19 جاستاعى قاراعاندى فۋتبول مەكتەبىنىڭ تۇلەگى بىلتىر «شاحتەر» قۇرامىندا ونەر كورسەتىپ, 2019 جىلعى فۋتبول ماۋسىمىنىڭ سوڭىندا كوماندادان كەتكەن بولاتىن. 2020 جىلدىڭ باسىندا حورۆاتيانىڭ «حايدۋك» كلۋبىنا اۋىسۋعا جاقىن تۇرعان ەدى, الايدا حورۆاتتار ونى ترانسفەر كەزەڭى جابىلعانعا دەيىن كوماندا تىزىمىنە قوسىپ ۇلگەرمەدى.
بىلتىر قازاقستان جاستار قۇراماسىنىڭ ەڭ ۇزدىك ويىنشىلارىنىڭ ءبىرى اتانعان باچەك جىل باسىنان بەرى كلۋبسىز قالعان سوڭ U-21 قۇرامىنا شاقىرتۋ العان جوق. ايتا كەتەيىك, وتانداسىمىز دوپ تەبەتىن «پوبلەنسە» كلۋبى يسپانيانىڭ B سەگۋنداسىندا (دەڭگەي بويىنشا ءۇشىنشى ليگا) ونەر كورسەتەدى. اتالعان كوماندا ءوز الاڭىنداعى ويىندارىن «نوۋ كامپ دە سا پوبلا» ستاديونىندا وتكىزەدى.
