وسىعان بايلانىستى دسم ينفەكتسيانىڭ ەنۋىنە جانە تارالۋىنا جول بەرمەۋ ءۇشىن 5 قازاننان باستاپ شەت ەلدەرمەن رەيستەردىڭ قايتا باستالۋىن توقتاتا تۇرۋ, اۋە قاتىناسى قالپىنا كەلتىرىلگەن ەلدەرمەن رەيستەر سانىن ارتتىرماۋ, تۇركياعا رەيستەر سانىن ازايتۋ جونىندە ۇسىنىس ايتتى.
سونىمەن بىرگە ەكىنشى ساناتتاعى ەلدەردەن كەلەتىن ازاماتتار ءۇشىن كەلەسى تالاپتار قويىلادى. ايتالىق, تەرمومەتريا, انكەتالاۋ, كوروناۆيرۋس بويىنشا تەستتەن وتكەنى تۋرالى مەرزىمى كورسەتىلگەن (3 تاۋلىكتەن اسپايتىن) انىقتاما مىندەتتەلەدى. انىقتاما بولماعان جاعدايدا شەتەلدەن كەلگەندەر كارانتيندىك ستاتسيوناردا COVID-19-عا زەرتحانالىق تەكسەرۋ جۇرگىزۋ ءۇشىن 2 تاۋلىككە دەيىن وقشاۋلانادى.
دەنساۋلىق ساقتاۋ مينيسترلىگىنىڭ باسشىسى ينفەكتسيانىڭ تارالۋىنا جول بەرمەۋ ءۇشىن قانداي شارالار قابىلدانىپ جاتقاندىعى تۋرالى دا حابارلادى. اتاپ ايتقاندا, COVID-19 ەكىنشى تولقىنى بولۋى مۇمكىن جاعدايدا, 70 مىڭعا جۋىق توسەك-ورىنمەن جىلدام قامتۋ مۇمكىندىگى بار, قازىر ەلدە 51 مىڭعا جۋىق توسەك-ورىن قاراستىرىلعان.
ءدارى-دارمەكپەن قامتاماسىز ەتۋ بويىنشا 11,4 ملرد تەڭگەگە COVID-19 ءدارى-دارمەكتەرىنىڭ ەكى ايعا جەتەتىن قورى قالىپتاستى. بارلىق وڭىرلەردە ەڭ قاجەتتى ءدارى-دارمەكتەرگە جالپى سوماسى 13 ميلليارد تەڭگەگە تۇراقتاندىرۋ قورلارى قۇرىلدى. سونىمەن قاتار, امبۋلاتوريالىق دەڭگەيدەگى ءدارى-دارمەكتەر ءتىزىمى كەڭەيتىلدى, COVID-19 نوزولوگياسى ەنگىزىلگەن وعان 5 ءدارى-دارمەك كىرەدى.
ءوز كەزەگىندە دەنساۋلىق ساقتاۋ ۆيتسە-ءمينيسترى اجار عينيات جرۆي مەن تۇماۋمەن سىرقاتتانۋدىڭ جاعدايى تۋرالى ايتتى. ول جوعارعى تىنىس جولدارىنىڭ ۆيرۋستىق اۋرۋلارىنىڭ كوبەيۋى جىل سايىن كۇز-قىس كەزەڭىندە بايقالاتىنىن اتاپ ءوتتى. كوروناۆيرۋستىق ينفەكتسيا جاعدايىندا ەپيدەميالىق جاعداي ۋشىعۋى مۇمكىن, سوعان بايلانىستى مينيسترلىك ايماقتارمەن دايىندىق جۇمىستارىن جۇرگىزۋدە.
"وتكەن جىلمەن سالىستىرعاندا 2020 جىلدىڭ قاڭتارىنان تامىزىنا دەيىنگى كەزەڭدە جرۆي-مەن تىركەلگەندەر سانى 35,9% ءوسىپ, 2 953 511 جاعدايدى قۇرادى, بيىلعى تامىزدا تىركەلگەندەر سانى 30% -عا ازايدى. قىركۇيەك ايىنىڭ 4 اپتاسىندا جرۆي-مەن تىركەلگەندەر سانى 263 775 جاعدايدى قۇرادى, ال 2019 جىلدىڭ قىركۇيەگىندە 378 267 جاعداي تىركەلدى", - دەدى ا.عينيات.
