2021-2024 جىلدار ارالىعىندا تاعى 5,2 مىڭ شاقىرىمعا تولەم ءوندىرۋ جۇيەسىن ەنگىزۋ بويىنشا جۇمىستارى جالعاسادى. وسىلايشا 2025 جىلعا قاراي قازاقستانداعى اقىلى جولداردىڭ ۇزىندىعى 11 مىڭ شاقىرىمدى قۇراماق.
پايدالانۋدىڭ العاشقى جىلىندا, ياعني 2021 جىلى اقىلى جولداردان 25,6 ملرد تەڭگە كولەمىندە قارجى جينالادى دەپ بولجانۋدا. ال 11 مىڭ شاقىرىم جول تولىق اقىلى بولعاندا, اۆتوجولدار جىلىنا 60-72 ملرد تەڭگە تابىس اكەلمەك. بۇل سوما قازىرگى اقىلى تەلىمدەگى تاريفتەردى ەسكەرىپ ەسەپتەلگەن.
جينالعان قارجى ۋچاسكەلەردەگى اعىمدىق جوندەۋ جۇمىستارعا, جولداردى كۇتۋگە, تولەم ءوندىرۋ جۇيەسىنە قىزمەت كورسەتۋ مەن ينۆەستورعا تولەم جاساۋعا جۇمسالادى. دەمەك اقىلى جولدار ءوز شىعىنىڭ ءوزى وتەيدى. ءسويتىپ مەملەكەت بيۋدجەتىنەن قارجىلاندىرۋدى قاجەت ەتپەيدى.
ايتا كەتەيىك, جىل باسىنان بەرى "نۇر-سۇلتان-شورتاڭدى", "نۇر-سۇلتان-تەمىرتاۋ", "الماتى-قورعاس", "الماتى-قاپشاعاي" اۆتوجولدارىنان 4 ملرد تەڭگە جينالعان.
