مينيستر ا.تسوي كاسىبي قىزمەتىن اتقارۋ بارىسىندا دەرتتى بولعان دارىگەرلەرگە بەرىلەتىن وتەماقىنىڭ كەشىكتىرىلۋى ايماقتىق كوميسسيالاردىڭ دەرەكتەردى ساپاسىز ەنگىزۋىنە بايلانىستى ەكەنىن ايتتى.
«بۇگىنگى تاڭدا COVID-19 جانە پنەۆمونيامەن بارلىعى 12 830 مەديتسينا قىزمەتكەرى اۋىردى, ونىڭ ىشىندە 8 339 مامان كاسىبي قىزمەتى بارىسىندا اۋرۋ جۇقتىرىپ الدى. وڭىرلىك كوميسسيالار 8 265 ءوتىنىمدى قاراپ, مۇنداي جاعدايلاردىڭ 67%-ى
راستالدى. مينيسترلىكتىڭ اقپاراتتىق جۇيەسى 570 ءوتىنىمدى قابىلدامادى, ال ەڭبەك جانە الەۋمەتتىك قورعاۋ مينيسترلىگى 60 ءوتىنىمدى وڭىرلەردىڭ ساپاسىز ەنگىزۋىنە بايلانىستى قابىلدامادى. وسىلايشا قازىر وڭىرلىك كوميسسيالاردىڭ قاراۋىندا 100-گە جۋىق ءوتىنىم جاتىر. جالپى, اۋرۋ جۇقتىرعان مەديتسينالىق قىزمەتكەرلەردىڭ 88%-ى نەمەسە جاعدايى ايماقتىق كوميسسيالار دەڭگەيىندە راستالعان 3 421 مامان وتەماقى الدى. وكىنىشكە قاراي, قازاقستان ىندەتتىڭ كەسىرىنەن 182 مەديتسينا قىزمەتكەرىنەن ايىرىلدى. وڭىرلىك كوميسسيالار قايتىس بولعان دارىگەرلەردىڭ تۋىستارىنان وتەماقى الۋ بويىنشا 54 ءوتىنىمدى ماقۇلدادى. بۇل رەتتە وڭىرلەردىڭ ساپاسىز ەنگىزۋىنە بايلانىستى دەنساۋلىق ساقتاۋ مينيسترلىگىنىڭ اقپاراتتىق جۇيەسى 8 ءوتىنىمدى قابىلدامادى. جالپى بۇگىندە 42 ادامنىڭ 34-ءى وتەماقى الدى, بۇل قايتىس بولعانداردىڭ 79%-ىن قۇرادى», دەدى ا.تسوي.
سونداي-اق مينيستر ىندەتتىڭ ىقتيمال ەكىنشى تولقىنى كەزىندە دارىگەرلەردىڭ ءومىرى قالاي ساقتاندىرىلعانى, ولاردىڭ ەمدەۋ شارالارىنا دايىندىعى جونىندە ايتىپ بەردى. ەكىنشى تولقىن جاعدايىندا بۇكىل ەل بويىنشا 70 مىڭنان اسا توسەكتىك-ورىندى تەز ورنالاستىرۋعا مۇمكىندىك بار. بۇل قاتاردا 51 مىڭ توسەكتىك-ورىن جۇمىس ىستەپ تۇرعان ستاتسيونارلاردا تۇر.
ءدارى-دارمەكپەن قامتاماسىز ەتۋ ماسەلەلەرى بويىنشا بىرقاتار شۇعىل شارا قابىلداندى. COVID-19 بويىنشا 11,4 ملرد تەڭگەگە قوسىمشا ەكى ايعا جەتەتىن دارىلىك زاتتار قورى قالىپتاستىرىلدى. بارلىق وڭىردە نەعۇرلىم سۇرانىسقا يە دارىلىك زاتتار بويىنشا جالپى سوماسى شامامەن 13 ملرد تەڭگەگە تۇراقتاندىرۋ قورلارى قۇرىلدى. سونىمەن قاتار امبۋلاتوريالىق دەڭگەيدە ءدارى-دارمەكتەر ءتىزىمى كەڭەيتىلدى. دارىلىك زاتتاردىڭ 5 اتاۋىن قامتيتىن COVID-19 نوزولوگياسى ەنگىزىلدى.
ۇيدە كوروناۆيرۋستان ەمدەلۋ ءۇشىن جىل سوڭىنا دەيىن 1 ملن پاتسيەنتكە تەگىن ءدارى-دارمەك قاراستىرىلعان. حالىقتىڭ وسال توپتارىن ۆاكتسينالاۋ ءۇشىن تۇماۋعا قارسى ۆاكتسينانىڭ 2,2 ملن دوزاسى ساتىپ الىندى. ۆاكتسينالاۋ 15 قىركۇيەكتە باستالدى, بۇگىندە شامامەن 1 ملن ادام نەمەسە جوسپارلانعاننىڭ 44%-ى ەگىلدى. الدىن الا ەسەپتەۋلەر بويىنشا رەسپۋبليكادا 2,8 ملن ادام نەمەسە بارلىق حالىقتىڭ 15%-ى تەگىن ۆاكتسينالاۋدان وتەدى.
قازىرگى ۋاقىتتا ينفەكتسيالىق جانە پروۆيزورلىق ستاتسيونارلاردا 3 379 ءوجت اپپاراتى بار, قوسىمشا 2 619 بىرلىك, ونىڭ ىشىندە 1 500 وتاندىق ءوندىرىس اپپاراتى ساتىپ الىنىپ جاتىر. 21 مىڭنان اسا توسەك-ورىن وتتەگىمەن جابدىقتالعان, قازان ايىنىڭ سوڭىنا دەيىن قوسىمشا 9 مىڭعا جۋىق توسەكتىك-ورىن قامتىلادى.
