بيىلعى اۋا رايى ءداندى داقىلدىڭ ويداعىداي ءوسىپ-جەتىلۋىنە قولايلى بولا قويمادى. جاز ماۋسىمىندا اپتالاپ اپتاپ ىستىق تۇرىپ الدى. وتكىنشى نوسەردىڭ ورەكپىپ كەلىپ اندا-ساندا ءبىر بۇركىپ وتكەن بولماسا, ماندىتىپ جاڭبىر دا جاۋماي قويدى.
"سوعان قاراماستان, سالانى تسيفرلاندىرۋ ارقىلى جانە جەتىلگەن جەر يگەرۋ تەحنولوگياسىنىڭ ناتيجەسىندە جەر قىرتىسىندا استىققا جەتكىلىكتى مولشەردە ىلعال ساقتالىپ, وبلىستىڭ اۋىلشارۋاشىلىق قۇرىلىمدارى 4,1 ملن توننا استىق باستىرىپ الدى. بيىلعى ءونىم شىعىمى ورتاشا ەسەپپەن گەكتارىنا 10,2 تسەنتنەردەن كەلەدى. جالپى ءونىمنىڭ كولەمى بىلتىرعى كورسەتكىشتەن 1 ملن توننا ارتىق", دەپ مالىمدەدى اۋىل شارۋاشىلىعى باسقارماسى.
بۇگىنگە دەيىن وبلىس اۋماعىنا ورنالاسقان استىق قابىلداۋ مەكەمەلەرىنە 871 مىڭ توننا بيداي كەلىپ تۇسكەن. ونىڭ 82%-ى 3-سۇرىپتى بيداي. ەلەۆاتورلارعا جينالعان بيدايدىڭ 60%-دان استامىنىڭ قامىرلىلىعى 28% جانە ودان جوعارى.
وبلىستا ءوندىرىستى تسيفرلاندىرۋ مەن تەحنولوگيالىق ۇدەرىستەردى اۆتوماتتاندىرۋ ارقىلى اۋىل شارۋاشىلىعى ونىمدەرىن وڭدەۋ كاسىپورىندارى جاڭعىرتىلىپ, ءىرى زاماناۋي جاڭا وڭدەۋ كەشەندەرى ىسكە قوسىلۋدا. وسىعان بايلانىستى بيىل ورىلعان 4,1 ملن توننا استىقتىڭ 60%-دان استامى, ياعني 2,5 ملن توننا بيداي وڭدەۋگە جىبەرىلىپ, شەتەلگە 1,2 ملن توننا ۇن ەكسپورتتاۋ جوسپارلانىپ وتىر.
اۋىل شارۋاشىلىعى باسقارماسىنىڭ مالىمەتىنشە, قازىر شارۋاشىلىقتار "ازىق-ت ۇلىك كورپوراتسياسى" اق-نا فورۆاردىق ساتىپ الۋ بويىنشا بيداي تاپسىرىپ جاتىر. الداعى كوكتەمگى ەگىس ناۋقانىنا قاجەتتى 530 مىڭ توننا بيداي تۇقىمى دايىن. ديقاندار ەندى كۇزدىگىن قامداۋعا كىرىسىپ, قازىردىڭ وزىندە 1 ملن گەكتاردان استام كۇزدىك القاپقا وڭدەۋ جۇرگىزگەن.
