شاھار باسشىسى توعىزىنشى رەت تۇرعىندارمەن تىكەلەي ەفيردە كەزدەسىپ, قالالىقتاردىڭ وزەكتى سۇراقتارىنا جاۋاپ بەردى. قالىپتاسقان ءداستۇر بويىنشا الدىمەن ب.ساعىنتاەۆ سانيتارلىق-ەپيدەميالىق احۋالمەن تانىستىرىپ, COVID-19 پاندەمياسىنىڭ ىقتيمال ەكىنشى تولقىنىنا قالانىڭ دايىندىعى تۋرالى باياندادى.
الماتىدا دەنساۋلىق ساقتاۋ جۇيەسىنىڭ تيىمدىلىگىن ارتتىرۋ ءۇشىن بىرقاتار پارمەندى شارا قابىلدانعانى ايان. مۇندا جەدەل قىزمەت پەن العاشقى مەديتسينالىق-سانيتارلىق كومەكتىڭ جۇمىسىن كۇشەيتۋگە باسىمدىق بەرىلدى. بۇدان وزگە, اۋرۋحانالارداعى ورىن سانى بىرتىندەپ كوبەيتىلىپ جاتىر. كۆي-مەن كۇرەستە اشىلاتىن مەديتسينالىق مەكەمەلەردى ەسكەرە وتىرىپ, 7 226 ورىندى 32 ستاتسيونار دايىندالعان.
بۇرىن جوسپارلانعانداي, قازان ايىندا جالپى قۋاتتىلىعى 1 مىڭ ورىن بولاتىن جاڭا مەكەمەلەر اشىلادى. مىسالى, 500 ورىندى رۆ-90 جاڭا ينفەكتسيالىق اۋرۋحانا دايىن. 300 ورىندى ەكىنشى ءمودۋلدى ينفەكتسيالىق گوسپيتال پايدالانۋعا بەرىلەدى. بۇدان وزگە, جەكە ينۆەستيتسيالار ەسەبىنەن 215 ورىندى ەكى تولىققاندى كلينيكا قۇرىلاتىن بولادى. قالا اكىمى ينفەكتسيالىق اۋرۋحانالاردا جۇمىس ىستەيتىن كادرلاردى دايارلاۋ تۋرالى دا ايتا كەلە, قوعامدىق دامۋ باسقارماسىنا باعىنىشتى 74 ۇيىم, 20 رەسپۋبليكالىق جانە 93 جەكەمەنشىك مەديتسينالىق مەكەمەلەر بار ەكەنىن اتادى. بۇل ۇيىمداردا 38 مىڭنان استام قىزمەتكەر جۇمىس ىستەيدى.
1 تامىزداعى جاعداي بويىنشا COVID-19 ىندەتىن ەمدەۋگە دەنساۋلىق ساقتاۋ جۇيەسىنىڭ 27 ۇيىمى جۇمىلدىرىلىپ, 6 200 توسەك-ورىن قويىلدى. سول كەزدە ينفەكتسيالىق ستاتسيونارلاردا 4 035 قىزمەتكەر جۇمىس ىستەدى. دەگەنمەن, ەپيدەميالىق احۋالدىڭ تۇراقتانۋىنا بايلانىستى كوپسالالى كلينيكالار وزدەرىنىڭ ادەتتەگى جۇمىس رەجىمىنە كوشتى. كوروناۆيرۋس ينفەكتسياسىن ەمدەيتىن ەمحانالاردا قازىرگى كەزدە 93 ناۋقاس بار. وندا 400-گە جۋىق دارىگەر, مەدبيكە مەن مەديتسينالىق قىزمەتكەر جۇمىس ىستەيدى.
پاندەميانىڭ جاڭا تولقىنى پايدا بولعان جاعدايدا 5,5 مىڭ مەديتسينالىق قىزمەتكەر رەزەرۆتە تۇر. مەديتسينالىق جوعارى وقۋ ورىندارىنىڭ وقىتۋشىلارى, رەزيدەنتتەرى مەن ينتەرن-دارىگەرلەر اراسىنان رەزەرۆ قۇرىلدى, ولاردىڭ سانى 450-گە جۋىق. جاڭا كلينيكالاردى كادرلارمەن قامتاماسىز ەتۋ ءۇشىن كادرلار رەسۋرستارىن جوسپارلاۋ جانە بولجاۋ بويىنشا جۇمىستار جۇرگىزىلۋدە, جاڭادان قوسىلاتىن ينفەكتسيالىق كلينيكالاردىڭ شتاتتىق كەستەسى ەسەپتەلۋدە. مىسالى, ارنايى الەۋمەتتىك قىزمەت كورسەتۋ ورتالىعىنىڭ بازاسىندا جاڭادان اشىلعان 500 توسەكتىك ينفەكتسيالىق ستاتسيوناردىڭ جۇمىس ىستەۋى ءۇشىن شتات كەستەسىنە سايكەس 587 شتات بىرلىگى قاجەت, بۇگىندە ونىڭ كادرلارمەن جاراقتانۋى 70%-دى قۇرايدى. «حالىق ارەنا» بازاسىنداعى كلينيكادا 700-دەن استام مەديتسينا قىزمەتكەرى ىرىكتەلىپ الىندى.
جاڭادان ءارى جەدەل سالىنىپ جاتقان ءمودۋلدى ستاتسيونارعا 300 توسەك-ورىن, 280-گە جۋىق مەديتسينا قىزمەتكەرى قاجەت. بۇگىندە شتاتتىق كەستە جاسالىپ, كادرلىق رەزەرۆ اراسىنان ماماندار ىرىكتەلۋدە. قازىرگى تاڭدا مەديتسينالىق ۇيىمدارعا رەانيماتولوگ, ينفەكتسيونيست, ەپيدەميولوگ, پۋلمونولوگ سياقتى ماماندار جەتىسپەيدى.
سونىمەن قاتار قالا اكىمىنىڭ مالىمەتى بويىنشا ۇيىمداردىڭ ماتەريالدىق-تەحنيكالىق بازالارى ايتارلىقتاي كۇشەيتىلدى. ماسەلەن, 52 ۋزي اپپاراتى, 38 رەنتگەن, 269 ءوجت اپپاراتى, 5 كت, 2 مرت اپپاراتى ساتىپ الىندى. بۇلارعا قوسا, كوپسالالى مەديتسينالىق توسەكتەر, 250 توسەك جانىنداعى مونيتور, زەرتحانالىق قۇرىلعىلاردىڭ 43 بىرلىگى, 1050 وتتەگى كونتسەنتراتورى الىندى. جەدەل جاردەم قىزمەتىنىڭ اۆتوپاركى 35 اۆتوماشيناعا جاڭاردى, جىل سوڭىنا دەيىن جەدەل جاردەمنىڭ تاعى 100 كولىگى الىناتىن بولادى. ءبىرىنشى ەشەلونداعى سەگىز ستاتسيونارعا مەديتسينالىق گازدىڭ 24 مىڭ ورىندىق ورتالىقتاندىرىلعان جۇيەسى ورناتىلۋدا. 17 ستاتسيوناردا ستوكتاردى زارارسىزداندىرۋ, ال 13-ىندە مەدقالدىقتاردى ۋتيليزاتسيالاۋ جۇيەلەرى سالىنۋدا. ب.ساعىنتاەۆ مۇگەدەك جاندارعا الەۋمەتتىك قولداۋ كورسەتۋ, جۇمىسپەن قامتۋداعى الەۋمەتتىك باعدارلامالاردى ىسكە اسىرۋ جانە قولجەتىمدى ورتا قۇرۋ جونىندە قويىلعان سۇراقتارعا جاۋاپ بەردى. تۇرعىندار بۇدان وزگە جىلۋ ماۋسىمىنىڭ باستالۋى, قوعامدىق كولىك, ينجەنەرلىك ينفراقۇرىلىمدار مەن جولداردىڭ سالىنۋى تۋرالى ساۋالدارىنا جاۋاپ الدى.
تىكەلەي ەفيردىڭ الدىڭعى سەگىز باعدارلاماسى بارىسىندا قالا اكىمى 129 سۇراققا جاۋاپ بەردى. سونداي-اق «الماتى» تەلەارناسىنىڭ Akimat Live باعدارلاماسىنىڭ تىكەلەي ەفيرى رەداكتسياسىنا تۇسكەن 226 سۇراققا ناقتىلى جاۋاپتار بەرىلىپ, ولار اتالعان تەلەارنا سايتىندا, «ۆەچەرني الماتى» جانە «الماتى اقشامى» گازەتتەرىندە جاريالاندى.
الماتى
