ءبىر كەرەمەتى, وتانداستارىمىزدىڭ دەنى العاشقى اينالىمدا الەمدىك رەيتينگتە وزدەرىنەن الدەقايدا جوعارى تۇرعان ويىنشىلارمەن كۇش سىناسقانىنا قاراماستان, شەبەرلىكتىڭ شىنايى ۇلگىسىن كورسەتتى. اسىرەسە ەرلەر ەرلەردى. اتر تىزىمىندە 56 ورىندا تۇرعان الەكساندر بۋبليك فرانتسيالىق گاەل مونفيسپەن شەبەرلىك بايقاستى. بىردەن ايتا كەتەيىك, ول قاتارداعى كوپ تەننيسشىلەردىڭ ءبىرى ەمەس. بۇگىنگى تاڭدا الەمنىڭ توعىزىنشى راكەتكاسى اتانىپ وتىرعان مونفيس كەزىندە رولان گارروس پەن اقش-تىڭ اشىق بىرىنشىلىگىنىڭ جارتىلاي فينالىنا دەيىن جەتىپ, اتر تۋرنيرلەرىندە 10 مارتە توپ جاردى. دەسەك تە قارسىلاسىنىڭ اتاعىنان ەش قايمىقپاعان بۋبليك بۇل باسەكەدە 6:4, 7:5, 3:6, 6:3 ەسەبىمەن باسىمدىق تانىتتى. ۇزدىكتەر تىزىمىندە 87 ساتىعا جايعاسقان ميحايل كۋكۋشكين الەمنىڭ 15-ءشى راكەتكاسى, توعىز بىردەي ءدۇبىرلى دودادا دارالانعان يتاليالىق ساقا سپورتشى فابيو ءفونينيدىڭ وسال تۇسىن وڭاي تاپتى – 7:5, 3:6, 7:6, 6:0.
ايەلدەر سايىسىندا يۋليا پۋتينتسەۆا (27 ورىن) بەلگيالىق كريستين فليپكەنستىڭ (80 ورىن) تاس-تالقانىن شىعاردى – 6:1, 6:2. ەلەنا رىباكينا (18 ورىن) رۋمىنيالىق سورانا كىرستيانى (83 ورىن) قاپى قالدىردى – 6:0, 6:3. تانىمال شەتەلدىك ويىنشىلاردىڭ قازىرگى قارقىنى ءبىراز باسەڭدەگەنىمەن, كەزىندە ولاردىڭ تالاي ءدۇبىرلى دودالاردا ابدەن ىسىلىپ, ەلەۋلى تابىستارعا قول جەتكىزگەنىن جانكۇيەرلەر جاقسى بىلەدى.
بىراق قۋانىشىمىز ۇزاققا سوزىلمادى. ەكىنشى كەزەڭدە جەرلەستەرىمىز تۇگەل ۇتىلىپ, العاشقى كۇندەردەگى كوڭىل كۇيىمىز نىلدەي بۇزىلدى. ءبىر وكىنشتىسى, ولاردىڭ ۇشەۋى الەمدىك رەيتينگتە وزدەرىنەن الدەقايدا تومەن تۇرعان ويىنشىلارعا ەسە جىبەردى. اتاپ ايتساق, پۋتينتسەۆا ارگەنتينالىق ناديا پودوروسكاعا (131 ورىن) جول بەردى – 3:6, 6:1, 2:6. رىباكينا فرانتسيالىق فيونا فەررودان (49 ورىن) ۇتىلدى – 3:6, 6:4, 2:6. كۋكۋشكين يسپانيالىق پەدرو مارتينەس-پورتەرودان (105 ورىن) ايلاسىن اسىرا المادى – 3:6, 1:6, 0:6. تەك بۋبليكتىڭ عانا قارسىلاسىنىڭ دەڭگەيى وزىمەن شامالاس بولدى. ونى يتاليالىق لورەنتسو سونەگو سان سوقتىرىپ كەتتى – 6:7, 1:6, 5:7. ءسويتىپ جارىس جولىندا بىردە-ءبىر تەننيسشىمىز قالمادى.
«ۇلكەن دۋلىعا» ساناتىنا جاتاتىن جارىستاردىڭ جۇلدە قورى قوماقتى ەكەنى بارشاعا ءمالىم. بيىلعى رولان گارروستا ونىڭ مولشەرى 38 ملن ەۋرونى قۇراپ وتىر. ءبىزدىڭ سپورتشىلار پاريجدە ءساتسىز ونەر كورسەتكەندەرىنە قاراماستان, ماتەريالدىق جاعىنان پايدا تاپتى. ماسەلەن, العاشقى اينالىمنان اسا الماعان زارينا دياس 60 مىڭ ەۋرونى ءاميانىنا سالسا, ەكىنشى كەزەڭدە سۇرىنگەن يۋليا پۋتينتسەۆا, ەلەنا رىباكينا, الەكساندر بۋبليك جانە ميحايل كۋكۋشكين 84 مىڭ ەۋرونى قالتالارىنا باستى. تەننيسشىلەردى بۇل سوما قاناعاتتاندىرا ما, الدە جوق پا, ول جاعى بىزگە بەيمالىم. بىراق وزگە سپورت تۇرلەرى وكىلدەرى ءۇشىن بۇل ەداۋىر قاراجات. ال قاراپايىم حالىق ءۇشىن مول بايلىق دەپ ايتساق, ەش اعاتتىعى جوق.
ەگەر وتانداستارىمىز بۇدان دا ءتاۋىر ويناعاندا, ودان دا كوپ اقشاعا يەلىك ەتەتىن ەدى. رولان گارروستىڭ ءۇشىنشى كەزەڭىنە وتكەندەر 126 000 ەۋرونى يەلەنەدى. ءتورتىنشى اينالىمعا شىققاندار 189 000-دى ەنشىلەيدى. شيرەك فينالدا ونەر كورسەتكەندەردىڭ ەسەپشوتتارىنا 283 500 ەۋرو اۋدارىلادى. سول مەجەدەن سۇرىنبەي وتكەندەر 425 250-عا بايدى. فينالعا شىققاندار 850 500 ەۋرونى يەمدەنەدى. ال ەرلەر مەن ايەلدەر اراسىنداعى جارىستىڭ جەكەلەگەن سايىسىندا جەڭىمپاز اتانعان تەننيسشىلەرگە تيەسىلى سىياقى 1 600 000 ەۋرونى قۇرايدى. ال ونداي باق كىمدەرگە بۇيىراتىنىن الداعى كۇندەرى بىلەتىن بولامىز.
