قازاقستاندىق انيماتورلار فيلمدەر مەن سەريالداردىڭ, سونىڭ ىشىندە انيماتسيالىق فيلمدەردىڭ ءىرى ءوندىرۋشىسى – امەريكالىق Netflix كومپانياسىنا ۇسىنىلاتىن «تاريح كەرۋەنى» مۋلتيپليكاتسيالىق سەريالىن شىعارۋ ءۇشىن ازىرلىكتى باستادى. جوباعا ۇلتتىق كينونى قولداۋ مەملەكەتتىك ورتالىعى دەمەۋشىلىك كورسەتەدى.
«تاريح كەرۋەنى» انيماتسيالىق سەريالى – بۇل جىبەك جولى بويىمەن كەرۋەندە ساياحاتتايتىن ءۇش قىز بەن ايداھار اتا تۋرالى قىزىقتى قيال-عاجايىپ وقيعا. بۇل الەمدە تاڭعالارلىق دۇنيە كوپ – زاماناۋي تەحنولوگيالار مەن سيقىر, ينتەرنەت پەن ۇلتتىق داستۇرلەر دە بار. سەريالدى جاساۋشىلار كىشكەنتاي كورەرمەندەرگە ورتاق ءۇي – جەر پلانەتاسى, ونىڭ نازىك ۇڭعىل-شۇڭعىلدارى مەن ەكولوگياسى ءۇشىن جاۋاپكەرشىلىكتىڭ ءمانىن جەتكىزگىسى كەلەدى.
«بۇل ءۇش قىز بەن ولاردىڭ تالىمگەر اتاسى تۋرالى قيال-عاجايىپ وقيعا. سەريالدىڭ استارىندا جاسىرىن ساباق بار – ۇلتتىق سالت-داستۇرلەردى ساقتاۋ, قوعامدا ءوزىن دۇرىس ۇستاۋ جانە بىزگە مۇرا بولىپ قالعان نارسەنى قورعاۋ. قازىر ءبىز ستسەناري جازۋدى اياقتاپ قالدىق, جوبانىڭ سوڭعى ءستيلىن ازىرلەپ جاتىرمىز. «تاريح كەرۋەنى» YouTube پلاتفورماسىندا جانە ستريمينگ-سەرۆيستەردە ورنالاستىرىلادى دەگەن جوسپارىمىز بار. بۇل ءمۋلتفيلمدى Netflix كومپانياسىنا ساتۋ جانە ولاردىڭ رەسۋرستارىندا پايدا بولاتىن قازاقستاننىڭ العاشقى انيماتسيالىق سەريالىنا اينالۋ ءبىزدىڭ ءورشىل جوسپارىمىزدىڭ ءبىرى. سوندىقتان قازىر باسقا جوبالاردىڭ ستيليستيكاسىن ەگجەي-تەگجەيلى زەرتتەپ وتىرمىز. وزىندىك قالىپتاسقان فورمالارى مەن كوركەمدىك تۇجىرىمدامالارى بار ديسنەي جانە Pixar-مەن «ۆيجۋال» جاعىنان باسەكەلەسۋگە دايىندالىپ جاتقان جايىمىز بار», – دەدى جوبانىڭ جەلىلىك پروديۋسەرى ءمادي قاسىمبالا.
جوعارىدا اتاپ وتكەندەي, «ىرىسى اق قازاقستان» كومپانياسى وتاندىق انيماتسيالىق نارىقتا 2008 جىلدان بەرى جۇمىس ىستەپ كەلەدى. ولاردىڭ قورجىنىندا «بالاپان» تەلەارناسى مەن 7 ارنانىڭ تاپسىرىسى بويىنشا جاسالعان بىرنەشە انيماتسيالىق سەريال بار. سونىمەن قاتار «ىرىسى اق قازاقستان» انيماتورلارىنىڭ تۇرىك جانە شۆەيتساريالىق ارىپتەستەرىمەن جۇمىس ىستەۋدە ايتارلىقتاي تاجىريبەسى بار.
الماتى
