«شىمكەنت قالاسىنىڭ گەوپورتالى قالادا ورنالاسقان ءاربىر نىسان تۋرالى تولىق اقپارات جيناقتالاتىن ارنايى سايت بولادى. پورتال كەزەڭ-كەزەڭىمەن ىسكە قوسىلادى. جىل سوڭىنا دەيىن 1-كەزەڭ ىسكە قوسىلادى دەپ كۇتىلۋدە. وندا جەر قاتىناستارى سالاسىنداعى كورسەتىلەتىن مەملەكەتتىك قىزمەتتەردىڭ بارلىعى ەنگىزىلىپ, تولىعىمەن اۆتوماتتاندىرىلادى. ياعني قالانىڭ باس جوسپارى, جەرگە قاتىستى اقپاراتتار, مەكەنجاي انىقتاماسى قوسىلادى», دەيدى م.ايمانبەتوۆ.
جالپى, پورتال قالا اۋماعىنداعى نىساندار مەن پروتسەستەر تۋرالى اقپاراتتى جەدەل الۋعا مۇمكىندىك بەرەدى. ونداعى ساۋلەت-جوسپارلاۋ تاپسىرماسىن جانە ينجەنەرلىك كوممۋنيكاتسيالارعا قوسىلۋعا ارنالعان تەحنيكالىق شارتتاردى الۋ, ولاردى كەلىسۋ جانە قۇجاتتاردى بەرۋ سەكىلدى پروتسەستەرى گەواقپاراتتىق سەرۆيس ارقىلى اۆتوماتتاندىرىلادى. سەرۆيس ارقىلى كەز كەلگەن قالا تۇرعىنى (ينۆەستورلار, كاسىپكەرلەر) جەر ۋچاسكەسى تۋرالى, ونىڭ كاداسترلىق قۇنى, كەپىلدىك جارناسى, جەر ۋچاسكەسىنىڭ ورنالاسقان جەرى جانە وزگە دە اقپاراتتى كورە الاتىنداي ەتىپ ازىرلەنەدى.
«كاسىپكەرلەردى قولداۋدى وڭتايلاندىرۋ ماقساتىندا گازبەن جابدىقتاۋ, ەلەكتر جانە سۋمەن جابدىقتاۋ, جىلۋ جۇيەسىنە قوسۋ, بايلانىس جانە تەلەكوممۋنيكاتسيا جەلىلەرىنە قوسۋعا ارنالعان تەحنيكالىق شارتتاردى الۋ سەكىلدى قىزمەتتەر تولىعىمەن اۆتوماتتاندىرىلادى», دەيدى پورتالدى دايىنداۋشى ماماندار.
كونديتەرلىك ءوندىرىستىڭ ورتالىعىنا اينالۋدا
«راحات-شىمكەنت» فابريكاسى شىمكەنتتە قانتتى كۇلشە شىعاراتىن جاڭا وندىرىستىك جەلىنى ىسكە قوستى. قالا اكىمدىگىنىڭ قولداۋىمەن جۇمىس باستاعان فابريكا وندىرىسكە قاجەتتى قوندىرعىلاردى يتاليادان الدىرىپتى. ال قوندىرعىنى ورناتۋعا, وندىرىستىك جەلىنى تەحنيكالىق تالاپتارعا ساي قولدانۋدىڭ جولدارىن ۇيرەتۋگە سول ەلدىڭ ماماندارى قولعابىس ەتىپ جاتىر.
«قانتتى كۇلشەدەن بولەك كەلەسى ايدىڭ باسىندا ءتاتتىنىڭ تاعى ءبىر ءتۇرى «قۇمدى» كۇلشە شىعارۋدى ويلاستىرىپ جاتىرمىز. ول ءونىمنىڭ قۇرامى, ءتۇر-ءتۇسى, ءدامى باسقاشا بولادى. ونداي پەچەنە وتاندىق نارىقتا قازىر وتە از. يتاليالىق جاڭا قوندىرعى سارىمايدان جاسالاتىن كۇلشەمەن بىرگە ونىڭ قامىرى مايدا قۇم سەكىلدى بولىپ كەلەتىن ءتۇرىن شىعارۋعا مۇمكىندىك بەرەدى. جاڭا كۇلشەنىڭ ورتاسىنداعى ءتاتتى جۇمساعى جەمىستەردەن جاسالعان توساپ نەمەسە شوكولادتى كرەم بولۋى مۇمكىن. رەسەيدە بۇل ءونىم كەڭ تارالعان. ال قازاقستاندا تۇڭعىش رەت ءبىزدىڭ فابريكادا شىعارىلماق. جاڭا قوندىرعى Polin دەپ اتالادى. ول الەم بويىنشا كونديتەرلىك ونىمدەر شىعاراتىن ەڭ ۇزدىك وندىرىستىك جەلىنىڭ قاتارىنا كىرەدى. ونىڭ بىردەن-ءبىر ارتىقشىلىعى, تابيعي گازبەن دە جۇمىس ىستەي بەرەدى. سونىمەن بىرگە ونىمدىلىگى وتە جوعارى. ماسەلەن, پەچەنە وندىرىسىندە ساعاتىنا 2 مىڭ تونناعا دەيىن ءونىم شىعارا الادى», دەدى سەرىكتەستىك ديرەكتورى جۇلدىز راحيپبەكوۆا.
انىعىندا, ءىرى كاسىپورىندار ءجيى شوعىرلانعان وڭىرلەردە سول سالاعا لايىقتالعان وقۋ ورىندارى بولاتىنى بەلگىلى. شاھارداعى №6 كاسىپتىك كوللەدج ۇجىمى كونديتەرلىك سالاعا مامان باۋلۋدان كوش باستاپ تۇر. بۇگىندە «راحات-شىمكەنت» فابريكاسى قالاداعى وسى كوللەدج ستۋدەنتتەرىن وندىرىستىك وقۋ-ءىس تاجىريبەسىنەن وتكىزىپ, كوپشىلىگىن جۇمىسقا قابىلداۋدا.
شىمكەنت قالاسى اكىمىنىڭ ورىنباسارى ايبەك ساتتىباەۆتىڭ ايتۋىنشا, «راحات-شىمكەنت» جشس مەگاپوليستەگى ءىرى كاسىپورىنداردىڭ ءبىرى بولىپ سانالادى. شىمكەنتتە «راحات» كومپانياسىنىڭ ونىمدەرى ەڭ العاش 2001 جىلى شىعارىلدى. سودان بەرى ءوندىرىس ورنىنىڭ اياسى كەڭەيىپ, بۇگىندە مۇندا 7 ءتۇرلى ءتاتتى ونىمدەر 52 اتاۋمەن ىشكى-سىرتقى نارىققا جونەلتىلۋدە. جىلىنا 24 مىڭ توننا ءونىم وندىرەتىن كونديتەرلىك فابريكا ونىمدەرىنىڭ كولەمى سوڭعى جىلدارمەن سالىستىرعاندا 20 پايىزعا وسكەن.
«جاڭا وندىرىستىك جەلىنى ىسكە قوسۋ ءۇشىن 3,2 ملرد تەڭگە ينۆەستيتسيا تارتىلدى. مەملەكەتتىك ء«وندىرىس» باعدارلاماسى ارقىلى كومپانياعا جىلدىق مولشەرلەمەسى 6 پايىزدىق جەڭىلدىكپەن 2,6 ملرد تەڭگە نەسيە بەرىلدى. قازىرگى تاڭدا كاسىپورىندا 860 ادام ەڭبەك ەتسە, جاڭا جەلىنىڭ وندىرىسكە ەنۋىمەن جۇمىسكەرلەر سانى قوسىمشا تاعى 130 ادامعا تولىعادى. شىمكەنتتىك ونىمدەر بۇگىندە ىشكى نارىقتان بولەك كورشىلەس رەسەيگە, ۋكرايناعا, ورتالىق ازيا مەملەكەتتەرىنە, ءتىپتى گەرمانياعا ەكسپورتتالۋدا. فابريكانىڭ قالا ەكونوميكاسىنا قوسار ۇلەسى زور بولىپ تۇر. بىرىنشىدەن, قوسىمشا ينۆەستيتسيا تارتىلدى. ەكىنشىدەن, جاڭادان قانشاما تۇراقتى جۇمىس ورنى اشىلدى. ۇشىنشىدەن, كاسىپورىن ونىمدەرىن شەتەلگە جونەلتۋ ارقىلى تابىسى ۇلعايادى, سونىمەن بىرگە مەملەكەتتىك بيۋدجەتكە تۇسەتىن سالىقتىڭ كىرىس بولىگى دە ارتادى. بۇل ءوز كەزەگىندە ەلدەگى كوپتەگەن الەۋمەتتىك ماسەلەنىڭ وڭ شەشىم تابۋىنا جۇمسالاتىن بولادى. ۇكىمەت تاراپىنان كاسىپكەرلىك سالاسىنا ۇلكەن قولداۋلار كورسەتىلىپ جاتىر. سونىڭ ءبىر مىسالى, وڭىرلىك كاسىپكەرلىكتى قولداۋ كارتاسى اياسىندا 2011-2019 جىلدارى 182 ملرد تەڭگەگە 105 ءىرى جوبا ىسكە قوسىلدى. ەندىگى كەزەكتە وسىنىڭ شەڭبەرىندە 2025 جىلعا قاراي جالپى قۇنى 328 ملرد تەڭگەنى قۇرايتىن 35 ءىرى جوبانى قولعا الماقشىمىز. سونداي-اق قالادا ء«بىر تەرەزە» قاعيداتى بويىنشا «كاسىپكەرلەرگە ارنالعان ۇكىمەت» ارنايى سەرۆيستىك ورتالىعى بيزنەس وكىلدەرىنە قىزمەت كورسەتەدى. وندا كاسىپكەرلەر مامانداردان بيزنەس-جوسپار قۇرۋ, بانكتەرمەن كەلىسسوزدەر جۇرگىزۋ, رۇقساتتاما قۇجاتتارىن ازىرلەۋ سىندى ءارتۇرلى كومەك پەن كەڭەس الا الادى», دەدى قالا اكىمىنىڭ ورىنباسارى ا.ساتتىباەۆ.
«راحات» اق باسقارما توراعاسىنىڭ ورىنباسارى پاك گيۋن ەلدىڭ مالىمدەۋىنشە, تاتتىلەر وندىرەتىن ءوزىمىزدىڭ «راحات» فابريكاسى وڭتۇستىككورەيالىق Lotte كومپانياسىنىڭ قۇرامىنا كىرەتىن 9 ەلدەگى كونديتەرلىك كاسىپورىندار ىشىندە ءوندىرىس اۋقىمى مەن تابىسى جاعىنان ءبىرىنشى بولىپ تۇر ەكەن. شەتەلدىك ينۆەستور الداعى ۋاقىتتا شىمكەنتتەگى «راحاتتىڭ» ونىمدەرى تمد ەلدەرىنىڭ نارىعىن وتاندىق تاتتىلەرمەن تولتىراتىنىنا زور سەنىم بىلدىرۋدە.
قوعامدىق كولىك ەلەكتروندى بيلەت جۇيەسىنە كوشۋدە
قانشاما جىلدان بەرى شىمكەنتتە جىرعا اينالعان ەلەكتروندى بيلەت جۇيەسى ەندى قولدانىسقا ەنە باستايدى. بۇل تۋرالى شىمكەنت قالاسى اكىمىنىڭ ورىنباسارى ماقسۇت يساحوۆ اقپاراتتىق-كوممۋنيكاتسيالىق ورتالىقتا وتكەن بريفينگتە باياندادى.
«ەلەكتروندى تولەم جۇيەسىن ەنگىزۋ «QazSmartTrans» جشس جەكە ينۆەستيتسياسى ەسەبىنەن جۇزەگە اسادى. ينۆەستيتسيا كولەمى – 1,2 ملرد تەڭگە. بۇگىندە ستاتسيونارلىق ۆاليداتورلار 350-دەن اسا اۆتوبۋسقا ورناتىلدى. جالپى, 15 قازاننان باستاپ تولەم جۇيەسى ەنگىزىلەدى.
1 قاراشاعا دەيىن جولاۋشىلاردىڭ تولەم كارتاسىمەن جانە قولما-قول تولەۋگە مۇمكىندىگى بار. 1 قاراشادان باستاپ كارتا ارقىلى 70 تەڭگە, قولما-قول تولەۋ 100 تەڭگە بولادى. جوبانى ىسكە اسىرۋداعى نەگىزگى ماقسات – «تسيفرلى قازاقستان» مەملەكەتتىك باعدارلاماسىن ىسكە اسىرۋ, قوعامدىق كولىكتىڭ قىزمەتىن جاقسارتۋ جانە جولاۋشىلارعا قولايلى جاعداي جاساۋ, قالالىق بيۋدجەتكە تۇسىمدەردى ارتتىرۋ, جولاۋشىلار اعىنىنىڭ تارالۋى بويىنشا ناقتى ستاتيستيكالىق ەسەبىن بەرۋ, اشىق دەرەكتەر ارقىلى الەۋمەتتىك ءمانى بار مارشرۋتتاردى سۋبسيديالاۋ», دەدى قالا اكىمىنىڭ ورىنباسارى.
سونىمەن شىمكەنتتە 15 قازاننان باستاپ قوعامدىق كولىكتەرگە ەلەكتروندى بيلەت جۇيەسى ەنگىزىلەدى. بۇل – ءۇشىنشى مەگاپوليستەگى قوعامدىق كولىك قىزمەتىن جاڭعىرتۋ جوبالارىنىڭ ءبىرى. شاھاردا بۇل باعىتتاعى جۇمىستاردى جاڭعىرتۋدا بىرقاتار شارا قولعا الىنعان بولاتىن. بۇعان دەيىن قالاعا جاڭا اۆتوبۋستار جەتكىزىلدى. ەندى تولەم جۇيەسىنە دە جاڭا وزگەرىستەر ەنگىزىلمەك.
ەلەكتروندى بيلەت جۇيەسى ءار مارشرۋتتىڭ تيىمدىلىگىن, كومپانيالاردىڭ تابىسى مەن شىعىنىن ايقىندايدى. تاعى ءبىر ەرەكشەلىگى – تولەمنىڭ ءارتاراپتاندىرىلۋىندا.
قوعامدىق كولىكتە تولەم جاساۋ ءۇشىن ەلەكتروندى كارتالاردىڭ 4 ءتۇرى قاراستىرىلعان – ستاندارتتىق (جالپى پايدالانۋعا), مەكتەپ وقۋشىلارىنا, ستۋدەنتتەرگە جانە جەڭىلدىكتەرگە ارنالعان كارتالار.
كومپانيا باسشىسى سەرجان اقىلباەۆ جاڭا جوبا جايلى تولىعىراق مالىمەت بەردى. ونىڭ ايتۋىنشا, كولىك كارتاسىنىڭ باعاسى – 500 تەڭگە. جولاۋشىلار كولىك كارتاسىمەن, SMS, QR-كود, سمارتفوندى (NFC) قولدانا وتىرىپ, جول ءجۇرۋ اقىسىن تولەي الادى. تولەم كارتالارى قالادا 3 مىڭنان اسا ورىندا, دۇكەندە ساتىلادى. كارتانى بانكتەردىڭ بانكوماتتارى نەمەسە ءموبيلدى قوسىمشالار ارقىلى تولتىرۋعا بولادى.
«QazSmartTrans» جشس تاراپىنان 14 مىڭ كولىك كارتاسى ۇلى وتان سوعىسى ارداگەرلەرى مەن مۇگەدەكتەرىنە, تىل ەڭبەككەرلەرىنە («ەرەن ەڭبەگى ءۇشىن» مەدالىمەن ماراپاتتالعاندار), «باتىر انا», «التىن القا», «كۇمىس القا» توسبەلگىلەرىمەن ماراپاتتالعاندارعا جانە ءى توپتاعى كورۋ قابىلەتى ناشار زاعيپ جاندارعا تەگىن تاراتىلادى.
م.يساحوۆتىڭ ايتۋىنشا, جاڭا جۇيە جالپى تالداۋ جۇمىستارىن جۇرگىزۋگە مۇمكىندىك بەرەدى. كولىك كومپانيالارى تابىسىن ايقىنداۋ ارقىلى نەسيە الۋى دا قولجەتىمدى بولا تۇسەدى. قاراپايىم حالىققا دا, مەملەكەتكە دە, اكىمدىككە دە, كومپانياعا دا قولايلى جوبا.
قالا باسشىسىنىڭ ورىنباسارى كارتانى ساتىپ الۋ ارقىلى ءاربىر تۇرعىن قوعامدىق كولىك سالاسىن جاڭعىرتۋعا ۇلەس قوساتىنىن اتاپ ءوتتى. جاڭا جوبانى قولدانۋ اياسى كەڭەيىپ جاتسا, جۇيە ودان ءارى دامي بەرمەك.
كومپانيا جەتەكشىسى سەرجان زيابەك ۇلىنىڭ مالىمدەۋىنشە, بۇل جوبا بۇگىندە اتىراۋ قالاسىندا ىسكە اسۋدا. قازىرگى تاڭدا شىمكەنتتە جوبا بويىنشا 22 ادام جۇمىس ىستەۋدە. بولاشاقتا 30 ادام جۇمىسپەن قامتىلماق. تولەم كارتالارى 1 قازاندا ساتىلىمعا شىقتى. بۇگىندە سمارتفون پايدالانۋشىلارىنا ارنالعان «Open Shymkent» موبيلدىك قوسىمشاسى ازىرلەندى. تۇرعىندارعا ءتيىستى مالىمەت بەرۋ ءۇشىن 4 وپەراتورى بار CALL-ورتالىعى جۇمىس ىستەۋدە.
مارتوبە باسىندا كەلەشەك ۇرپاققا امانات جولداندى
شىمكەنت قالاسىنىڭ قاراتاۋ اۋدانىنا قاراستى سايرام تۇرعىن الابىنان قارامۇرت اۋىلىنا قاراي شىعابەرىس جولدىڭ سول جاق بەتىندە مارتوبە كەشەنى ورنالاسقان. بۇل توبە – ءVىى-ءحىى عاسىرلارداعى قالاشىقتىڭ ورنى. 20ح30 م ولشەمدى تسيتادەل. بيىكتىگى – 6-7 م, توبەسى تەگىس.
مۇندا ءحVىى عاسىردا بيلىك باسىنا كەلگەن ەسىم حاننان باستاپ, ءحVىىى عاسىرداعى تاۋكە حان تۇسىنا دەيىن التى الاشتىڭ بالاسى باس قوسىپ, بيلەر كەڭەس قۇرعان. «ەسىم حاننىڭ ەسكى جولى» جانە «جەتى جارعى» دا وسى ماڭدا تالقىعا ءتۇسىپ, جاريالانعان. «جەتى جارعىنى» قابىلدار ساتتە قازاقتىڭ اتاقتى بي-شەشەندەرىنەن 12 بي, ولاردىڭ قاتارىندا تولە, قاز داۋىستى قازىبەك, ايتەكە بيلەردەن وزگە جايما, ساسىق, كوكىم بيلەر دە قاتىسقان. مارتوبەنىڭ ۇلى دالا پارلامەنتى اتالۋى وسىدان.
مىنە, وسىنداي تاريحي كەشەننىڭ قادىر-قاسيەتىن جەتە سەزىنگەن شىمكەنت قالاسىنىڭ اكىمى مۇرات ايتەنوۆ مارتوبە تاريحي كەشەنىندە كەلەر ۇرپاققا جولداۋ جازىلعان كاپسۋلا سالدى. سونداي-اق شاراعا شىمكەنت قالالىق سوتىنىڭ توراعاسى ەربول راحيمبەكوۆ, شىمكەنت قالالىق ءماسليحاتىنىڭ حاتشىسى عاني تاشقاراەۆ قاتىستى.
جيىندا ءسوز العان قالا باسشىسى بۇگىنگى ءىس-شارانىڭ ماڭىزدىلىعىنا توقتالىپ, مارتوبە ەل تاريحىندا ايرىقشا مانگە يە تاريحي ورىن ەكەنىن ايتتى.
«مارتوبە – ەلدىگىمىزدىڭ مارتەبەسىن, بىرلىگىمىزدىڭ بەرەكەسىن ايشىقتاعان جەر. بۇل اۋماقتا ايگىلى دالا پارلامەنتىنىڭ كەلەلى جيىندارى ءوتىپ, «جەتى جارعىعا» سۇيەنە وتىرىپ, تاريحتا ءىزى قالعان ماڭىزدى شەشىمدەر قابىلدانعان. قازاق تاريحى قاشاندا بىرىگۋ تاريحى بولعانىن بىلەمىز. ىشكى بىرلىگىمىزدى بەكەمدەگەن, ەلدىگىمىزدىڭ ەڭسەسىن كوتەرگەن مۇنداي قاسيەتتى ورىندار ەل جادىندا ماڭگى ساقتالماق», دەدى شاھار باسشىسى.
سوت قىزمەتكەرلەرىنىڭ كەلەشەك ۇرپاققا قالدىرعان جولداۋىندا XIV-XV عاسىرلاردان باستاۋ العان قازاق ەلىنىڭ زاڭناما تاريحى مەن ەگەمەندى ەلىمىزدىڭ بۇگىنگى زاڭ ۇستەمدىگى باياندالعان.
شاھاردا «ەكو-سانا» قالىپتاسۋدا
شىمكەنت قالاسىنىڭ اكىمى مۇرات ايتەنوۆتىڭ باستاماسىمەن قالالىق ىشكى ساياسات جانە جاستار ىستەرى جونىندەگى باسقارماسى «جاستار رەسۋرستىق ورتالىعى» ۇيىمداستىرعان «Birgemiz: Taza Alem» جالپىۇلتتىق جوباسى اياسىندا «ەكو-سانا» سەنبىلىگى ءوتتى.
اتالعان اكتسيا بارىسىندا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جانە شىمكەنت قالاسى ىشكى ساياسات جانە جاستار ىستەرى جونىندەگى باسقارماسىنىڭ باسشىسى جانار بەكتاەۆا تازالىق شاراسىنا ءوز ۇلەسىن قوسىپ, قالا تۇرعىندارىن اباتتاندىرۋ ىسىنە بەلسەنە قاتىسۋعا شاقىردى.
«شىمكەنتتە بۇگىن جاڭا قوزعالىستى باستادىق. EcoSana دەپ اتادىق. حالىقتىڭ ەكولوگيالىق ساناسىن قالىپتاستىرۋدى كوزدەيتىن قوزعالىسقا كەز كەلگەن ادام قاتىسا الادى. قاتىسۋشىلاردىڭ مىندەتتەرى – قوقىستى تەك قانا ارنايى جاشىككە تاستاۋ, جەردە جاتقان قوقىستى كورسەڭىز, قوقىس جاشىگىنە سالۋ, تازالىقتى ناسيحاتتاۋ, اپتاسىنا ءبىر ساعاتىڭىزدى قوقىس تازالاپ, اعاش ەگۋگە, باپتاۋعا جۇمساۋ. ۆەب-سايت جاساۋ قولىنان كەلەتىن مامان بولسا, كومەگىن قابىل الامىز. Ecosana.kz ۆەب-سايتىن جاساپ, تىركەلىپ, ەكولوگيالىق قوزعالىستى بۇكىل ەلگە تاراتىپ, قازاقستانىمىزدى ۇيىمىزدەي تازا ۇستاۋعا اتسالىسايىق. شىمكەنت جاستارىمەن بايدىبەك بابامىزدىڭ باسىنا جينالىپ, تابيعاتتى تازا ۇستاۋعا سەرتتەسىپ, شىمكەنت قالاسىنىڭ بىرەر كوشەسىن تۇگەل تازالاپ شىقتىق. جول جيەگىندە جاتقان سىنعان شيشا, مىجىرايعان پلاستيك بوتەلكە مەن جەلگە ۇشقان سەلدىر پاكەت, تەمەكى تۇقىلىن قول جەتكەن جەرگە دەيىن تازالاپ شىقتىق. EcoSana-نىڭ باستى ماقساتى – تازالاۋ ەمەس, لاستاماۋ. لاستاماساق, تازالاۋدىڭ دا قاجەتى جوق. قالا تۇرعىندارىنان جول-جونەكەي قوقىس تاستاماۋىن سۇرايمىز. كەلەسى سەنبىدە دە ءبىر جەرگە جينالىپ, قالانىڭ قوقىسى كوپ اۋماقتارىن تازالايمىز. جينالعان قوقىس تارازىعا تارتىلىپ, اپتا سايىن جانە اي سايىن جەڭىمپازداردى ماراپاتتاپ وتىرامىز. بۇگىنگى تازالىقتا, الدىن الا اقپارات بويىنشا مەديتسينا كوللەدجىنىڭ كومانداسى جەڭىسكە جەتتى. قازاقستانىمىزدى ۇيىمىزدەي تازا ۇستايىق!», دەدى ش.مۇقان.
سەنبىلىك اكتسياسىنا جاستار ءماسليحاتىنىڭ دەپۋتاتتارى, قالا بەلسەندىلەرى, ۆولونتەرلىك ۇيىمدار مەن جوعارى جانە ورتا ارناۋلى وقۋ ورىندارىنان 15 كوماندا جاساقتالىپ, 150-گە جۋىق بەلسەندى جاس قاتىستى. اكتسيانىڭ ماقساتى – ەكولوگيالىق ءبىلىمدى ارتتىرۋ جانە قورشاعان ورتانىڭ لاستانۋىنا جول بەرمەۋ جانە اينالانى قوقىستان تازارتۋ, سالاماتتى ءومىر سالتى مەن ەرىك-جىگەردى شىڭداۋ.
سونداي-اق ەكى ايعا جالعاساتىن اكتسيا بارىسىندا كوشپەلى تۇردە وزەن, كول جاعالاۋلارى تازالانىپ, كۇل-قوقىستار مەن باسقا دا تۇرمىستىق قالدىقتاردان تازارتىلىپ, قالانىڭ كىرەبەرىس ايماعىن, ورتالىق كوشەلەر مەن الەۋمەتتىك نىسانداردىڭ اينالاسىنداعى قوقىس قالدىقتارى شىعارىلادى.
اتالعان اكتسيا بارىسىندا ۇزدىك ۇيىمدار مەن جاستار كوشباسشىلارى ارنايى نوميناتسيالارمەن ماراپاتتالىپ, جۇلدەلى ورىندارعا باعالى سىيلىقتار تاپسىرىلادى. سەنبىلىكتە بارلىق جۇمىس سانيتارلىق-ەپيدەميالىق تالاپتاردى ساقتاي وتىرىپ جاسالادى.
دايىنداعان
نۇرشات توكەن,
«Egemen Qazaqstan»
