ايماقتار • 05 قازان، 2020

ەلورداعا گاز قاشان بەرىلەدى؟

27 رەت كورسەتىلدى

نۇر-سۇلتان اكىمدىگىندە "قازترانسگاز ايماق" اق ۇيىمىنىڭ وكىلدەرىمەن گاز بەرۋ جانە ۇيلەردى گازعا قوسۋ ءۇشىن تەحنيكالىق شارتتار بەرۋ بارىسى تالقىلاندى. ەلوردا اكىمى التاي كولگىنوۆ ىشكى جەلىلەردى جۇرگىزۋ جانە ۇيلەرگە گاز بەرۋ ماسەلەسىن ەرەكشە باقىلاۋعا الۋدى تاپسىردى.

"جاقىن ارادا ىشكى جەلىلەرگە گاز بەرۋدى ىسكە قوسامىز. وعان دەيىن گازبەن جابدىقتاۋ جەلىلەرىنىڭ قاۋىپسىز جانە ۇزدىكسىز جۇمىسىن قامتاماسىز ەتۋ، جەلىلەردىڭ ساپالى وتكىزىلۋىنە باقىلاۋدى كۇشەيتۋ قاجەت. جەلەزنودوروجنىي تۇرعىن الابىندا گازبەن جابدىقتاۋدى تاراتۋ جەلىلەرى 100% سالىندى، پرومىشلەننىي، كوكتال-1، كوكتال-2 تۇرعىن الاپتارىندا جۇمىستاردىڭ اياقتالۋى جاقىن. بۇل جۇمىستار اگروگورودوك پەن وڭتۇستىك-شىعىستا جۇرگىزىلۋدە. ۇيلەردى گازعا قوسىپ، تەحنيكالىق شارتتاردى الۋ ءۇشىن ءۇش تۇرعىن الابىندا فرونت-كەڭسەلەر اشىلدى. تەحنيكالىق شارتتار تەگىن بەرىلەدى. سونىمەن قاتار، جەكە سەكتوردىڭ تۇرعىندارى ءۇشىن ەسەپتەگىشتەر دە تەگىن بەرىلەدى.

ەلوردانى گازداندىرۋ - ەلباسىنىڭ تاريحي جوباسى. اۋقىمدى جۇمىس جۇرگىزىلدى، وڭتۇستىك وڭىرلەردەن ەلورداعا 1 مىڭ شاقىرىمنان استام "سارىارقا"گاز قۇبىرى سالىندى. گازداندىرۋ ەكولوگيانى جاقسارتۋعا مۇمكىندىك بەرىپ قانا قويماي، بۇل تۇرعىنداردىڭ دەنساۋلىعىنا اسەر ەتەدى. سونىمەن قاتار جەكە سەكتور تۇرعىندارىنىڭ ءومىر ءسۇرۋ جاعدايىن ايتارلىقتاي جەڭىلدەتەدى"، - دەدى ەلوردا اكىمى التاي كولگىنوۆ.

ەلوردا اكىمى التاي كولگىنوۆ ارالاۋ بارىسىندا جەو-1-ءدى گازعا كوشىرۋ بويىنشا جۇرگىزىلىپ جاتقان جۇمىستاردىڭ بارىسىمەن تانىستى. اتالعان جۇمىستار ەكى جەو-دا دا جۇرگىزىلۋدە. بيىل جەو-1 جانە جەو-2 بىرقاتار قازاندىقتارى گازعا كوشىرىلەدى. سونىمەن قاتار، جىلۋ ەلەكتر ورتالىقتارىندا جوندەۋ جۇمىستارى جۇرگىزىلدى، جەو-نىڭ ارتىقشىلىعى - ولار گازبەن دە، مازۋتپەن دە، كومىرمەن دە جۇمىس ىستەي الادى. گازداندىرۋ پروتسەسى ءۇش كەزەڭگە بولىنگەن. گازداندىرۋ بىرنەشە جىل بويى جۇرگىزىلەتىن بولادى، تۇرعىن ءۇي الاپتارى كەزەڭ-كەزەڭىمەن گازعا قوسىلاتىن بولادى. بۇل ماسەلە مەملەكەت باسشىسىنىڭ باقىلاۋىندا.

سوڭعى جاڭالىقتار

ۇقساس جاڭالىقتار