ەلوردانىڭ قالالىق فتيزيوپۋلمونولوگيا ورتالىعىنىڭ ديرەكتورى اننا تسەپكە باستاعان ءبىر توپ مەديتسينا قىزمەتكەرىن ەلباسى كىتاپحاناسىنىڭ ديرەكتورى ءامىرحان راحىمجانوۆ قارسى الدى. ىندەتپەن كۇرەسكەن اق حالاتتى ابزال جانداردىڭ ەرەن ەڭبەگىنە العىسىن بىلدىرگەن ءامىرحان مۇراتبەك ۇلى ولاردىڭ جۇمىستارىنا ساتتىلىك تىلەدى. جاڭا عيماراتتى ارالاۋ بارىسىندا دارىگەرلەر تاۋەلسىز ەلدىڭ قول جەتكىزگەن جەتىستىكتەرىمەن تانىسىپ, ەلباسىنىڭ ءومىر جولى مەن قىزمەتى تۋرالى مول اقپارات الدى.
«مۋزەي ەگەمەندى ەلىمىزدىڭ تاريحي جولىن ەرەكشە كرەاتيۆتى فورماتتا توپتامالار ارقىلى ۇسىنعان ەكەن. ءار جادىگەردى سۇيسىنە قارادىق. كوزدىڭ جاۋىن الاتىن مۇنداي كەرەمەت ەكسپوزيتسيادا تۇتاس شىعارماشىلىق ۇجىمنىڭ ەڭبەگى جاتىر. مۇندا تۇڭعىش پرەزيدەنت – ەلباسى ن.ءا.نازارباەۆتىڭ تاۋەلسىز قازاقستاندى قۇرۋ جولىنداعى سارابدال ساياساتى مەن ەگەمەندى ەلدى كوركەيتۋدەگى ەرەن ەڭبەگى زاماناۋي تەحنولوگيالارمەن جان-جاقتى, تەرەڭ ءارى قانىق ەتىپ كورسەتىلگەن. بىزگە وسىنداي مۇمكىندىك تۋدىرعان مەكەمە باسشىلىعىنا العىسىمىزدى بىلدىرەمىز, – دەدى قالالىق فتيزيوپۋلمونولوگيا ورتالىعىنىڭ ديرەكتورى اننا تسەپكە.
«قازاقستان-2030» ستراتەگياسىندا قازاقستان ازاماتتارىنىڭ دەنساۋلىعى, ءبىلىمى جانە ءال-اۋقاتى باستى باعىتى رەتىندە كورسەتىلگەن. اق حالاتتى ابزال جانداردى, اسىرەسە «دانانىڭ دارا جولى» زالىندا ورنالاسقان ءارتۇرلى مەديتسينالىق ورتالىقتاردان بەرىلگەن كادەسىيلار ەرەكشە قىزىقتىردى.
– جۇمىستىڭ تىعىزدىعىنا بايلانىستى كوبىنە مۇنداي دۇنيەلەردى كوگىلدىر ەكراننان عانا كورەتىنبىز. كوزبەن كورگەن بولەك ەكەن. وسى تۇستا ايتا كەتەتىن جايت, تۇڭعىش پرەزيدەنتتىڭ باستاماسىمەن نۇر-سۇلتان قالاسىندا زاماناۋي تالاپتارعا جاۋاپ بەرەتىن ءۇش يننوۆاتسيالىق مەديتسينالىق ورتالىقتى بىرىكتىرەتىن مەديتسينالىق كلاستەر قۇرىلدى. بۇگىندە University Medical Center قۇرامىنا كىرەتىن رەسپۋبليكالىق دياگنوستيكالىق ورتالىق, انا مەن بالا ۇلتتىق عىلىمي ورتالىعى جانە بالالاردى وڭالتۋدىڭ ۇلتتىق ورتالىعى حالىقتىڭ دەنساۋلىعىن جاقسارتۋ جولىندا جۇيەلى جۇمىستار جۇرگىزۋدە. مۇنىڭ ءبارى ەلدىڭ قامىن ويلاعان ەلباسىمىزدىڭ ارقاسى دەپ بىلەمىن. بۇل مۋزەيدەن ءوزىمىزدىڭ ارىپتەستەرىمىز سىيلاعان كادەسىيلاردى كورىپ, جانىم جادىراپ قالدى, – دەيدى قالالىق فتيزيوپۋلمونولوگيا ورتالىعى ديرەكتورىنىڭ ورىنباسارى جاننا داكەنوۆا.
قازاقستان حالقىنىڭ تاۋەلسىزدىك جىلدارىندا قول جەتكىزگەن جەتىستىكتەرىن باياندايتىن قورىتىندى شوۋدى تاماشالاعان دارىگەرلەر «قازاقستان ماقتانىشى» زالىنداعى ينتەراكتيۆتى الاڭدى ارالاپ, «مادەنيەت» بولىمىندەگى ۇلتتىق اسپاپتاردى ۇستاپ كورىپ, كۇمبىرلەگەن كۇي تىڭدادى. ەكسكۋرسيا سوڭىندا مەديتسينا ماماندارى كەيىنگى ەكى زالدىڭ ادام دەنساۋلىعىنا وتە پايدالى ەكەنىن ايتىپ, قالا تۇرعىندارىن مۋزەيگە كەلۋگە جانە سالاماتتى ءومىر سالتىن ساقتاۋعا شاقىردى.
