س.شاپاعاتوۆ 1940 جىلى تۇپقاراعان اۋدانى, تەلمان اۋىلىندا دۇنيەگە كەلگەن. قازاق تاۋ-كەن مەتاللۋرگيا ينستيتۋتىن جانە ماسكەۋ مۇناي-گاز ونەركاسىبى ينستيتۋتىن بىتىرگەن. ول ايماقتاعى مۇناي جانە گاز وندىرەتىن كاسىپورىنداردا جۇمىس ىستەپ, قاراپايىم مۇنايشىدان قوعام قايراتكەرىنە دەيىن ءوستى. شاپاعاتوۆ "پاراسات" قوعامدىق-ساياسي دەموكراتيالىق قوزعالىسىنىڭ نەگىزىن قالاۋشى جانە جەتەكشىسى بولدى. ونىڭ باسشىلىعىمەن العاشقى قازاق مەكتەبى مەن بالاباقشاسى اشىلدى. شەۆچەنكو قالاسىنان بۇرىنعى اتاۋى قايتارىلىپ, اقتاۋ قالاسى بولدى. ماڭعىشلاق ايماعى ماڭعىستاۋ بولىپ وزگەرتىلدى. ول سونداي-اق ماڭعىستاۋ وبلىسىندا مۇناي-گاز كەن ورىندارىن يگەرۋگە جانە دامىتۋعا ايتارلىقتاي ۇلەس قوستى.
ەسكە الۋ شاراسى قوعام قايراتكەرى مۇراجايىنىڭ سالتاناتتى اشىلۋ راسىمىمەن جالعاستى. مۇراجايدا س.شاپاعاتوۆتىڭ پايدالانعان جەكە زاتتارى, فوتوسۋرەتتەرى , قۇجاتتارى, وتباسىلىق ارحيۆتەن الىنعان زاتتارى جيناقتالعان. مەرەكەلىك شارا بارىسىندا س. شاپاعاتوۆتىڭ ءومىرى مەن ەلەۋلى ەڭبەك جولىنا ارنالعان "سايىن دالانىڭ سايىپقىرانى" اتتى قوعامدىق-ساياسي, تاريحي-تانىمدىق جاڭا جۋرنالدىڭ تۇساۋكەسەرى ءوتتى. وقىرمانعا جول تارتقان جيناققا زيالى تۇلعامەن مۇراتتاس, قاناتتاس, ۇزەڭگىلەس بولعان ازاماتتاردىڭ, قالامگەرلەردىڭ ەسسەلەرى, زەرتتەۋ ماقالالارى, ەستەلىكتەرى مەن ونىڭ جاناشىرلىق قامقورلىعىن كورگەن جانداردىڭ لەبىزدەرى توپتاستىرىلعان.
وبلىس اكىمى س.ترۇموۆ تۋعان ولكەنىڭ ءوسىپ-وركەندەۋىنە, ۇلتتىق مادەنيەتتىڭ جاڭعىرۋىنا قوسقان ۇلەسىن ەرەكشە اتاپ ءوتتى.
"سايىن ءنادىر ۇلى – زامانىنىڭ الدىڭعى قاتارلى وزىق ويلى تۇلعاسى اتانا بىلگەن ءنادىر اقساقالدىڭ ونەگەلى جولىن جالعاستىرعان, اتا-بابانىڭ ارۋاعىن, قادىر-قاسيەتىن اسقاقتاي بىلگەن ءبىرتۋار تۇلعا بولدى. ارداقتى ەل اعاسى, ۇلت پاتريوتى قازىر ارامىزدا جوق بولسا دا, ونىڭ ەل ءۇشىن اتقارعان ەرەن ەڭبەگى, يگى ىستەرى, ونەگە-وسيەتى مەن مۇرالارى حالقىنا, ۇرپاققا ميراس بولارى ءسوزسىز", دەدى وبلىس اكىمى.
