قوعام • 01 قازان، 2020

قازاقستاندا زەينەتكەرلەردى قولداۋعا 32،6 ملرد تەڭگەدەن اسا قارجى قاراستىرىلدى

965 رەت كورسەتىلدى

2020 جىلى زەينەتاقى تولەمدەرىن قوسپاعاندا، ەگدە جاستاعى ازاماتتاردى الەۋمەتتىك قولداۋدىڭ ءتۇرلى باعىتىنا 32 ميلليارد 670 ميلليون تەڭگەدەن استام قاراجات ءبولىندى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى، - دەپ جازادى Egemen.kz

1 قازاندا قازاقستاندا قارتتار كۇنى اتاپ وتىلەدى. ەلىمىزدە 2 ميلليوننان استام زەينەتكەر تۇرادى. ءار ازاماتتىڭ لايىقتى قارتتىق شاعىن قامتاماسىز ەتۋگە قامقورلىق جاساۋ - ۇكىمەتتىڭ الەۋمەتتىك ساياساتىنىڭ باستى مىندەتتەرىنىڭ ءبىرى. مەملەكەت ازاماتتاردى زەينەتاقىمەن قامسىزداندىرۋدى جاقسارتۋ بويىنشا جۇيەلى تۇردە شارالار قابىلداپ كەلەدى.

ماسەلەن، 2020 جىلعى 1 قاڭتاردان باستاپ جىل سايىنعى يندەكستەۋ ناتيجەسىندە ىنتىماقتى زەينەتاقى مولشەرى 7%-عا ءوستى، بازالىق زەينەتاقىنىڭ ۇلعايۋى 5%-دى قۇرادى.     

مەملەكەت باسشىسىنىڭ تاپسىرماسىن ورىنداۋ ماقساتىندا، اعىمداعى جىلدىڭ 1 ساۋىرىنەن باستاپ تاعايىندالعان زەينەتاقى مولشەرى قوسىمشا تاعى 5% يندەكستەلدى. بۇل 2019 جىلعى دەڭگەيمەن سالىستىرعاندا بازالىق زەينەتاقىنىڭ 10%-عا، ىنتىماقتى زەينەتاقىنىڭ 12% -عا ءوسۋىن قامتاماسىز ەتتى.           

وسىنداي ءوسىم ناتيجەسىندە جيىنتىق زەينەتاقىنىڭ ەڭ تومەنگى مولشەرى (ىنتىماقتى+بازالىق) 58 مىڭ تەڭگەدەن اسادى، ال جوعارعى شەگى 128،5 مىڭ تەڭگەنى قۇرايدى. سونىمەن قاتار، ازاماتتار، بجزق-دان وزدەرى جيناقتاعان قاراجات ەسەبىنەن زەينەتاقى تولەمدەرىن الادى.           

قر ەڭبەك جانە حالىقتى الەۋمەتتىك قورعاۋ مينيسترلىگى اعا بۋىن وكىلدەرىنىڭ جاعدايىن جاقسارتۋ ءۇشىن 2025 جىلعا دەيىنگى "بەلسەندى ۇزاق ءومىر" ۇلتتىق ءىس-قيمىل جوسپارىن جاسادى. ونى قابىلداۋ ەگدە جاستاعى ازاماتتاردىڭ قوعامنىڭ ءتۇرلى سالالارىنا قاتىسۋ مۇمكىندىگىن كەڭەيتەدى جانە دە ولاردى مەملەكەتتىك قولداۋدىڭ ساپالى شارالارىمەن قامتاماسىز ەتەدى. ۇلت جوسپارى اياسىندا ءار ايماقتا بەلسەندى ۇزاق ءومىر ءسۇرۋ ورتالىقتارىن اشۋ جوسپارلانۋدا.           

قازىرگى ۋاقىتتا 113 ستاتسيونارلىق مەكتەپ-ينتەرناتتىڭ، جەرگىلىكتى بيۋدجەت ەسەبىنەن 58 كۇندىزگى ستاتسيوناردىڭ اۋقىمىندا 5 مىڭنان استام قارت ادام ارنايى الەۋمەتتىك قىزمەتتەرمەن قامتىلعان. ۇيدەگى الەۋمەتتىك كومەك بولىمدەرى شامامەن 52 مىڭ قارت مەن مۇگەدەككە قىزمەت كورسەتەدى.           

قارتتار كۇنى اياسىندا نۇر-سۇلتاندا، سونداي-اق اقمولا، اقتوبە، اتىراۋ، قاراعاندى، ماڭعىستاۋ، پاۆلودار، سولتۇستىك قازاقستان، تۇركىستان وبلىستارىنىڭ جەكەلەگەن اۋداندارىندا 216،7 مىڭ ادامدى قامتيتىن 2،3 ملرد تەڭگە كولەمىندە بىرجولعى قارجىلاي كومەك كورسەتىلەدى.           

جالپى، اعىمداعى جىلى، جەرگىلىكتى بيۋدجەت مۇمكىندىكتەرىن ەسكەرە وتىرىپ جانە بيزنەستىڭ الەۋمەتتىك جاۋاپكەرشىلىگى شەڭبەرىندە 15،2 ملرد تەڭگەدەن استام قاراجات ءبولىندى (ونىڭ ىشىندە جەرگىلىكتى بيۋدجەتتەن - 14،2 ملرد تەڭگە، تارتىلعان قاراجات ەسەبىنەن - ​​1 ملرد تەڭگە):           

 - ۇلى وتان سوعىسىنداعى جەڭىس كۇنىنە بىررەتتىك ماتەريالدىق كومەككە - 7،6 ملرد تەڭگە (123،6 مىڭ ادام);            

 - ازىق-ت ۇلىك سەبەتىن بەرۋگە - 1 ملرد 481،1 ملن تەڭگە (233،4 مىڭ ادام);           

 - جەڭىلدىكپەن ءدارى-دارمەكپەن قامتاماسىز ەتۋگە - 174،2 ملن تەڭگە (40،8 مىڭ ادام);           

 - ءتىستى پروتەزدەۋگە - 142،7 ملن تەڭگە (3 مىڭ ادام);           

 - شيپاجايلىق ەمدەلۋگە - 1 ملرد 362،3 ملن تەڭگە (19،5 مىڭ ادام);           

 - تۇرعىن ءۇيدى جوندەۋگە - 46،4 ملن تەڭگە (376 ادام);           

 - وتىنمەن قامتاماسىز ەتۋگە - 136،1 ملن تەڭگە (3،7 مىڭ ادام);           

 - قوعامدىق كولىكتە جەڭىلدىكپەن جۇرۋگە - 740،7 ملن تەڭگە (133،9 مىڭ ادام);           

 - كومەكتىڭ باسقا تۇرلەرىنە - 3 498،8 ملن تەڭگە (134،0 مىڭ ادام).           

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار