ەل ىشىنەن شىعىپ, ەلگە كومەك قولىن سوزعان جومارت جاندار جەتەرلىك. بۇل ىسكە جامبىلدىقتار دا ءبىر كىسىدەي اتسالىسىپ, جەرلەستەرىنە كومەك بەرۋدە. ماسەلەن, جۋىردا عانا ت.رىسقۇلوۆ اۋدانى, قۇلان اۋىلىنىڭ تۋماسى, بۇل كۇندە مەملەكەتتىك كۇزەت قىزمەتى باستىعىنىڭ ورىنباسارى, گەنەرال ارداق اشىمبەك ۇلى ءوزىنىڭ جانە وتباسىنىڭ اتىنان اۋداندىق ورتالىق اۋرۋحاناعا 10 ملن تەڭگەگە تۇرعىندارعا مەديتسينالىق كومەك كورسەتۋگە قاجەتتى قۇرال-جابدىقتار ساتىپ الىپ بەردى. ونىڭ ىشىندە فارماتسەۆتيكالىق توڭازىتقىش, دەزكامەرا, دوزاتور, «بوبروۆ» جابدىعى, اۋا رەتسيركۋلياتورى, جىلجىمالى كۆارتس لامپاسى, مەديتسينالىق بەتپەردەلەر مەن قولعاپتار, كوزىلدىرىكتەر جانە جەكە قورعانىش كيىمدەرى دە بار.
«كوروناۆيرۋس ىندەتىمەن كۇرەسكە ءوزىنىڭ ازاماتتىق ۇلەسىن قوسىپ كەلە جاتقان وسىنداي جومارت جانداردىڭ بار ەكەنى كوڭىلگە قۋانىش ۇيالاتادى. پاندەميا كەزىندە جەرلەستەرىنە قولۇشىن سوزىپ, دەمەۋشىلىك كورسەتكەن ازامات ارداق اشىمبەك ۇلىنا العىسىمىزدى بىلدىرەمىز. مۇنداي مەديتسينالىق قۇرال-جابدىقتار قاۋىپتى ىندەتكە شالدىققان ناۋقاستاردىڭ تەزىرەك ساۋىعۋىنا, وتباسىنا امان-ەسەن ورالۋىنا سەپتىگىن تيگىزەدى دەپ سەنەمىز», دەيدى ت.رىسقۇلوۆ اۋداندىق ورتالىق اۋرۋحاناسى باس دارىگەرىنىڭ ەمدەۋ ءىسى جونىندەگى ورىنباسارى راۋشان كوشەربەكقىزى.
جالپى, اۋداندىق اۋرۋحانا كوروناۆيرۋس ىندەتىنىڭ ەكىنشى تولقىنىنا تولىعىمەن دايىن. قۇرال-جابدىقتارى ساقاداي ساي. بۇگىندە اتالعان مەديتسينالىق نىساننان بارلىعى 200 توسەكتىك ەمدەۋ ورىندارى اشىلعان.
جامبىل وبلىسى
