ونداعى اۋقىمدى جوبالار جالعاسىن تابادى
كەشە اقتوبە وبلىسىنىڭ اكىمى ارحيمەد مۇحامبەتوۆ قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە بريفينگ وتكىزدى. اكىم جۋرناليستەرگە وبلىستىڭ الەۋمەتتىك-ەكونوميكالىق دامۋى مەن ءوڭىردەگى مەملەكەتتىك جانە سالالىق باعدارلامالاردىڭ ىسكە اسىرىلۋى تۋرالى اڭگىمەلەدى. سونداي-اق, مەملەكەت باسشىسىنىڭ 11 قازاندا وتكەن ۇكىمەتتىڭ كەڭەيتىلگەن وتىرىسىندا ايماققا قاتىستى ايتقان سىن-ەسكەرتپەلەرىنىڭ ورىندالۋىن باياندادى.
ونداعى اۋقىمدى جوبالار جالعاسىن تابادى
كەشە اقتوبە وبلىسىنىڭ اكىمى ارحيمەد مۇحامبەتوۆ قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە بريفينگ وتكىزدى. اكىم جۋرناليستەرگە وبلىستىڭ الەۋمەتتىك-ەكونوميكالىق دامۋى مەن ءوڭىردەگى مەملەكەتتىك جانە سالالىق باعدارلامالاردىڭ ىسكە اسىرىلۋى تۋرالى اڭگىمەلەدى. سونداي-اق, مەملەكەت باسشىسىنىڭ 11 قازاندا وتكەن ۇكىمەتتىڭ كەڭەيتىلگەن وتىرىسىندا ايماققا قاتىستى ايتقان سىن-ەسكەرتپەلەرىنىڭ ورىندالۋىن باياندادى.
اقتوبە وبلىسىنداعى جالپى جاعدايمەن وقىرمان قاۋىم وڭىرگە ارنالعان بەتتەن مالىمەت الىپ, اتقارىلعان اۋقىمدى ىستەرمەن تولىق تانىسۋىنا بولادى. سوندىقتان ءبىز بريفينگتە تىلشىلەردى قىزىقتىرعان ماسەلەلەر جونىنە توقتالماقپىز. ءبىرىنشى ايتارىمىز, اقتوبە وبلىسىندا ورتاشا ايلىق ەڭبەكاقى – 93 500 تەڭگە. ءوڭىر باسشىسىنىڭ سوزىنە يلانساق, بۇل كورسەتكىش جامان ەمەس. وبلىس تۇرعىندارىنىڭ الەۋمەتتىك ءال-اۋقاتى جاقسارىپ كەلەدى. «اعىمداعى جىلدىڭ سەگىز ايىندا تۇرعىنداردىڭ جان باسىنا شاققانداعى نومينالدى اقشالاي تابىسى 7,9 پايىزعا, ورتاشا ايلىق ەڭبەكاقى 6,2 پايىزعا وسكەن. ءسويتىپ, 93 500 تەڭگەنى قۇراپ وتىر», دەدى وبلىس اكىمى. سونداي-اق, وبلىستا كەدەيلىك دەڭگەيىنەن تومەن تابىس تاباتىن تۇرعىنداردىڭ سانى 27,5 پايىزعا قىسقارىپ, جالپى سانى 284 ادامدى قۇراپتى.
سالىستىراتىن بولساق, وسىدان ەكى جىل بۇرىن اتاۋلى الەۋمەتتىك كومەك 1100 ادامعا تولەنسە, قازىر ءتورت ەسە ازايىپتى. ەكى جىل بۇرىن بۇل ماقساتقا 25 ملن. تەڭگە بولىنەدى ەكەن. قازىر ول 4 ەسەگە دەيىن قىسقارعان. وبلىس اكىمى وڭىردەگى جەتىستىكتەردى ايتا كەلىپ, ءبىلىم بەرۋ, سپورت, مادەنيەت, دەنساۋلىق ساقتاۋ سالالارىنا دا كەڭىنەن توقتالدى. اكىمنىڭ بايانداماسىنا وراي قويىلعان ساۋالدىڭ ءبىرى, قازاقستاننىڭ وزىندە 5 وبلىسپەن, سونداي-اق, رەسەي, وزبەكستانمەن شەكارالاساتىن وڭىردەگى قۇقىقتىق ءتارتىپ جانە ءدىني احۋال تۋرالى بولدى. «وبلىستا ءدىني احۋال تۇراقتى, بىرقاتار جۇمىستار اتقارىلدى. «اڭسار» وڭالتۋ-كەڭەس بەرۋ ورتالىعى اشىلدى.
ونىڭ باستى ماقساتى – تەرىس اعىمدا جۇرگەن جاستارعا تانىم-تۇسىنىك تۇرعىسىندا كومەك بەرۋ. جاستار ورتالىققا كەلىپ, بىلىمدەرىن تولىقتىرادى, ءجونى كەلسە ورتالىق ارقىلى جۇمىسقا دا ورنالاسادى. بۇگىندە 50-گە جۋىق ادام وڭالتۋدان ءوتىپ, جۇمىس تاپتى», دەدى ا.مۇحامبەتوۆ.
بۇگىندە, وبلىستا 68 ءدىني بىرلەستىك قايتا تىركەۋدەن ءوتىپتى. وڭىردەگى ءدىني احۋالدى ساۋىقتىرۋ جۇمىستارى ناتيجەلى جۇرگىزىلىپ جاتقان كورىنەدى. «مەشىتتەردى ماماندارمەن قامتاماسىز ەتتىك. ءبىلىمى جاقسى 17 يمامدى قىزمەتكە تارتتىق. ولار باسپانامەن, كولىكپەن قامتاماسىز ەتىلدى. بۇل بيۋدجەت قاراجاتى ەمەس. ولار يمامدارى جوق شاعىن اۋىلدارعا بارىپ, جۇمىس جۇرگىزەدى», دەدى وبلىس اكىمى.
وسى كۇنگە دەيىن ايماقتا دىنگە قاتىستى تانىم-تۇسىنىكتى نەگىزدەيتىن 30 مىڭ دانادان استام كىتاپ شىعارىلىپتى. وبلىستا جاستاردى دۇرىس جولعا ناسيحاتتاۋ جۇمىستارى جۇيەلى جۇرگىزىلىپ, جات اعىمدا جۇرگەن ادامدار سانى ازايىپ كەلەدى ەكەن.
اكىم مەملەكەت باسشىسىنىڭ 11 قازاندا وتكەن ۇكىمەتتىڭ كەڭەيتىلگەن وتىرىسىنداعى وڭىرگە قاتىستى سىنىنا بايلانىستى جۋرناليستەر ساۋالىنا ناقتى جاۋاپ بەردى. «اتالعان مەكتەپتەردىڭ سىيىمدىلىعى بىردەي. بىراق, باعاسى ءارتۇرلى. ونىڭ سەبەبى, مەكتەپتەردىڭ ورنالاسقان جەرىندە بولىپ وتىر. قالا ورتالىعىندا ورنالاسقان اۋداندارعا مەكتەپ سالۋ ارزانعا تۇسەدى. ويتكەنى, ينفراقۇرىلىمدار مەن قاجەتتى دۇنيەنىڭ ءبارى قاسىندا. ال, قالا سىرتىنا ينجەنەرلىك-كوممۋنيكاتسيالىق جۇيەلەردى جۇرگىزۋگە تۋرا كەلەدى. سوندىقتان, ەكى مەكتەپتىڭ قۇرىلىس باعاسىندا 60-70 ملن. تەڭگە كولەمىندە ايىرماشىلىق بولعان. مۇنى تياناقتى تەكسەرگەن كۇشتىك قۇرىلىم قىزمەتكەرلەرى ەشقانداي زاڭ بۇزۋشىلىقتى تاپپادى. وسىنداي تۇسىنىسپەۋشىلىك ورىن الماۋى ءۇشىن, الداعى ۋاقىتتا مەكتەپ سالۋ ءۇشىن سمەتا جاساعاندا ينجەنەرلىك-كوممۋنيكاتسيالىق جۇيەلەردى بولەك سمەتامەن ەسەپتەيتىن بولامىز», دەدى ءوڭىر باسشىسى.
سونداي-اق, ەلباسى ۇكىمەتتىڭ كەڭەيتىلگەن وتىرىسىندا ايتقان بالاباقشا ماسەلەسىنە دە ارنايى تۇسىنىك بەردى. «شالقار قالاسىنداعى قۇنى 75 ملن. تەڭگەلىك بالاباقشانى ەكى ەسە باعامەن ساتىپ العان ءبىلىم ءبولىمىنىڭ باستىعى جۇمىسىنان بوساتىلدى. كونكۋرستىق كوميسسيانىڭ توراعاسى جاۋاپقا تارتىلىپ جاتىر. ءىس سوتقا جىبەرىلگەن ەدى. سوت ءىستى قايتا تەرگەۋگە قايىردى. تەرگەۋ ءىسى اياقتالعان سوڭ بارلىق مالىمەتتەردى جاريالايتىن بولامىز», دەدى اكىم.
وبلىس اكىمى بۇل سىننىڭ ورىندى بولعانىن ايتىپ, بارلىق ءبىلىم بەرۋ مەكەمەلەرىنىڭ نىساندارىنا باقىلاۋ جاسالاتىنىن ءبىلدىردى.
اتالعان وبلىس باسشىسىنا بۇدان دا وزگە كوپتەگەن ساۋالدار قويىلىپ, ناقتى جاۋاپتار بەرىلدى.
نۇرباي ەلمۇراتوۆ,
«ەگەمەن قازاقستان».
