ويلاسپاعان ءىس تەرىس ناتيجە بەرەدى

جاستاردىڭ قىرشىن كەتۋىنە انا رەتىندە قانداي باعا بەرۋگە بولادى. ءبىزدىڭ كورشىمىزدەگى ورىن العان وقيعا شىنىمەن دە جان تۇرشىكتىرەدى. ول ءوزىن ءوزى اقتايدى دەپ ايتا المايمىن. ارينە, جاعدايدىڭ سونشالىقتى ۋشىعىپ كەتۋىن الدىن الا بولجاپ ءبىلۋ دە مۇمكىن ەمەس شىعار. بىراق, ەڭ الدىمەن حالىق قامى ءبىرىنشى ورىنعا قويىلعانى ءجون ەمەس پە ەدى. قازاقستان باسشىسى ن.نازارباەۆ قىرعىزستانداعى وقيعالارعا قاتىستى سوزىندە ەگەر حالىقتىڭ جۇمىسى بولسا, وندا ولار مۇنداي قادامعا بارماس تا ەدى دەگەندەي ويىن دا ايتىپ كەتتى عوي... وسىنشاما قيراتىلعاندى ەندى قايتا قالپىنا كەلتىرۋ كەرەك. مۇلدەم ارتىق شىعىن, ارتىق جۇمىس پەن كۇش-جىگەر. ەگەر ورىن العان وقيعاعا وي جىبەرىپ قاراساق, وندا ولاردىڭ ءوز-وزدەرىن توناعاندارىن, ءبىر-ءبىرىن ولتىرگەندەرىن كورەمىز. ولاي بولسا, مۇنداي كەلەڭسىزدىك اقتاپ الىنبايدى جانە اقتالمايدى دا. كەشەگى ورىن العان جاعداي قىرعىز­ستاندى تاعى دا بىرنەشە جىلعا كەرى ىسىرىپ تاستادى. تۇرمىستىق جاعداي­لارى ناشار حالىق وسىدان 5 جىل بۇرىن دا وسىنداي توڭكەرىس ۇيىمداستىرعان-دى. ەگەر ماقساتقا كۇش كورسەتۋ ارقىلى, ون­دا دا جەكە مۇددە تۇرعىسىنان قول جەت­كىزىل­سە, وندا ناتيجەسى دە جاقسى بولماي­دى. مەن تەك قىرعىزداردا عانا ەمەس, الەمدە دە وسىنداي قاندى وقيعالار ورىن الماي-اق قويسا ەكەن دەپ تىلەيمىن. قىرعىزستانداعى وقيعالاردىڭ الدىن الۋعا بولار ما ەدى دەگەن كەزدە بولادى دەپ ايتۋعا نەگىز بار. ويتكەنى, قازاق­ستانعا جۇمىس ىستەۋگە كەلگەن قىرعىزدار­دان ءوز الەۋمەتتىك تۇرمىس­تارىن جاقسار­تۋعا دەگەن تالپىنىستارىن كورۋگە بولا­دى. ال ءوز ەلدەرىندە ونداي مۇمكىندىك تە جوق. بىزبەن سالىستىرعاندا, ازىق-ت ۇلىك ارزان دەپ جاتادى. ونىڭ سەبەبى تۇسىنىكتى, ويتكەنى, ونداعى جالاقى ماردىمسىز. قازاقتا “ەلدىڭ باعىن اشپاسا, ەر مۇراتقا جەتەر مە, ەردىڭ ساعىن سىن­دىر­سا, ەل مۇراتقا جەتەر مە” دەگەن كەرە­مەت ءبىر ماقال بار. مىنە, وسى ماقال ءدال وسى وقيعاعا ورايلاس ايتىلعانداي. پرەزيدەنت پەن حالىق ءبىر-ءبىرىن جاقسى تۇسىنۋلەرى ءارى ءبىر-ءبىرىن قولداۋلارى كەرەك. بولماشى­دان شي شىعاتىن زاماندا ءاربىر قيمىلدى ويلانىپ بارىپ جاساماساق, وندا ونىڭ وتەمى قىمباتقا تۇسەدى. ليۋدميلا حوچيەۆا, پارلامەنت ءماجىلىسىنىڭ دەپۋتاتى.