كوڭىلىڭە قاياۋ تۇسىرەتىنى, ينتەرنەت زامانىندا, ءبارىن سودان الامىز, گازەتتىڭ نە كەرەگى بار دەيتىندەردىڭ ۇشقارى ويلارى بولسا, قۋاناتىنىڭ, تاسقا تۇسكەننىڭ – تاريح جىلناماسىندا قالعانداي, كۇندەلىكتى باسىلىمداردان بۋما-بۋما ءۇي كىتاپحاناسىن جاساعان نەبىر وقىرمانداردى كورەسىڭ.
پروفەسسورلار تاۋمان اماندوسوۆ, ءابىلفايىز ىدىرىسوۆتاردىڭ «تاڭعى استى ىشپەي كيوسكىدەن باسپاحانا ءيىسى بۇرقىراعان گازەتتەر الىپ, وقىماي, دەگبىر تاپپايتىن ەدىك, ستۋدەنتتەر! سەندەرگە سونى ايتامىز» دەگەن عۇمىرلى تىلەكتەرى ءالى جادىمىزدا جاڭعىرىپ تۇرعانداي.
ارينە گازەت جايىندا قاياۋلى كوڭىل ايتاتىندارمەن ءسال-ءپال كەلىسۋگە دە بولار. گازەتتى وقىرمان قولىنا جەتكىزۋشى تەتىك – پوشتا قىزمەتىنىڭ شاباندىعى, سىلبىرلىعى, ءۇيىپ-توگىپ اپتاسىنا ءبىر جەتكىزەتىنى وتىرىك ەمەس, راس. تالايدان بەرى ايتىلىپ جۇرگەن جاعدايات. قالالاردا مۇنداي بولعاندا, الىس اۋىلدارداعى وقىرماننىڭ ابدەن ەسكىرگەن, اقپاراتتىڭ قۇلشىنىسى جوق گازەتتى الىپ تۇرعانداعى كوڭىل كۇيىن اينىتپاي بولجايمىز.
«ەگەمەن قازاقستان» – تۇتاستاي التاي مەن اقجايىق, الاتاۋ مەن ارقا اراسىنداعى ەل تىنىسىنىڭ بارومەترى, تاياۋ جانە الىس شەتەلدەگى حالىقتاردىڭ تىرشىلىك تامىرىنىڭ بۇلكىلىن بايانداپ وتىرار, بايسالدى باسىلىم. شىعارماشىلىق توپتىڭ كاسىبي دەڭگەيىندە سالماقتىلىقپەن وقىلاتىن ءاربىر دۇنيەسىنەن مول ماعلۇمات الاتىنىمىز راس.
تۇتاستاي ەل ءىشىن قىزمەت بابىمەن ءجيى ارالايمىز. قيانداعى قويناۋدا, تۇكپىردە جاتقان اۋىلدارعا بۇرىلاسىڭ. ەگىستىك, شابىندىق, جايىلىم باسىنداعى شارۋا ادامى اۋزىنان نەبىر «شىركىن-اي» دەگەن ويلارىن ەستيسىڭ. سولارشا ايتساق, «باياعىداي نەگە سىن, فەلەوتوندار از شىعادى, ويىنا كەلگەنىن وسپادار قيمىلىمەن جاساعاندار نەگە اياۋسىز جازالانبايدى, سوت شەشىمدەرى نەگە ءجۇردىم-باردىم ورىندالادى, ايران ىشكەندەر قۇتىلىپ, جالاعاندار نەگە تۇتىلادى؟». ەل ادامدارى وسىلاي ويلايدى ەكەن.
قازىرگى تاڭدا «ەگەمەننىڭ» بارلىق بەتتەرى ءتۇرلى-ءتۇستى سۋرەتتەرمەن اسەم بەزەندىرىلىپ شىعارىلۋى وقىرمان ىنتاسىن دا ارتتىراتىنى بەلگىلى. ايماقتاردان باسىلاتىن گازەتتەرگە دە سونداي تالاپ قويىلسا دەيمىز.
ولمەسحان بولاتبەكوۆ,
قوعام قايراتكەرى
نۇر-سۇلتان
