«استانا» – «كاسپي» – 1:2
تۋردىڭ العاشقى ويىنى «استانا» مەن چەمپيونات دەبيۋتانتى «كاسپي» اراسىنداعى سەنساتسيالىق ماتچپەن باستالدى. فۋتبول ماماندارى, ءتىپتى قاراپايىم جانكۇيەرلەر بۇل تۋردا ەلىمىزدىڭ التى دۇركىن چەمپيونى ەش قيىندىقسىز جەڭىسكە جەتەدى دەپ ويلاعان-دى. ويتكەنى وتكەن تۋردا «استانا» 3:0 ەسەبىمەن تالدىقورعاننىڭ «جەتىسۋ» كومانداسىنىڭ تاس-تالقانىن شىعارعان. ال «كاسپي» «شاحتەردەن» 2:1 ناتيجەسىمەن جەڭىلگەن. بىراق فۋتبولدا ءبارى كۇتكەن ناتيجە بولا بەرمەيتىنى تاعى بار. «كاسپيمەن» بولعان ويىندا ماتچ بويى ۇستەمدىك تانىتقان «استانا» ءبىرىنشى تايمنىڭ 37-مينۋتىندا رۋنار مار سيگۋرونسسون سوققان گولدىڭ ارقاسىندا ەسەپتە العا شىقتى. ماتچتىڭ ەكىنشى بولىگىندە دە ويىن ەلوردا كلۋبىنىڭ باقىلاۋىندا بولعان. الايدا ەكىنشى تايمنىڭ ورتا تۇسىنا جەتكەندە «كاسپي» اينالدىرعان 4 مينۋتتا «استانا» قاقپاسىنا ەكى گول سوعىپ, بيىلعى بىرىنشىلىككە تەك ۇپاي تاراتۋ ءۇشىن قاتىسىپ جاتپاعانىن دالەلدەدى. ماتچتىڭ 71-مينۋتىندا بيليال سەباحي ەسەپتى تەڭەستىرسە, 75-مينۋتىندا ماكسيم مارۋسيچ كومانداسىنا ماڭىزدى ءۇش ۇپاي سىيلادى. جانكۇيەرلەردىڭ ەسىندە بولسا, ءبىرىنشى اينالىمدا دا «كاسپي» ءوز الاڭىندا «استاناعا» وڭايلىقپەن ۇپاي بەرمەيتىنىن اڭعارتقان-دى. «استانا» سىرت الاڭدا 3:2 ەسەبىمەن ارەڭ جەڭىسكە جەتكەن ەدى.
«قايرات» – «شاحتەر» – 1:1
«استانا» ۇپاي جوعالتقان سوڭ چەمپيوناتتا توپ باستاپ كەلە جاتقان «قايراتقا» تۋرنير كەستەسىندەگى ەڭ جاقىن باسەكەلەسىنەن ۇزاي تۇسۋگە تاماشا مۇمكىندىك تۋىپ ەدى. بىراق الماتىنىڭ كومانداسى وڭتايلى ءساتتى ءتيىمدى پايدالانا المادى. «شاحتەرمەن» سىنعا تۇسكەن «قايرات» 1:1 ەسەبىمەن تەڭ وينادى. ءبىرىنشى تايمدا ەكى كوماندا دا گول سوعۋعا تىرىسقانىمەن, بىردە-ءبىر فۋتبولشى قاقپا ساڭلاۋىن تابا المادى. تەك ەكىنشى تايمنىڭ 64-مينۋتىندا عانا العاشقى گول سوعىلدى. بۇل جولى 36 جاستاعى برازيليالىق ارداگەر فۋتبولشى ۆاگنەر لاۆ ەسەپتى اشتى. «قايراتتىڭ» جەڭىسىمەن اياقتالۋعا جاقىن قالعان ويىندا «شاحتەر» قۇرامىنان ايدوس تاتتىباەۆ مەرگەندىگىمەن كوزگە ءتۇسىپ, 82-مينۋتتا ەسەپ ايىرماسىن تەڭەستىرىپ كەتتى. وسىلايشا, ەكى كلۋب ءبىر-ءبىر ۇپاي ولجالادى.
«قايسار» – «وقجەتپەس» – 0:0
كەيىنگى ءتورت تۋردا بىردەي ناتيجە كورسەتىپ كەلە جاتقان (4 ويىننىڭ ەكەۋىندە تەڭ ءتۇسىپ, ەكەۋىندە جەڭىلگەن) «قايسار» مەن «وقجەتپەس» كلۋبتارى بۇل جولى دا ستاتيستيكالارىنا پالەندەي وزگەرىس ەنگىزگەن جوق. 90 مينۋت بويى ءۇش ۇپايعا تايتالاسقان ەكى كلۋب ماتچ سوڭىندا 1 ۇپايعا رازى بولىپ, تەڭ تارقاستى.
«ورداباسى» – «تاراز» – 1:1
بيىلعا جوسپارلانعان وڭتۇستىك دەربيىنىڭ ەكىنشى كەزدەسۋىندە جەڭىمپاز كوماندانىڭ ەسىمى انىقتالمادى. «ورداباسى» مەن «تاراز» اراسىنداعى ماتچتا گول سانى از بولدى دەمەسەڭىز, ويىن ادەتتەگىدەي تارتىستى ءوتتى. كەزدەسۋدەگى ەسەپتى 56-مينۋتتا «تاراز» ويىنشىسى گوران بركيچ اشتى. ال 77-مينۋتتا «ورداباسىنىڭ» قورعاۋشىسى ۆيكتور دميتريەنكو ەسەپتى تەڭەستىرىپ, كومانداسىن جەڭىلىستەن قۇتقارىپ قالدى. بۇل ماتچتا «تارازدىڭ» شابۋىلشىسى سەرج نيۋيادزي دا گول سوققان, بىراق ايدىن راحىمباەۆ باستاعان تورەشىلەر گول ويىننان تىس جاعدايدا سوعىلدى دەپ ەسەپتەمەي قويدى. ەكى ۇجىمنىڭ اراسىندا وتكەن العاشقى كەزدەسۋدە «تاراز» 3:2 ەسەبىمەن باسىم تۇسكەن-ءدى.
«توبىل» – «جەتىسۋ» – 2:0
«قايرات» پەن «ورداباسىنىڭ» ۇپاي جوعالتقانىن, «استانانىڭ» جەڭىلگەنىن قوستانايدىڭ «توبىلى» ءتيىمدى پايدالانىپ كەتتى. «جەتىسۋ» كومانداسىمەن وتكەن ويىندا 2:0 ەسەبىمەن جەڭىسكە جەتكەن گريگوري باباياننىڭ شاكىرتتەرى 20 ۇپايمەن تۋرنير كەستەسىندە ءۇشىنشى ورىنعا كوتەرىلىپ, چەمپيوندىق تالاسقا قوسىلدى. «توبىلدىڭ» ەكى گولىن ەكىنشى تايمدا لەگيونەرلەر دجابا كانكاۆا مەن جەرەمي مانزوررو سوققانىن ايتا كەتەيىك.
«قايرات» – «استانا» – 3:0
جەكسەنبى كۇنى ەل چەمپيوناتىنىڭ التىنشى تۋرىندا كەيىنگە شەگەرىلگەن «قايرات» پەن «استانا» اراسىنداعى «ەل-كلاسيكو» ماتچى ءوتتى. كەزدەسۋدىڭ العاشقى 20 مينۋتىندا «استانا» فۋتبولشىلارى ءتاۋىر ويىن كورسەتتى. بىراق مۇمكىندىكتەرىن ءساتتى پايدالانعان «قايرات» ويىنشىلارى ءبىرىنشى بولىپ ەسەپ اشتى. 24-مينۋتتا قىرعىزستاندىق گۇلجىگىت الىقۇلوۆ گول سوعىپ, كومانداسىن العا شىعاردى. الماتىلىقتار ەكىنشى تايمدى دا قارقىندى باستادى. العاشقى بەس مينۋتتىڭ ىشىندە ەكى گول سوعىپ, ويىن تاعدىرىن شەشىپ تاستادى. الدىمەن 46-مينۋتتا ايبول ابىكەن الىقۇلوۆتىڭ پاسىنان كەيىن كوزگە تۇسسە, 49-مينۋتتا «استانا» قورعاۋشىسى راداكوۆيچ ءوز قاقپاسىنا گول سوعىپ الدى. بۇل ساتتە دە سوققىنى گۇلجىگىت جاساعان ەدى. وسىلايشا, ءبىرىنشى «ەل-كلاسيكو» ماتچى «قايراتتىڭ» جەڭىسىمەن اقتالدى. بۇل ويىننان كەيىن «قايرات» تۋرنير كەستەسىندە 29 ۇپايمەن جەكە-دارا كوش باستادى. ال ەكىنشى ورىندا تۇرعان «استانانىڭ» ەنشىسىندە 21 ۇپاي بار.
