قابىلدانعان بولاتىن.

ەلباسى ابايدى قالاي تانىعانىن، ونىڭ ءىلىمىن تانىتۋعا سەبەپكەر بولعان جانداردى اتايدى دا، «اباي شىڭىنا كوتەرىلىپ تۇرىپ، اباي رۋحىنا تاعزىم ەتتىم. ۇلى اقىننىڭ ءوز حالقىمەن بىرگە ادامزاتتىڭ بيىگىنەن كورىنگەنىن تىلەدىم» دەپ، قالىڭ جۇرتشىلىققا وي تاستايدى. كۇنى كەشە عانا 85 جىلدىق مەرەيتويىن اتاپ وتكەن ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ پروفەسسورلىق-وقىتۋشىلىق قۇرامى ن.نازارباەۆتىڭ «اباي اماناتى» ماقالاسى ءححى عاسىر­داعى ابايتانۋ ءىلىمىن جاڭا قىرىنان يگەرۋگە جول اشادى دەگەن پىكىردە.

ەگەر دە حح عاسىردىڭ باسىنداعى قا­زاق رۋحانياتىنا جاڭا كوتەرىلگەن ق.جۇبانوۆتار بۋىنىنىڭ ومىرلىك باعدارى، تەمىرقازىعى اباي تاعىلىمى بولعانىن ەسكەرسەك، ءححى عاسىرداعى جاڭا بۋىننىڭ دۇنيەتانىمى مەن ومىرلىك باعدارى دا اباي تالىمىمەن قالىپتاسىپ جاتقانىن ايتا كەتكەن ءجون.

اباي – ەلدىڭ باعدارى، تەمىرقازىعى. جاھاندىق ساياسات الماعايىپ وزگەرىپ جات­قان ۋاقىتتا، ەستى ۇلت، ەستى مەملەكەت بولىپ قالۋ ءۇشىن، وزگە وركەنيەتپەن قانات­تاسا، ۇيلەسىمدى دامىپ وتىرۋ ءۇشىن دە ءوز ابايى بولۋى كەرەك. ەلباسى «اباي اماناتى» ماقالاسىندا وركەنيەتتەر توعىسىندا، دۇنيە وزگەرىپ جاتقان كەزەڭدە حالقىمىزدىڭ تارازىنىڭ باسىن تەڭ ۇستاپ، ۇيلەسىمدى دامۋ شەڭبەرىنەن شىعىپ كەتپەۋىن شەگەلەيدى. سول ءۇشىن دە اباي كەرەك. اباي اقىلىمەن اقىرىن ءجۇرىپ، انىق باسا بەرسەك، وركەنيەت كوشى­نىڭ سوڭىندا قالمايتىنىمىز انىق.

 

باۋىرجان ەردەمبەكوۆ،

فيلولوگيا عىلىمدارىنىڭ دوكتورى، پروفەسسور، قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ رەكتورى

 

سوڭعى جاڭالىقتار

دوللار ارزاندادى

قارجى • بۇگىن، 16:22

شىمكەنتتە دە LRT سالىنۋى مۇمكىن

ايماقتار • بۇگىن، 12:50

دوللار باعاسى تاعى قىمباتتادى

ەكونوميكا • بۇگىن، 10:32

ۇقساس جاڭالىقتار