ايماقتار • 01 قازان، 2020

نۇر-سۇلتاندا مۇعالىمدەردىڭ قۇقىعىن قورعايتىن كەڭەس جۇمىس ىستەيدى

كەڭەستىڭ باستى مىندەتى – پەداگوگيكالىق ادەپتى قامتاماسىز ەتۋ جانە ساقتاۋ، مۇعالىمدەر قۇقىقتارى بۇزىلۋىنىڭ الدىن الۋ، دەپ حابارلايدى اكىمدىكتىڭ رەسمي سايتى. بۇل تۋرالى بريفينگ بارىسىندا ءبىلىم بەرۋ سالاسىنداعى ساپانى باقىلاۋ دەپارتامەنتىنىڭ باسشىسى باعىمكۇل كوپتىلەۋوۆا مالىمدەدى. بۇل تۋرالى ەلوردا اكىمدىگىنىڭ ءباسپاسوز قىزمەتى حابارلادى.

اقمارال اعزامقىزى

"وسى جىلدىڭ تامىز ايىنان باستاپ پيلوتتىق جوبا ىسكە قوسىلىپ، كەڭەس جۇمىسى باستالدى. ونىڭ قۇرامىنا ءبىلىم بەرۋ جۇيەسىمەن تانىس بەدەلدى ادامدار مەن بىلىكتى ماماندار كىردى. بۇگىنگى تاڭدا ەرەجەلەر، جۇمىس جوسپارى مەن وتىرىستار كەستەسى بەكىتىلدى"، - دەدى باعىمكۇل كوپتىلەۋوۆا.

پاك مۇشەلەرى پەداگوگتەردىڭ رەسپۋبليكالىق تامىز كەڭەسى شەڭبەرىندە قر بعم سەسسيالىق وتىرىستارىنىڭ جۇمىسىنا بەلسەندى قاتىستى. قىركۇيەك ايىندا پەداگوگيكالىق ادەپ ماسەلەلەرى جونىندەگى كەڭەس ەلوردالىق بەس ءبىلىم بەرۋ ۇيىمىنىڭ ۇجىمدارىمەن "پەداگوگ داۋىسى" اشىق ديالوگ فورماتىندا كەزدەسۋلەر وتكىزدى. ءىس-شارا بارىسىندا مۇعالىمدەر جاعدايدى جاقسارتۋ بويىنشا ءوز پىكىرلەرىن، ۇسىنىستارىن ءبىلدىردى. الداعى ۋاقىتتا مۇنداي كەزدەسۋلەر جالعاساتىن بولادى.

"ەلوردالىق پەداگوگتار ءوز قۇقىقتارىن قورعاۋ بويىنشا كەڭەس الا الادى جانە كەڭەس مۇشەلەرىنە ءوز داۋىستارى جەتەتىندەرىنە سەنەدى. جۇمىس باستالعاننان بەرى ءوز قۇقىقتارىن قورعاۋ بويىنشا كومەك الۋ ءۇشىن بىزگە نۇر-سۇلتان مەكتەپتەرىنەن ون پەداگوگ جۇگىندى، ولاردىڭ ماسەلەلەرىن شەشىلىپ، كومەك كورسەتىلدى"، – دەپ اتاپ ءوتتى سپيكەر.

سونىمەن بىرگە، كەڭەس شاعىمداردى قاراۋ بولىمىنە اينالماۋى كەرەك دەپ باسا ايتىلدى. كەڭەستىڭ ءبىلىم بەرۋ ۇيىمدارى باسشىلارىنىڭ ەسەپتەرىن تىڭداۋعا، ءبىلىم بەرۋ سالاسىنداعى زاڭنامانى ساقتاۋ ماسەلەلەرىن قاراۋعا، مەملەكەتتىك ورگانداردان قاجەتتى اقپارات الۋعا، زاڭ نورمالارىن بۇزاتىن ادامداردى لاۋازىمنان بوساتۋ جونىندە ۇسىنىستار ەنگىزۋگە، سونداي-اق نۇر-سۇلتان اكىمىنە جۇگىنۋگە قۇقىعى بار.

پيلوتتىق جوبانى ىسكە اسىرۋ قورىتىندىسى بويىنشا، پەداگوگيكالىق ادەپ جونىندەگى كەڭەستەردى ەلىمىزدىڭ بارلىق وڭىرلىك دەپارتامەنتتەرىندە قۇرۋ جوسپارلانۋدا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز