قۇرمەتتى اۋىل ەڭبەككەرلەرى!
بارشاڭىزدى استىق جيناۋ ناۋقانىنىڭ تابىستى اياقتالۋىمەن قۇتتىقتايمىن!
بيىلعى ەگىن ەگۋ ناۋقانى كوروناۆيرۋس پاندەمياسى سالدارىنان ەلىمىزدە جاريالانعان توتەنشە جاعدايعا بايلانىستى قيىن جاعدايدا جۇرگىزىلدى. نەگىزگى استىق وسىرەتىن وبلىستاردا جاز ماۋسىمى جاۋىن-شاشىنسىز, قۇرعاق بولدى. كۇردەلى جاعدايدا جۇمىس ىستەۋگە تۋرا كەلدى.
سوعان قاراماستان, ەلىمىزدىڭ ەگىنشىلەرى ۇيىمشىلدىق تانىتىپ, اۋىل شارۋاشىلىعى داقىلدارىن ەگۋدى ۋاقىتىلى اياقتادى. ناتيجەسىندە قامبالارىمىز استىققا تولدى.
بۇگىندە ەل وڭىرلەرىندە 20 ميلليون توننا كولەمىندە استىق جينالدى. بۇل ەلىمىزدىڭ ىشكى قاجەتتىلىگىن تولىق قامتاماسىز ەتەدى, سونداي-اق, ەكسپورتتىق الەۋەتىمىزدى ارتتىرىپ, قازاقستاننىڭ استىق دەرجاۆاسى مارتەبەسىن ساقتاپ قالۋىنا مۇمكىندىك بەرەدى. ەگىن جيناۋ ناۋقانى ءبىر ايعا ەرتە اياقتالىپ, قويمالارعا ەكى ەسە كوپ استىق جينالدى.
بيىلعى جينالعان استىقتىڭ ساپاسى جوعارى جانە بارلىق تالاپتارعا ساي كەلەدى.
قۇرمەتتى ديقاندار, سىزدەردىڭ قاجىرلى ەڭبەكتەرىڭىزدىڭ, اگروتەحنولوگيانى قاتاڭ ساقتاعاندارىڭىزدىڭ جانە بارلىق كۇش-جىگەرلەرىڭىزدى جۇمىلدىرا بىلگەندەرىڭىزدىڭ ارقاسىندا وسىنداي ناتيجەگە قول جەتكىزىلدى.
اۋىل ەڭبەككەرلەرىنىڭ ەڭبەكسۇيگىشتىگى مەن تاباندىلىعى اۋىلدى قايتا تۇلەتۋگە, شارۋالاردىڭ تۇرمىسىن جاقسارتۋعا زور ىقپال ەتتى.
اگروونەركاسىپ كەشەنىنىڭ مىندەتتەرىن تابىستى شەشۋدىڭ نەگىزى سىزدەردىڭ جوعارى بىلىكتىلىكتەرىڭىزگە, تاڭداعان ماماندىقتارىڭىز بەن داڭقتى داستۇرگە دەگەن ادالدىقتارىڭىزدا دەپ سەنىمدى تۇردە ايتۋعا بولادى.
قاجىرلى ەڭبەگى مەن ديقانشىلىق مىندەتكە دەگەن ادالدىعى ءۇشىن بارلىق اۋىل ەڭبەككەرلەرىنە, ارداگەرلەرگە, ءوندىرىس وزاتتارىنا ريزاشىلىعىمدى بىلدىرەمىن!
ەلىمىزدى وركەندەتۋ جولىندا جاڭا تابىستارعا جەتە بەرىڭىزدەر!
سىزدەرگە زور دەنساۋلىق, باق-بەرەكە تىلەيمىن!
