"ىندەتكە قارسى كۇرەس ءۇشىن قاجەتتى شارالاردىڭ بارلىعى قابىلدانعان. ەڭ باستىسى, تاجىريبەمىز بار. وسى كەزەڭدە دەنساۋلىق ساقتاۋ سالاسىن نىعايتۋ ۇشىن اۋقىمدى جۇمىس اتقارىلدى. ازاماتتاردىڭ ءومىرى مەن دەنساۋلىعىن قورعاۋ جونىندەگى ۇلتتىق جوسپار جۇزەگە اسىرىلۋدا. وڭىرلەردىڭ دايىندىعىن ايقىندايتىن ينديكاتورلار جۇيەسى ەنگىزىلدى. جەرگىلىكتى جەرلەردە جەدەل شتابتار قۇرىلىپ, جۇمىس ىستەۋدە. بۇل شتابتار ءىس-قيمىل شارالارىن ورتالىققا جالتاقتاماي, وزدەرى قابىلداي الادى. قۇزىرلى ورگانداردىڭ بارلىعى ىندەتپەن كۇرەسكە دايىن. ەلىمىزدىڭ بىرتۇتاس بيوقاۋىپسىزدىك جۇيەسىن قۇرۋ جۇمىسى باستالدى. حالىقارالىق قاۋىمداستىق ۇلتتىق ۆاكتسينا ازىرلەۋ جونىندەگى جۇمىستارىمىزعا قولداۋ ءبىلدىرىپ وتىر. قازىر كلينيكالىق زەرتتەۋلەر جۇرگىزىلۋدە. بۇل ەلىمىزدىڭ عىلىم سالاسىنىڭ الەۋەتى زور ەكەنىن كورسەتەدى. بىراق, ەلدەگى جاعداي تۇراقتالعانىمەن, بوساڭسۋعا بولمايدى. جاز ايلارىنداعى كۇردەلى احۋالدىڭ زارداپتارىن ەستەن شىعارماعانىمىز ءجون. وكىنىشكە قاراي, ازاماتتارىمىز, ءتىپتى, جەرگىلىكتى بيلىك وكىلدەرى ساقتىق شارالارىن ۇمىتا باستادى.
ەپيدەميانى اۋىزدىقتاۋ – وڭاي شارۋا ەمەس. ونىڭ ەكونوميكاعا جانە حالىقتىڭ ءال-اۋقاتىنا تيگىزەتىن سالدارىن بارىنشا ازايتۋ – ماڭىزدى مىندەت. ءبىز جان-جاقتى ويلاستىرىلعان جانە ناقتى شارالار قابىلداۋىمىز كەرەك", دەدى پرەزيدەنت.
