"ابايدىڭ ويى مەن ءسوزىن كۇللى الەمدىك اۋقىمدا مويىنداتۋ ماسەلەسىن كەڭەستەر وداعى ءالى تاراماي تۇرىپ, 1990 جىلى حالىقارالىق دەڭگەيدە كوتەرگەن ەدىك. بىراق ول كەزدە بىزگە قۇلاق اسپادى. ارينە, الدىمىزدان شىققان باستى كەدەرگى قازاقستاننىڭ دەربەس مەملەكەت ەمەستىگى ەدى. سوندىقتان اسقاق تىلەگىمىز ەگەمەندىك العاننان سوڭ عانا قابىل بولدى. ابايدى دۇنيەنىڭ داڭقتى تۇلعالارىنىڭ تىزىمىنە ەنگىزىپ, 150 جىلدىق مەرەيتويىن حالىقارالىق دارەجەدە اتاپ ءوتۋ جونىندەگى ۇسىنىسىمدى قولداعان يۋنەسكو ۇيىمىنىڭ سول ۋاقىتتاعى باس ديرەكتورى فەدەريكو مايور مىرزا كەيىننەن مەرەكەلىك سالتاناتتى شارالارعا دا ءوزى ارنايى كەلىپ قاتىستى", دەلىنگەن ماقالادا.
ونىڭ ايتۋىنشا, بۇعان دەيىن 200, 300, 500 سەكىلدى سوڭى بىرنەشە نولمەن اياقتالاتىن ساندارعا سايكەس كەلەتىن مەرەيتويلار عانا تىزىمگە ءىلىنىپ كەلگەن.
"جاس مەملەكەت ءۇشىن حالىقارالىق ۇيىم تاراپىنان مۇنداي قولداۋ كورسەتىلۋى ۇمىتىلماسى انىق. اباي مەرەيتويىنا ازىرلىك وتە قيىن-قىستاۋ كەزەڭدە قولعا الىندى. ەكونوميكالىق-الەۋمەتتىك پروبلەمالار شاش-ەتەكتەن بولىپ تۇرعانىنا قاراماستان, نار تاۋەكەلگە باردىق. ارناۋلى قاۋلى قابىلداپ, اتقارىلاتىن ءىس-شارالاردى تيەسىلى مەملەكەتتىك قۇرىلىمدار موينىنا جۇيە-جۇيەسىمەن جۇكتەدىك. مەرەيتويعا ازىرلىك جونىندەگى رەسپۋبليكالىق كوميسسيا جانە شتاب قۇرىلىپ, ونى قارجىلىق, ماتەريالدىق-تەحنيكالىق, ينفراقۇرىلىمدىق, يدەولوگيالىق, ديپلوماتيالىق, عىلىمي, مادەني تۇرعىدان قامتاماسىز ەتۋدىڭ ناقتى شارالارى بەكىتىلدى. بارلىق جۇمىستىڭ بارىسىن ءوز باقىلاۋىمدا ۇستادىم", دەدى ن.نازارباەۆ.
