قىزىعى مەن قيىنشىلىعى قات-قابات مۇنداي ايشىلىق ساپارعا شىعۋعا ەكىنىڭ ءبىرىنىڭ باتىلى بارا قويمايتىنى بەلگىلى. ال دامير ءۇشىن بۇل العاشقى تاۋەكەل ەمەس. ول جاز ماۋسىمىندا «ابايعا جول» اكتسياسى اياسىندا اقىننىڭ تۋعان جەرىنە جاياۋ ساپار شەككەن. الماتىدان تۋعان باۋىرى داۋلەت كوشەەۆپەن بىرگە سەمەيگە الپىس ەكى كۇندە اياق باسقان ازامات, بۇل ءىسىن ۇلى ويشىلدىڭ مەرەيتويىنا قوسقان از دا بولسا ۇلەسىم دەپ ەسەپتەيدى. ونىڭ سوزىنشە, كەزەكتى ساپاردىڭ ءمانى تىپتەن بولەك.
«جوسپار بويىنشا 5 وبلىستى ۆەلوسيپەدپەن ءجۇرىپ وتۋگە ءتيىسپىن. جول بويى كەزدەسكەن اۋىل-ايماقتاردى ارالاپ, ونداعى سمارتفون, پلانشەت سەكىلدى تەحنيكالارعا مۇقتاج وقۋشىلاردىڭ ءتىزىمىن جاسايمىن. ال شەرۋ ۇيىمداستىرۋشىلارى ءتيىستى قاراجاتتى جيناپ, كومەككە ءزارۋ جاندارعا جىبەرىپ وتىرادى. ساياحاتتاعاندى جانىم سۇيەدى. سۇيىكتى ءىسىمنىڭ قايىرىمدىلىقپەن قابىسقانى تىپتەن تاماشا بولدى. جاقسىلىق جاساۋ – مەن ءۇشىن ەڭ ابزال ءىس. بۇدان كەيىن دە وسى ماقساتتا ەلىمىزدىڭ بارلىق وبلىسىن ارالاۋ ويىمدا بار», دەيدى دامير كوشەەۆ.
ايرىقشا جوباعا دەمەۋشىلىك تانىتقانداردىڭ ءبىرى كاسىپكەر قايرات قۇدايبەرگەن. «بەرسەڭ بالاعا بەر» دەگەن قاعيدانى العا ۇستاعان ازامات, «شەتكەرى اۋىلدارداعى ينتەرنەتتىڭ قالاي جۇمىس ىستەيتىنىن, بالالارعا قاشىقتان ءبىلىم الۋعا قانداي جاعداي جاسالعانىن بىلگىمىز كەلەدى» دەگەندى ايتادى. قايىرىمدىلىق قانات قاقسا قانداي جاقسى. مۇنداي شارالار جۇرتشىلىقتىڭ نازارىن اۋدارا وتىرىپ, يگى ىستەردىڭ وركەن جايۋىنا سەرپىن بەرەتىنى ءسوزسىز.
ال الماتىلىق دامير كوشەەۆكە: «جولىڭ بولسىن, جولاۋشى!» دەگىمىز كەلەدى.
الماتى
