كەيىنگى 3-4 جىلدا قازاقستاننىڭ دا, وزبەكستاننىڭ دا بوكسشىلارى كاسىپقوي بوكسقا بەت بۇرىپ جاتقانى بارشاعا بەلگىلى. ءتىپتى وڭتۇستىكتەگى كورشىلەرىمىزدىڭ 2016 جىلى ريو وليمپياداسىنا قاتىسقان قۇرامى وليمپيا ويىندارىنان كەيىن كاسىپقوي بوكستىڭ وتانى سانالعان اقش-قا ۇدەرە كوشتى. ەندى ءبىر ساناۋلى جىلداردان كەيىن ەكى ەلدىڭ اۋەسقوي بوكستاعى تەكەتىرەسى كاسىپقوي بوكستا دا جالعاساتىنى انىق. سونىڭ باستاماسى رەتىندە جۋىردا وتاندىق باق-تا قارسىلاستارىن كاسىبي شارشى الاڭدا قوعاداي جاپىرىپ جۇرگەن قازاقستاندىق بوكسشى باتىر جۇكەمباەۆ (18-0,14 كو) پەن وزبەكستاننىڭ ماقتانىشىنا اينالعان نوكاۋتشى شوحجاحون ەرگاشەۆ (18-0, 16 كو) قاراشا ايىندا اقش-تا جۇدىرىقتاساتىنى تۋرالى مالىمەت پايدا بولدى. وسى اقپاراتتى ەستىگەن بوكس جانكۇيەرلەرى جەكپە-جەك كۇنىن تاعاتسىزدانا كۇتىپ, وتانداسىمىزدىڭ جەڭىسكە جەتەتىنىنە سەنىم بىلدىرگەن بولاتىن.
الايدا ارادا بىرنەشە كۇن وتكەندە جۇكەمباەۆتىڭ بۇل جەكپە-جەكتەن باس تارتقانى, ونى پروموۋتەرى دە, باپكەرى دە ەكى جاقتاپ وزبەكستاندىق بوكسشىمەن جەكپە-جەك وتكىزۋگە كوندىرە الماعانى تۋرالى اقپارات كوڭىلىمىزدى كۇپتى ەتىپ قويدى. وسىدان كەيىن جانكۇيەرلەردىڭ دە پىكىرى ەكىگە ءبولىندى. ءبىرى باتىردىڭ وزبەك بوكسشىسىنان جۇرەكسىنگەنىن العا تارتسا, ەكىنشىلەرى وتانداسىمىزدى اقتاپ الەك. وسى اڭگىمەنىڭ ءىزى سۋىماي جاتىپ جۇكەمباەۆتىڭ باپكەرى قازاقستاندىق vesti.kz ينتەرنەت باسىلىمىنا كەڭ كولەمدە سۇحبات بەردى.
بەلارۋس جاتتىقتىرۋشىسى اندرەي يۆيچۋكتىڭ پىكىرىنشە, باتىر بۇل جەكپە-جەكتەن باس تارتپاعان. تەك رەسەيدەن اقش-قا (جۇكەمباەۆ بۇگىندە رەسەيدە جاتتىعۋدا – رەد) ۆيزا بەرمەي جاتقانى ءۇشىن جەكپە-جەك ۋاقىتىن كەيىنگە شەگەرۋىن سۇراعانىن ايتادى. «بىزگە ەرگاشەۆپەن جەكپە-جەك وتكىزۋگە ۇسىنىس كەلگەن كەزدە قاتتى قۋاندىق. سەبەبى بۇل باتىرعا رەيتينگتە كوتەرىلۋگە جانە چەمپيوندىق اتاققا جاقىنداۋعا جاقسى مۇمكىندىك بەرەدى. بىراق بىزدە ۆيزاعا قاتىستى ماسەلە تۋىنداپ قالدى. مەن ەلشىلىكتەگى دوستارىما قوڭىراۋ شالىپ كومەك سۇراسام دا, ولار قازىر رەسەيدەن امەريكانىڭ ەشبىر قالاسىنا ۆيزا بەرمەي جاتقانىن ايتتى. بىزگە جەكپە-جەكتى 19 قاراشادا اقش-تا وتكىزۋ ۇسىنىلدى. ەرگاشەۆ وڭاي قارسىلاس ەمەس, سوندىقتان بۇل جەكپە-جەك جاقسى دايىندىقتى قاجەت ەتەدى», دەيدى ول.
باتىر جۇكەمباەۆتى جاتتىقتىرعانعا دەيىن شوحجاحون ەرگاشەۆپەن بىرگە جۇمىس ىستەگەن اندرەي يۆيچۋك ەگەر ۆيزا بەرىلىپ, جەكپە-جەكتى ءوز ۋاقىتىندا وتكىزگەندە بۇل ايقاستا جۇكەمباەۆ ءسوزسىز جەڭىسكە جەتەتىن ەدى دەيدى.
«باتىردىڭ شوحجاحوندى جەڭەتىنىنە 100 پايىز سەنىمدىمىن. باتىر – جان-جاقتى, ايلاكەر جانە اقىلدى بوكسشى. ول وتە ءتارتىپتى, ءبارىن مۇقيات تىڭدايدى جانە ۇرىس جوسپارىن جاقسى ورىندايدى. مەن بۇل جەكپە-جەكتىڭ جاقىن ارادا بولعانىن قالايمىن. ويتكەنى مەن ەرگاشەۆپەن قالاي جۇدىرىقتاسۋ كەرەك ەكەنىن جانە ونى جەڭۋ ءۇشىن قانداي جوسپار قۇرۋ كەرەك ەكەنىن دە جاقسى بىلەمىن».
دەسە دە كاسىپقوي بوكستاعى ءبىرىنشى قازاق-وزبەك تەكەتىرەسىنىڭ وسىلايشا باستالماي جاتىپ ەرتە اياقتالعانى وتە وكىنىشتى. سوندا دا بۇل جەكپە-جەك الداعى ۋاقىتتا ۇيىمداستىرىلادى دەپ ۇمىتتەنەيىك. بىراق ايقاستان ءبىرىنشى بولىپ قازاقستاندىق بوكسشىنىڭ ءتۇرلى سەبەپ ايتىپ, جۇدىرىقتاسۋدان باس تارتقانىن كىم قالاي دەسە دە اقتاپ الۋعا كەلمەيدى. ازىرشە بۇل جەكپە-جەك تۋرالى باتىردىڭ باپكەرى عانا پىكىر ءبىلدىردى. ال ەكى بوكسشى دا ءۇنسىز.
28 جاستاعى شوحجاحون ەرگاشەۆ بۇگىنگە دەيىن كاسىپقوي بوكستا 18 جەكپە-جەك وتكىزىپ, بارلىعىندا جەڭىسكە جەتكەن. ءتىپتى 16 قارسىلاسىن مەرزىمىنەن بۇرىن ۇرىپ جىققان. قازىرگى تاڭدا ەرگاشەۆ الەمدىك رەيتينگتە 21-ورىندا تۇر. ال جۇكەمباەۆ 29-ورىنعا جايعاسقان.
