جالپى, الماتى وبلىسىنىڭ جاركەنت ءوڭىرىن وتاندىق جۇگەرى شارۋاشىلىعىنىڭ وتانى دەۋگە بولادى. بيىل پانفيلوۆ اۋدانىندا 26 مىڭ گەكتاردان استام القاپقا جۇگەرى سەبىلگەن-ءدى. بۇگىندە ديقاندار «دالا ارۋى» اتانعان ءداندى داقىلدى ورىپ, قامباعا قۇيۋدا.
جىلداعىداي ەمەس, بيىل جاركەنت وڭىرىندە جاڭبىر از بولدى. كەي اۋىلداردىڭ القاپتارى قۇرعاقشىلىققا ۇشىرادى. شارۋالاردىڭ 70 گەكتار جەرگە ەككەن ءدانى كۇيىپ كەتىپتى. سوعان قاراماستان اۋدان بويىنشا 167,3 مىڭ توننا جۇگەرى جيناۋ ماقساتى تۇر. بولجام بويىنشا ءار گەكتارعا شاققانداعى ورتاشا ءتۇسىم 64,1 تسەنتنەردەن اينالۋى ءتيىس.
بيىلعى ءونىم جينالاتىن القاپ سانى جىلداعىدان ۇلعايعانىن ايتا كەتەيىك. جۇگەرىسى جايقالعان ەگىستىك كولەمى 124 گەكتارعا جەتەدى.
– كوكتەمگى ەگىس ناۋقانى پاندەميانىڭ شەكتەۋ شارالارىمەن تۇسپا-تۇس كەلىپ قالدى. الايدا قاتاڭ شارالار ديقانداردىڭ جۇمىسىنا كەرى اسەرىن تيگىزبەدى. ويتكەنى اۋىل شارۋاشىلىعىمەن اينالىساتىن سالانىڭ ەڭبەككەرلەرىن قولداۋ مەن جەڭىلدىكتەر جەتكىلىكتى دەڭگەيدە جاسالدى. ساقتىق شاراسى دا جوعارى دەڭگەيدە ءجۇردى. اسىرەسە شارۋا قوجالىقتارىنا مەملەكەت جاقسى قولداۋ كورسەتتى. تۇقىم, جانار-جاعارماي, تەحنيكامەن قامتۋدا كەدەرگى بولمادى. اۋدان بويىنشا ارزان باعامەن الىنعان 380 توننا ديزەل وتىنى دەر كەزىندە شارۋالارعا جەتتى, – دەيدى پانفيلوۆ اۋداندىق اۋىل شارۋاشىلىعى ءبولىمىنىڭ باسشىسى جۇماعازى نايمانتاەۆ.
جىل باسىنان بەرى اۋداننىڭ اۋىلشارۋاشىلىق سالاسىنا 1 ملرد 20 ملن تەڭگە ينۆەستيتسيا تارتىلعانىن اتاپ وتكەن ءلازىم. وعان 48 دانا تەحنيكا ساتىپ الىندى. «اگرارلىق نەسيە كورپوراتسياسى» ارقىلى 5 شارۋا قوجالىعى 305 ملن 955 مىڭ تەڭگەنىڭ جەڭىلدەتىلگەن نەسيەسىن السا, 44 جەكە سەرىكتەستىككە 142,4 ملن تەڭگە مولشەرىندە قوسىمشا قارجىلاي قولداۋ كورسەتىلدى.
ايتپاقشى, وبلىستا 81,8 مىڭ گەكتاردى قامتيتىن سۋارۋ جەلىلەرىن قايتا جاڭارتۋ, قايتا سالۋ, اپاتتى جاعدايدا تۇرعان سۋقويمالار مەن توعانداردى قالپىنا كەلتىرۋ جۇمىستارى جۇزەگە اسىپ جاتىر. بۇل ءوز كەزەگىندە وڭىردەگى ەگىس القاپتارىنىڭ كولەمىن ارتتىرىپ, سۋارمالى القاپتان مول ءونىم الۋعا جول اشادى.
وسى جوبانىڭ قاتارىندا بالقاش اۋدانىنداعى 7 مىڭ 481 گەكتار اۋماقتى سۋمەن جابدىقتاۋعا مۇمكىندىك بەرەتىن اقدالا ءماسسيۆىن قالپىنا كەلتىرۋ جۇمىسى دا بار ەكەن. قۋانىشتىسى, جوبا جۇزەگە اسقاننان كەيىن بالقاش وڭىرىندە كۇرىش اتىزدارىنىڭ اۋماعى قازىرگىدەن اناعۇرلىم ۇلعايۋعا ءتيىس. ويتكەنى وڭىردەگى اق مارجان وسىرەتىن بىرەگەي اۋدان – وسى بالقاش. ال قازىر اۋدان ديقاندارى كۇرىش ورىپ جاتىر.
– اۋا رايىنىڭ قولايسىزدىعىنا قاراماستان, ەڭبەكشى قاۋىم كۇن-ءتۇن دەمەي قىزۋ ەڭبەكتىڭ كورىگىن قىزدىرىپ, جۇدىرىقتاي جۇمىلا بىلۋدە. ەرتە كوكتەمدە اۋدان بويىنشا 8 861 گەكتار القاپقا كۇرىش ەگىلگەن بولسا, بۇگىنگى تاڭدا ونىڭ 2 184 گەكتارى ورىلىپ, 1 061 گەكتاردىڭ ءونىمى باستىرىلدى. كۇرىش ورۋدا وزىق تۇرعان بىرقاتار شارۋاشىلىقتى اتاپ وتسەك, «وتەس», «بىرلىك» اگروفيرمالارى, «دينارا» وندىرىستىك كووپەراتيۆى جانە «وتەس-اقدالا» سەرىكتەستىگى جوعارى ءونىم الىپ, تابىسقا قول جەتكىزىپ وتىر, – دەيدى بالقاش اۋداندىق اۋىل شارۋاشىلىعى ءبولىمىنىڭ باسشىسى بۇركىت مۇقانوۆ.
الماتى وبلىسى
