اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتى توراعاسىنىڭ مىندەتىن اتقارۋشى تۇرسىن قابدولدانوۆتىڭ ايتۋىنشا, ەكى وبلىستا جانە ءبىر رەسپۋبليكالىق قالادا قۇس تۇماۋى راستالمادى. 48 ەلدى مەكەندە كارانتيندىك شارالار بەلگىلەندى.
– سوڭعى تاۋلىكتە قۇس ءولىمىنىڭ تومەندەگەنىن بايقادىق. كارانتينگە جابىلعان ەلدى مەكەندەردە ەپيزوتياعا قارسى وتريادتىڭ 733 مامانى جۇمىس ىستەۋدە جانە 148 تەحنيكا جۇمىلدىرىلعان. جانۋارلار اراسىندا اسا قاۋىپتى اۋرۋلاردىڭ الدىن الۋ بويىنشا بەكىتىلگەن ۆەتەرينارلىق ءىس-شارالار جوسپارىنا سايكەس وسى جىلدىڭ اقپان ايىندا ەكپە جۇرگىزۋ ءۇشىن قۇس تۇماۋىنا قارسى 3,3 ملن-نان استام ۆاكتسينا ءبولىندى. سونىمەن قاتار قىركۇيەك ايىندا قۇس تۇماۋىن جۇقتىرۋ وشاقتارىن وقشاۋلاۋ ءۇشىن رەسپۋبليكالىق رەزەرۆتەن قوسىمشا 3,1 ملن دوزا قاراستىرىلدى. وسى اپتانىڭ سوڭىندا تاعى 1,3 ملن دوزا جەتكىزىلەدى. وسىلايشا, وڭىرلەرگە بەرىلەتىن دوزا كولەمى 7,7 ملن بولادى. ۆاكتسيناتسيا – وتاندىق ءونىم, تەگىن جۇرگىزىلەدى, – دەدى ت.قابدولدانوۆ ورتالىق كوممۋنيكاتسيالار قىزمەتىندە وتكەن بريفينگتە.
ونىڭ ايتۋىنشا, بۇگىندە ءماجبۇرلى ۆاكتسيناتسيا اياسىندا 8 وبلىستىڭ 424 اۋىلدىق وكرۋگىندەگى 1,7 ملن قۇسقا ۆاكتسينا سالىنعان.
– قۇس وسىرۋشىلەر وداعىمەن جانە جۇمىرتقا وندىرۋشىلەر قاۋىمداستىعىمەن كەلىسىلگەن ستراتەگيا بويىنشا رەسپۋبليكالىق بيۋدجەت ەسەبىنەن تەك انالىق قۇستارعا, سونداي-اق قۇس فابريكالارىنىڭ اينالاسىنداعى 20 شاقىرىمدىق ايماقتا ورنالاسقان جەكە اۋلاداعى قۇستارعا جانە جابايى قۇستاردىڭ ۇشۋ جولىنا پروفيلاكتيكالىق ۆاكتسيناتسيا جۇرگىزىلەدى. قولدانىستاعى ۆەتەرينارلىق زاڭناماعا سايكەس قۇس فابريكالارىنىڭ وزدەرى ۆاكتسينالاۋ جۇرگىزۋگە مىندەتتى. بۇل رەتتە برويلەر باعىتىنداعى قۇس فابريكالارى ولاردىڭ ءومىر ءسۇرۋ مەرزىمىنىڭ قىسقالىعىنا (36-40 كۇن) بايلانىستى ەكپە جۇرگىزبەيدى. ولار ءبىر تاۋلىكتىك بالاپاندار مەن ينكۋباتسيالىق جۇمىرتقانى قۇس فابريكالارىنان الادى. ال ونداعى انالىق قۇس تۇماۋعا قارسى ەگىلگەن. جۇمىرتقا باعىتىنداعى قۇس فابريكالارى تاۋىقتاردى ۆاكتسينالايدى, – دەدى ت.قابدولدانوۆ.
ستاتيستيكا كوميتەتىنىڭ رەسمي دەرەگىنە سۇيەنسەك, رەسپۋبليكادا 46,7 ملن قۇس بار. ونىڭ 14 ملن-ى جەكە اۋلالارعا تيەسىلى, قالعانى قۇس فابريكالارىنىڭ يەلىگىندە.
– بۇگىندە بۇكىل رەسپۋبليكا اۋماعىنداعى قۇستىڭ شىعىنىن ەسەپتەپ وتىرمىز. حالىق قازىر ءبىر قۇس ولسە دە بىزگە حابارلايتىن بولدى. ماسەلەن, قىزىلوردادا 12 قۇس ءولدى. ولاردان سىناما الىنىپ, زەرتحانادا تەكسەرىلەدى. زەرتحاناعا اپارعان سىنامانىڭ 50 پايىزىنان قۇس تۇماۋى انىقتالمايدى. بۇل جەردە تابيعي شىعىن دا جوق ەمەس. قازاقستاندا وسى ۋاقىتقا دەيىن قىرىلعان 588 مىڭ تاۋىق كومىلىپ, ەسەپكە الىندى. بىراق ونىڭ ىشىندە قۇس تۇماۋىنان ولگەنى – 329 651 باس. ولارعا وتەماقى تولەنەدى, – دەپ ناقتىلادى ول.
قۇس ءولىمى 7 وبلىستىڭ 99 ەلدى مەكەنىندە تىركەلگەن. جەكە اۋلالاردا 23 854 قۇستىڭ ولگەنى انىقتالدى.
ت.قابدولدانوۆ ءباسپاسوز ءماسليحاتى بارىسىندا سولتۇستىك قازاقستان وبلىسى قىزىلجار اۋدانىنىڭ ياكور اۋىلىنداعى قۇس فابريكاسىندا قىرىلعان قۇسقا قاتىستى تۇسىنىكتەمە بەردى.
– جۇمىس توبى اتالعان اۋىلداعى قۇس فابريكاسىنا بارىپ, ءمان-جايعا قانىقتى. تەكسەرىس كەزىندە انىقتالعانداي, ونداعى قۇستاردىڭ 256 مىڭى اۋا جەتپەي تۇنشىعىپ ولگەن. ياعني قۇس تۇماۋىنان ەمەس, – دەدى ت.قابدولدانوۆ.
ەسكە سالا كەتەيىك, وسى جىلدىڭ قىركۇيەك ايىندا الەم بويىنشا 26 ەلدە قۇس تۇماۋىنىڭ 429 وشاعى تىركەلدى. بۇل رەتتە, كورشىلەس رەسەيدە اۋرۋدىڭ 28 وشاعى انىقتالعان. وسىعان بايلانىستى قازاقستان ءوز تاراپىنان ومبى جانە چەليابى وبلىستارىنان قۇس جانە قۇس ونىمدەرىن اكەلۋگە, وتكىزۋگە ۋاقىتشا شەكتەۋلەر ەنگىزدى.
