قوستانايداعى ءى.وماروۆ اتىنداعى قازاق دراما تەاترى ءححى ماۋسىمىن ش.ايتماتوۆتىڭ "انا - جەر انا" پوۆەسىنىڭ جەلىسىمەن قويىلعان "قۇس جولى" پرەمەراسىمەن اشىپ وتىر. درامالىق شىعارمانىڭ رەجيسسەرى – قىرعىز رەسپۋبليكاسىنىڭ ەڭبەك سىڭىرگەن قايراتكەرى نۇرلان ابدىقادىروۆ.
تەاتر ۇجىمى اتالعان تۋىندىنى اۋەلى مامىر ايىندا ساحنالاپ, جەڭىستىڭ 75 جىلدىعىنا تارتۋ ەتۋدى كوزدەگەن. الايدا كارانتين كەدەرگى بولىپ, كورەرمەن كوپتەن كۇتكەن قويىلىممەن كۇزدە عانا قاۋىشىپ وتىر.
قىرعىز رەجيسسەرى ادامزات تاريحىندا قانمەن جازىلىپ قالعان سۇراپىل سوعىستىڭ وشپەس زاردابى مەن ولشەۋسىز قايعى-قاسىرەتىن قويىلىمنىڭ باس كەيىپكەرى – تولعانايدىڭ تالايلى تاعدىرى ارقىلى شىنايى اشىپ كورسەتە بىلگەن. تولعاناي – اياۋلى جارى مەن ەندى عانا ەر جەتكەن ءۇش بىردەي ۇلى مايداندا قازا تاپقان قۇسالى انا. كوكىرەگىندەگى شەرى تاس بولىپ قاتقان باقىتسىز ايەل. جالعىز الدانىشى –جاستاي جەسىر قالعان جالعىز كەلىنى مەن كولحوزدىڭ اۋىر شارۋاسى عانا.
قويىلىم بارىسىندا سوعىس جىلدارىنداعى اۋىل تۇرمىسى مەن تىلداعى ايەلدەردىڭ جانكەشتى ەڭبەگى كورەمەننىڭ كوز الدىنان تىزبەكتەلە ءوتىپ, ساحنادا ەل باسىنا كۇن تۋعان قيىن-قىستاۋ كەزەڭدەگى ادالدىق پەن وپاسىزدىق, قاتىگەزدىك پەن سۇيىسپەنشىلىك سياقتى كەرەعار قاسيەتتەردىڭ تايتالاسى تارازى باسىنا تارتىلادى. ساحنالىق تۋىندىنىڭ كوركەمدىك شەشىمى تولعاناي انا مەن جەر انانىڭ ديالوگى ارقىلى كورىنىس تاپقان.
سپەكتاكل كەيىپكەرلەرىن كىلەڭ جاس اكتەرلار سومداعان. كوپشىلىكتىڭ كوزىنە جاس ءۇيىرتىپ, كورەرمەندەر زالىن ءالسىن-ءالسىن شىققان كۇرسىنىسكە تولتىرعان اسەرلى تۋىندىنىڭ ءساتتى ساحنالانۋىن تەاتر ارتىستەرىنىڭ شەبەرلىگىنە تەلىدىك.
جاڭا ماۋسىمنىڭ اشىلۋ سالتاناتىندا تەاتر ۇجىمىن مادەنيەت باسقارماسىنىڭ باسشىسى ەرلان قالماقوۆ قۇتتىقتادى.
"جەتى ايدان ارتىق ۇزىلىستەن كەيىن ءارتىس پەن كورەرمەن قايت قاۋىشقان تاماشا كەش بولىر جاتىر. قاتارى جاس ماماندارمەن تولىققان تەاتر ترۋپپاسى ءوزىنىڭ جوعارى كاسىبي دەڭگەيىن تاعى ءبىر مارتە دالەلدەپ, رەپەرتۋارىن كەسەك تۋىندىمەن تولىقتىرىپ وتىر. الداعى ۋاقىتتا تەاتردىڭ 20 جىلدىق مەرەيتويىن كەڭ كولەمدە اتاپ ءوتىپ, ونەر قايراتكەرلەرىنە قۇرمەت كورسەتۋدى كوزدەپ وتىرمىز", دەدى باسقارما باسشىسى.
كورەرمەن قاۋىم ءۇزىلىس كەزىندە تاياۋدا عانا اشىلعان تەاتر مۇراجايىن تاماشالاپ, ونەر ورداسىنىڭ تاريحىمەن تانىستى.
