ۇزاق جىلدار بويى تولىمدى تاجىريبە قالىپتاستىرعان ايماقتىڭ اۋىل شارۋاشىلىعى ەڭبەككەرلەرى 5,2 ملن توننا استىق باستىردى. بۇل كورسەتكىش وتكەن جىلمەن سالىستىرعاندا, 17 پايىزعا كوپ. جازدا جاڭبىر الا-قۇلا جاۋدى. كەيبىر اۋدانداردا ءتىپتى اسپاننان ءنار تامعان جوق. كۇن ەرەسەن ىستىق بولدى. اۋا رايىنىڭ وسىنداي قولايسىز كەزىنىڭ وزىندە وبلىس بويىنشا گەكتار بەرەكەسى 11,8 تسەنتنەردەن اينالىپ وتىر. بۇل ورايداعى تابىس كولەمى دە وتكەن جىلمەن سالىستىرعاندا الدەقايدا كوپ.
–استىق ساپاسى وتكەن جىلمەن سالىستىرعاندا وتە جاقسى. 95 پايىزى ءۇشىنشى كلاستى. قازىرگى كۇنى استىق قابىلداۋ كاسىپورىندارىنا جەتكىزىلگەن ءداننىڭ قامىرلىلىعى 30 پايىزدان جوعارى. 2019 جىلى بۇل كورسەتكىش نەبارى 12 پايىز بولىپ ەدى, – دەيدى وبلىستىق اۋىل شارۋاشىلىعى باسقارماسىنىڭ باسشىسى ديماش تالاسباەۆ.
بۇگىندە ەلەۆاتورلارعا 2 ملن توننادان استام جاڭا استىق جەتكىزىلگەن. قازىر كەپتىرىلىپ, تازارتىلىپ جاتىر. ەگىن وراعىنىڭ كۇزگى جاۋىن-شاشىنعا ۇرىنباي, ۋاقىتىلى اياقتالۋىنا ماشينا-تراكتور پاركىنىڭ جاڭارتىلۋى جاقسى سەبەپ بولىپ وتىر. ماسەلەن, بيىلعى ەگىن وراعىنا سەگىز مىڭنان استام استىق جينايتىن كومبايندار قاتىستىرىلعان. ونىڭ ىشىندە جوعارى ءونىمدى شەتەلدىك تەحنيكانىڭ ۇلەسى باسىم.
وڭىردەگى استىقتى اۋدانداردىڭ ءبىرى – ساندىقتاۋ. ەگىستىك كولەمى جانە الىنعان ءونىمى جاعىنان الدىڭعى لەكتەگى ءوڭىر. اۋدان ديقاندارى ەگىن وراعىن قىسقا مەرزىمدە اياقتاپ شىقتى. گەكتار بەرەكەسى 15 تسەنتنەردەن اينالدى.
ال مايلى داقىلدار ءتۇسىمى 8,2 تسەنتنەردەن ورالىپ وتىر. ەگىن وراعىنىڭ سوڭعى اپتاسىندا ۋاقىتپەن ساناسپاي جۇمىس ىستەگەن ديقان مەحانيزاتورلار تاۋلىگىنە 15-20 مىڭ گەكتار جەردىڭ ەگىنىن جينادى.
اۋدانداعى مىقتى شارۋاشىلىقتار قاتارىنان "سۆوبودنوە", "ترۋد", "بەلگورودسكي" سەرىكتەستىكتەرىن اتاي كەتۋگە بولادى. ماسەلەن, بيىل بەلگورودتىقتار گەكتار بەرەكەسىن 26,1 تسەنتنەردەن, "كامەنكا ي د" سەرىكتەستىگى 24 تسەنتنەردەن اينالدىردى. وسى قاتاردان "پز بالكاشينسكي", "سۆوبودنوە" سەرىكتەستىكتەرى دە تابىلىپ وتىر. ديقانداردىڭ ايتۋىنا قاراعاندا, قۇرعاقشىلىق جىلى بەرەكەنىڭ مولىنان ورالۋى ەڭ الدىمەن اگروتەحنيكالىق شارالاردى دۇرىس ۇيلەستىرىلۋلەرىندە ەكەن.
بۇل شارۋاشىلىقتاردا توپىراق وڭدەۋ مادەنيەتى جىل سايىن جەتىلدىرىلىپ كەلەدى. ونىڭ ۇستىنە ورگانيكالىق جانە مينەرالدى تىڭايتقىشتاردى عىلىمي نەگىزدە پايدالانادى. ەڭ باستىسى, جوعارى ءونىمدى تۇقىم قورىن سۇرىپتاپ, كەلەر جىلعى ەگىستىڭ كەپىلى رەتىندە ساقتاۋدا.
وبلىس جيىن-تەرىمدى ابىرويمەن اياقتاپ, قازىر سۇدىگەر جىرتۋعا كىرىسۋدە. ەرتەڭنىڭ قامىن بۇگىن ويلاماسا بولا ما؟!
