كوروناۆيرۋس • 01 قازان، 2020

COVID-19: قاي ەلدەردە ساقتاندىرۋ بار؟

33 رەت كورسەتىلدى

جۋىردا Freedom Finance Life كومپا­نيا­سى­نىڭ ساراپشىلارى ار­نايى زەرتتەۋ جۇر­گى­زىپ، كوروناۆيرۋستان ساق­­تاندىرۋ جۇيەسى قاي ەل­دەردە قالاي جاسال­عانى تۋرالى جاريالادى.

بىلتىرعى جەلتوقسان ايىنان باستاپ COVID-19 ۆيرۋسى الەمدەگى ەڭ باس­تى ماسەلەلەردىڭ بىرىنە اينال­عانى ءمالىم. Worldometers دەرەگى بويىن­شا قاتەرلى ۆيرۋس دۇنيە ءجۇزىنىڭ 215 ەلىنە تاراپ، 33 ملن ادامعا جۇقتى، قۇر­بان بولعانداردىڭ سانى 1 ملن-نان استى. پاندەميا كەزىندە وتاندىق جانە شەت­ەلدىك ءومىردى ساقتاندىرۋ كومپانيا­لارى جاڭا ءونىم دايىنداپ، ىسكە قوسۋدا. Freedom Finance اشىق اقپارات كوزدەرىن­دەگى مالىمەتتەردى زەرتتەي كەلە، قازاق­ستان­مەن قاتار اقش، يتاليا، فرانتسيا، تۇر­كيا، ليتۆا، ۋكراينا، رەسەي، قى­­تاي، قى­ر­عىزستان جانە باس­قا دا ەلدەردە جاڭا ساق­تان­دىرۋ جۇيەسى جاسالعانىن انىق­تادى.

اقش پاندەميانىڭ ال­عاش­قى تولقى­نى باستالىسىمەن قولدانىستاعى جۇيەگە COVID-19-دان جانە پنەۆمو­نيادان ساقتان­دىرۋدى ەن­گىزدى. ءساۋىر ايىنان باس­تاپ ساق­تاندىرۋ ءپوليسى بار ازاماتتار ءۇشىن ەمدەلۋ 21،9-38،7 مىڭ دوللارعا تۇسە­دى. بۇل سوماعا ناۋقاستار ەمحانادا 6 كۇنگە دەيىن ەمدەلە الادى. بۇدان بولەك كەڭەس بەرۋگە 34 دوللار الىناتىن تەلەمەديتسينا سەرۆيسى بار. اقش-تا ساقتاندىرۋ ءپوليسى جوق ادامدار ءۇشىن ستاتسيوناردا ءبىر اپتا ەمدەلۋ قۇنى 73،3 مىڭ دوللارعا تۇسەتىنىن ايتا كەتۋ كەرەك.

فرانتسيانىڭ ساقتاندىرۋ­شىلار فەدەراتسياسى كوروناۆيرۋستى كادۋىلگى تۇماۋعا جانە باسقا ءجيى كەزدەسەتىن رەس­پي­­­را­تور­لىق اۋرۋلارعا تەڭەس­تىرۋ­مەن شەك­تەلدى. سايكەسىنشە، كليەنتتەر ۋاقىتشا ەڭبەك ەتۋ قابىلەتىنەن ايىرىلعان ۋاقىتى ءۇشىن عانا ساقتاندىرۋ اقىسىن الادى.

پاندەميا قاتتى ءورشىپ، ادام ءولىمى كوپ تىركەلگەن يتاليادا ماماندار ساق­تان­دىرۋدىڭ بىرقاتار شارالارىن ىسكە قوستى. مىسالى، تانىمال ەۋروپالىق ساق­تاندىرۋ كومپانياسى Generali كور­پورا­تيۆتىك كليەنتتەر ءۇشىن شا­­عىن جانە ورتا بيزنەستى، سون­داي-اق ءىرى كورپوراتسيالاردى قولداۋ باعدارلاماسىن ىسكە قوس­تى. اتالعان باعدارلاما بو­يىن­شا ساقتاندىرۋ جاعدايى تۋىن­داعان كەزدە كليەنتتەر­گە ۇزاق گوسپيتاليزاتسيا كەزىن­دە تاۋلىك سايىن 100 ەۋرو مول­شەرى­ندە تولەنىپ وتىردى. وعان قوسا جانساقتاۋدان كەيىن كليەنت­تى وڭالتۋ ءۇشىن 3 مىڭ ەۋرو مول­شەرىندە جاردەماقى بەرىلەدى.

Generali ساقتاندىرۋ شارالارىنان بولەك، پاندەمياعا قارسى كۇرەسكە قولداۋ رەتىندە جالپى سوماسى 100 ملن ەۋرودان استام قارجى ءبولىپ، حالىق­ارالىق توتەنشە قور قۇرعانىن دا اتاپ وتكەن ءلازىم. اتالعان قاراجاتتىڭ 30 ملن ەۋروسى ەل حالقىنا كومەك بەرۋگە جۇمسالدى. ساقتاندىرۋ كومپانياسى­نىڭ قىزمەتكەرلەرىنە قورعا قوسقان ۇلەس رەتىندە بىرنەشە جۇمىس ساعاتىن تارتۋ ەتۋ ۇسىنىلىپ، ونى قىزمەتكەرلەر قۇلشىنا قابىلدادى.

شىلدە ايىندا ليتۆالىق ساق­تاندى­رۋشى­لار شەتەلگە شىعۋ­شى تۋريستەردى COVID-19-دان ساقتاندىرۋدى ىسكە قوس­تى. اتالعان باعدارلاماعا سايكەس كليەنت­تىڭ كوروناۆيرۋسقا شال­دىق­قانى انىق­تالسا، كومپانيالار بارلىق قاجەتتى مەدي­تسينالىق شىعىندى وتەيدى، قاجەت بولسا، ەلگە قايتۋ شىعىنىن دا جابادى. ءبىر ايتا كەتەرلىگى، ساقتاندىرۋدىڭ بارۋعا تىيىم سالىنعان ەلدەرگە قاتىسى جوق.

تۇركيادا ماۋسىم ايىندا ەلدەگى بارلىق تۋريستەردى COVID-19-دان ساقتان­دىرۋ جۇيەسى ەنگىزىلدى. پوليس قۇنى 13-23 ەۋرو شاماسىندا، ال تولەنەتىن قارجى كولەمى 2-7 مىڭ ەۋرو ارالىعىندا قۇبىلىپ تۇرادى. 1 ماۋسىمنان باستاپ ەلدىڭ بارلىق اۆياكومپانيالارى مەن اۋەجايلارىندا ءپوليستى ونلاين رەسىمدەۋگە مۇمكىندىك جاسالدى.

پاندەميا باستالعاندا ۋك­راينادا ساقتاندىرۋ تۇرىنە سۇرانىس وسكەنى انىقتالدى. ءسويتىپ ءساۋىر ايىندا 10-عا جۋىق كومپانيا COVID-19-دان ساق­تاندىرۋدى ىسكە قوستى. كومپانيالار پوليستەرىنىڭ باعاسىندا الشاقتىق كوپ – 100-1500 گريۆنا ارالىعىندا. سايكەسىنشە، تولەم قۇنى 10 مىڭ مەن 120 مىڭ گريۆنا ارالىعىندا.

كوروناۆيرۋستان ساقتاندىرۋ جۇيە­سى رەسەيدە ناۋرىز ايىنىڭ باسىندا قالىپتاسا باستادى. ەڭ ارزان پوليس باعاسى 2 مىڭ 500 رۋبلدەن باستالادى، ەڭ قىمباتى 10 مىڭ رۋبل. كوروناۆيرۋس دياگنوزى انىق­تالعان جاعدايدا كليەنتكە بەرىلەتىن تولەم 20-100 مىڭ رۋبل مولشەرىندە.

20 جىل بۇرىن قىتاي ازا­مات­تارىنىڭ ۇشتەن ءبىرىنىڭ مەديتسينالىق ساقتان­دىرۋى بولعان ەكەن. قازىر حالقى تۇگەل­گە جۋىق ساقتان­دىرىلعان. تابى­سىنا، الەۋمەتتىك مارتە­بەسىنە قاراماستان، ءار ازامات مەديتسي­نالىق قىزمەت پەن ساپالى ەم الادى. كورونا­ۆيرۋس پايدا بول­عاننان باستاپ قىتاي ۇكىمەتى بارلىق ناۋقاستىڭ تەگىن ەمدە­لەتىنىن مالىمدەدى. بۇل شارالار حالىق­تى مەديتسينالىق كومەككە ۋاقتىلى جۇگىنۋگە ىنتالاندىردى جانە باسقالارعا جۇق­تىرۋ قاۋپىن تومەندەتەدى.

قىرعىزستاندا وسى سالاداعى كومپا­نيالاردىڭ شارتتارىنا سايكەس كوروناۆيرۋستان 60 جاسقا دەيىنگى ازاماتتار 180 كۇندىك مەرزىمگە ساقتاندىرىلا الادى. پوليس باعاسى تاڭدالعان باعدارلاماعا قاراي 2 مىڭ سومنان باستالادى. ستا­تسيو­ناردا ەمدەلگەن ءار تاۋلىك ءۇشىن 1000 سوم­نان 2500 سومعا دەيىن تولەم جاسالادى.

قازاقستاندا COVID-19-دان جاپپاي ساقتاندىرۋ ءساۋىر ايىندا باستالدى. ماۋسىم ايىندا Corona Protect باع­دارلاماسى بويىنشا Freedom Finance Life ءومىردى ساقتاندىرۋ كومپانياسى باستاپقى ساقتاندىرۋ تولەمدەرىن جۇزەگە اسىردى.

اتالعان باعدارلاما بويىنشا ەڭ كوپ ساقتاندىرۋ تولەمدەرى الماتى مەن اقتاۋ قالاسىندا تولەنىپتى. Freedom Finance Life كومپانياسىندا تولەم العان ساقتاندىرىلعاندار ورتاشا ەسەپپەن – 30-50 جاستا.

Corona Protect باعدارلاماسى بو­يىنشا 5 مىڭنان استام جەكە جانە زاڭدى تۇلعالار پوليس رەسىمدەدى. ونىڭ ءپوليسى 6 اي بويى بۇكىل الەمدە قولدانىلادى. ءتيىستى تالاپ بويىنشا كليەنتتەر ەمحاناعا جاتقىزىلعان جاعدايدا قارجىلىق كومەك الا الادى. الدا-جالدا قايتىس بولعان كليەنتتەرگە تيەسىلى ساقتاندىرۋ تولەمى مۇراگەرىنە بەرىلەدى. تاڭدالعان پاكەتكە سايكەس ساقتاندىرۋ قۇنى 4900 تەڭگەدەن 24 500 تەڭگەگە دەيىن. ال تولەمدەرى 100 مىڭ تەڭگەدەن 5 ملن تەڭگەگە دەيىن بارادى.

ەرتە كوكتەمدە پاندەميانىڭ العاشقى تولقىنى كەلىسىمەن-اق قازاقستاننىڭ ىشىندەگى جانە شەت مەملەكەتتەرمەن ارا­داعى ۇشاق بايلانىستارى توقتا­تىلعانى بەلگىلى. العاشقى تولقىن وتكەن­نەن كەيىن اۋە رەيستەرى قالپىنا كەلىپ، شەتەل­گە قىدىرۋشىلار پايدا بولا باستادى. سول تۇستا تۋريستىك وپەراتورلاردىڭ بار­­لىعى ساياحاتتاۋشىلارعا مىن­دەتتى تۇردە COVID-19-دان ساق­تاندىرۋ تۋرالى تالاپ قويدى. مىندەتتى ساقتاندىرۋ كورو­ناۆيرۋستىڭ اۋىر ءتۇرىن جۇقتىرعان ءتۋريستىڭ بارلىق ەمدەۋ جانە قاتىناۋ شىعىندارىن جابادى.

 

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار