«جاستار – سەكتالارعا قارسى» اتتى اكتسيادان كەيىنگى وي
ەلۋ جىلدا ەل جاڭا دەسەك تە, ءدىن تۋرالى ايتار اڭگىمە ءوزىنىڭ وزەكتىلىگىن جويا قويعان جوق. كەرىسىنشە, ۋاقىت جىلجىپ, زامان اۋىسقان سايىن ءدىن ماسەلەسى ادامزات ساناسىندا كۇردەلى وزگەرىستەرگە ۇشىراۋدا.
«جاستار – سەكتالارعا قارسى» اتتى اكتسيادان كەيىنگى وي
ەلۋ جىلدا ەل جاڭا دەسەك تە, ءدىن تۋرالى ايتار اڭگىمە ءوزىنىڭ وزەكتىلىگىن جويا قويعان جوق. كەرىسىنشە, ۋاقىت جىلجىپ, زامان اۋىسقان سايىن ءدىن ماسەلەسى ادامزات ساناسىندا كۇردەلى وزگەرىستەرگە ۇشىراۋدا.
توقسانىنشى جىلدارى چەشەنستان, داعىستان جانە وزبەكستاندا ورىن العان ءدىني قاقتىعىستاردىڭ سيندرومى ءبىزدىڭ مەملەكەتىمىزدە دە كورىنىس تاپتى. دالالىق جولمەن جەتكەن ءداستۇرلى يسلامدى جوققا شىعارىپ وتاۋ ىشىنەن وتاۋ تىگىپ, وزدەرىن «تازا يسلام جولىندا ءجۇرمىز» دەپ سانايتىندار نەمەسە راديكالدى يسلامدى قولداۋشىلار كۇننەن-كۇنگە كوبەيىپ كەلە جاتقاندىعى بايقالادى.
كۇندەلىكتى تەلەديداردان, باسپاسوز بەتتەرىنەن, ءتىپتى, كوشەلەردەن ەستىگەن «انا بالا ۋاححابيست بولىپ كەتىپتى», «بىرەۋى اتا-اناسىنىڭ پىسىرگەن تاماعىن جەمەيدى ەكەن», «ساقال وسىرگەندەر كوبەيىپتى-ءمىس», «قازاقتار جاپپاي شوقىنىپ جاتىر» دەگەن ءاڭگىمەلەردەن جاس بۋىنىمىزدىڭ كەيبىرى ءداستۇرلى دىنىمىزدەن اۋىتقىپ, وزگەنىڭ جەتەگىندە كەتىپ جاتقانىن سەزەسىڭ. وسىلايشا, اتا-بابانىڭ ۇستانعان جولىمەن, دالالىق داستۇرمەن كەلگەن يسلام ءدىنىمىز تارماقتالىپ, سان-ساققا بولىنە باستادى. كۇن ساناپ قازاقستاندىق قوعامدا ءداستۇرلى ەمەس ءدىني اعىمدار, دەسترۋكتيۆتى كۋلت جانە وككۋلتيزم ءوزىنىڭ شەبىن نىعايتىپ, كەڭەيتە ءتۇستى. وسىدان كەيىن كوپشىلىكتىڭ كوكەيىندە «ءدىننىڭ دۇرىسى قايسى, بۇرىسى قايسى؟» دەگەن كۇماندى سۇراق قىلاڭ بەردى.
باتىس قازاقستان وبلىستىق ءدىن ىستەرى باسقارماسىنىڭ مالىمەتى بويىنشا, وبلىس تۇرعىندارىنىڭ اراسىندا جۇرگىزىلگەن ساۋالداما نەگىزىندە دىنگە مۇلدەم سەنبەيمىز دەگەندەردىڭ سانى نەبارى 8,7%-دى كورسەتكەن. ال 11,3%-ى يسلام ءدىنىنىڭ بارلىق شارتتارىن بەرىك ۇستانىپ, شاريعات جولىمەن جۇرەتىنىن جەتكىزسە, 57,5%-ى ءدىني سالت-جورالعىلاردى ۇستانباسا دا ءوزىن مۇسىلمان سانايتىندار قاتارىندا ەكەن. پراۆوسلاۆيە ءدىنىن تولىق ۇستانامىن دەيتىندەر 4,3%-دى, وزدەرىن جالپى پراۆوسلاۆيەلىك سانايتىندار 9,3%-دى, ال باسقا كونفەسسيانى تاڭداعاندار 0,4%-دى قۇراعان. بۇل كورسەتكىشتەن قازىرگى تاڭدا يماندىلىقتىڭ ءوزى قاسيەتتى قارا نان سەكىلدى ۇلكەن سۇرانىسقا يە بولىپ تۇرعانىن اڭعارۋ قيىن ەمەس. قازاقستاندا راديكالدى ءدىننىڭ نەگىزىندە ەكسترەميستىك ءىس-ارەكەتتەرگە بارعانداردىڭ جاس ءمولشەرىنە كوز سالساق, جالپى 70 پايىز ەكسترەميستەر 18-29 جاس ارالىعىنداعى جاستار ەكەندىگىن كورسەتەدى.
ءبىز الدىمەن يسلام ءدىنىنىڭ ادام بالاسىنىڭ تابيعي جاراتىلىسىمەن ۇندەسىپ جاتقاندىعىن ۇعىنۋىمىز كەرەك. ناقتى ايتار بولساق, يسلام ءدىنى – ب ۇلىكتى ەمەس, بىرلىكتى كوزدەيتىن, اقىلعا باعىناتىن جانە اقىلدى دۇرىس پايدالانا بىلۋگە ۋاعىزدايتىن, عىلىممەن اينالىسۋعا ۇندەيتىن, قوعامدىق كەلىسىمدى جانە الەۋمەتتىك تاتۋلىقتى قولدايتىن ءدىن. ەندەشە, ءوزىمىزدىڭ ءداستۇرلى ءدىنىمىزدى دۇرىس تۇسىنبەي جۇرگەندىگىمىزگە نە سەبەپ؟
ەڭ باستىسى, ۇرپاعىنا رۋحاني نەمەسە يماني تاربيە بەرەتىن الدىڭعى بۋىننىڭ ءدىني ساۋاتسىزدىعى بولىپ وتىر. بۇعان كەڭەستىك رەجىمدە بۇقارانىڭ ساناسىنا جاساندى ءتۇردە ەنگىزىلگەن اتەيزم كىنالى. ەكىنشىدەن, شەتەلدىك ميسسيونەرلەر ىقپالىنىڭ كۇشتىلىگى. كەرەك دەسەڭىز, اۋىل بالاسىنا رۋحاني جول سىلتەيتىن اۋىلدىق جەرلەردەگى يمامداردىڭ ءدىني بىلىمدەرىنىڭ ازدىعى اششى دا بولسىن شىندىق. سونداي-اق, ءباسپاسوز بەتتەرىندە, تەلەارنالاردا ءدىن تاقىرىبىندا اق-قارانى اجىراتاتىن مالىمەتتەردىڭ ءالى كۇنگە دەيىن از تاراتىلىپ, حالىق اراسىندا ءتۇسىندىرۋ جۇمىستارىنىڭ جەتىسپەۋشىلىگى جاستاردىڭ كەرىتارتپا ءدىني اعىمدارعا ىلەسىپ كەتۋىنە جول اشىپ وتىر.
ال وسىنداي كەدەرگىلەردىڭ الدىن الۋعا, ءداستۇرلى ءدىن مەن جالعان ءىلىمنىڭ اق-قاراسىن اجىراتۋعا باعىتتالعان شارالاردىڭ ىشىندە ورال وڭىرىندە كەيىنگى جىلدارى داستۇرگە اينالعان «جاستار – سەكتالارعا قارسى» اكتسياسىنىڭ الار ورنى بولەك. اتالعان شارانىڭ ناتيجەسىندە ءدىني احۋال تۇراقتالىپ, وڭدى ناتيجەلەرگە قول جەتكىزىلىپ كەلەدى.
بۇگىندە دەسترۋكتيۆتى ۇيىمداردىڭ ىقپالىنا تۇسكەن جۇزدەگەن ازامات وزدەرىن قورعاۋدى قاجەت ەتەدى. وسىعان سايكەس ەلىمىزدىڭ بارلىق وڭىرلەرىندە ءدىني اعىمداردان جاپا شەككەندەرگە كومەك ورتالىقتارى قۇرىلىپ, ولاردىڭ جاستارمەن بىرگە جۇرگىزەتىن ساۋىقتىرۋ, الدىن الۋ شارالارى جالعاسىن تابۋدا. بۇل اكتسيا ءتۇرلى اعىمداردىڭ جەتەگىندە كەتكەن جاستارعا قولۇشىن سوزۋدى, ءدىني ەكسترەميزم مەن تەرروريزمگە جول بەرمەۋدى ماقسات ەتەدى.
– ءبىز – قايماعى بۇزىلماعان قازاقتىڭ قاراپايىم, ادال, ەڭبەكقور جاستارىمىز. سوندىقتان, اتا-انانىڭ, ۇلاعاتتى ۇستازدىڭ بەرگەن تاربيەسىن ۇستانىپ, ەلدى دامىتۋعا بىرگە اتسالىسۋىمىز كەرەك. جاستاردىڭ بىلىمدەرى مىعىم, تاربيەلەرى تەرەڭ بولسا, شىرماۋعا ىلىنبەس ەدى. اتا-بابا سالتىن ساقتاۋ, ۇلكەندەر سەنىمىن اقتاۋ, اسىل دىنىمىزگە قۇرمەتپەن قاراپ, سەنىمگە سەلكەۋ تۇسىرمەۋ – بۇگىنگى ۇرپاقتىڭ پارىزى,– دەيدى باتىس قازاقستان وبلىستىق «جاستار قاۋىمداستىعى» زاڭدى تۇلعالار بىرلەستىگى توراعاسىنىڭ ورىنباسارى سەرىك توقمامبەتوۆ.
وبلىستا اتالعان اكتسيا اياسىندا جاستاردىڭ تەرىس اعىمدارعا دەگەن كوزقاراستارى مەن ۇستانىمدارىن ءبىلۋ ماقساتىندا ساۋالدامالار جۇرگىزىلىپ, تەرىس ءدىني اعىمداردىڭ كەرى اسەرلەرى تۋرالى اقپاراتتىق ماتەريالدار تاراتىلىپ وتىرادى.
ال وسى تەرىس پيعىلدى ۇيىمداردىڭ تىرناعىنا جاستارىمىز قالاي ءىلىنىپ جاتىر؟ جاۋاپ تابۋ ءۇشىن وڭىردەگى تەرىس ءدىني اعىمداردىڭ ىقپالىنان زارداپ شەگۋشىلەرگە كومەك كورسەتەتىن «جايىق» ورتالىعىنىڭ زەرتتەۋ جۇمىستارىنا دا زەر سالدىق. جالعان ۇيىمدارعا تارتۋدىڭ ەڭ وڭاي ءتاسىلى – كوشە بويىنداعى جىلتىراعى كەلىستى, كوز تىككەن ادامدى ەرىكسىز وزىنە تارتاتىن جارنامالار. ايتالىق, ەش تەكسەرۋدى قاجەت دەپ تاپپايتىن ايالدامالاردا «اقىسىز اعىلشىن ءتىلىن وقىتۋ كۋرستارى», «اقىسىز كومپيۋتەر كۋرستارى», «جوعارى اقىمەن ستۋدەنت جاستارعا جۇمىس», «پسيحولوگيالىق سەمينار-ترەنينگتەر», «فيلوسوفيالىق وقۋلار» سەكىلدى جارنامالاردىڭ كەيبىرى جالعان ۇيىمداردىڭ ءىس-ارەكەتتەرى ەكەنىنە كوپشىلىك تەرەڭ ءمان بەرە بەرمەيدى. وسىنىڭ سالدارىنان تەگىن كۋرستار مەن جوعارى جالاقى دەگەن جەلەۋدىڭ بۋىنا ماس بولعاندار ارادا از كۇن وتكەندە «بوتەننىڭ قوراسىندا» قامالىپ قالاتىنىن سەزبەي قالادى. جاسىراتىنى جوق, بۇگىندە جاس بۋىن وكىلدەرى ءدىني ءتالىمدى ۇستازداردان نەمەسە يمامنان ۇيرەنبەي, عالامتوردى جەڭىل كورەدى. ال ءدىني اعىمداردىڭ سايتتارىندا ميدى ۋلايتىن ءمالىمەتتەر مولىنان جەتىپ-ارتىلادى. تىرشىلىك كۇيبەڭىمەن ءجۇرىپ, اتا-انالاردىڭ بالا تاربيەسىنە الاڭداماۋى دا تالاي شاڭىراقتى شايقالتىپ كەتكەنىن كوزىمىزبەن كورىپ ءجۇرمىز.
ال تەرىس ءدىننىڭ جەتەگىندە جۇرگەندەردىڭ باسىم كوپشىلىگى ءوزىمىزدىڭ قانداستارىمىز بەن قاراكوز باۋىرلارىمىز! ايتپاسقا بولمايتىن ءبىر جايت, اناۋ جەر بەتىن جاڭا جاراتقانداي ءىلىم تاراتاتىن «جاڭا ءومىر» ءشىركەۋى, قازاقتار قاۋىمىن قۇرىپ, قازاقتى قازاققا ايداپ سالاتىن «يەھوۆا كۋاگەرلەرى» ۇيىمى, تالاي تاعدىردى تالكەككە ۇشىراتقان «ساەنتولوگيا» نەمەسە «ديانەتيكا» ورتالىعى, ايتا بەرسەڭ شەتىنە جەتپەيتىن كوزبوياۋشىلىق قازاقتى ءوز ىشىنەن ءىرىتىپ, ءشىرىتىپ جاتقانداي اسەر قالدىرادى. ءتىپتى, قيتۇرقىلىعى تالاي اشكەرە بولعان «بلاگودات» ۇيىمىنىڭ دا زاڭسىز ءىس-ارەكەتتەرىنە ءالى كۇنگە دەيىن تولىق تىيىم سالىنباي وتىر. ويتكەنى, بۇل جەرلەردەن ءوز دىنىنەن باس تارتىپ, اللاسى تۇگىلى, اتا-باباسىن ۇمىتقان قازاعىمنىڭ جاسى تۇرماق, ەڭكەيگەن كارىسىنە دەيىن تاباسىز. دانالىق جاسىنا جەتكەن اقساقالدارىمىز بەن اقجاۋلىقتىلارىمىزدىڭ اللانى ەمەس, يسا ءماسىحتى ءدارىپتەپ, بۇلاي اداسقانىن نەمەن جۋىپ-شايامىز؟ كەشەگى شام ەلىنە «جيھاد جاساۋعا» اتتانعان قازاقتاردىڭ كوزدەگەنى نە؟ قازاقتىڭ ەلىندە تۇرىپ, مۇسىلمانشىلىعىمىزدى مويىنداماي, سالت-داستۇرلەرىمىزدى تارك ەتىپ, رۋحاني قۇندىلىعىمىزدى جوققا شىعارعاندىعىنان بولەك, ءوزى ءومىر ءسۇرىپ وتىرعان قوعامنان اشىقتان-اشىق بەزىنۋى اقىلعا سىيىمسىز.
وسىدان 2-3 جىل بۇرىنعى مىنا وقيعانى كەيىپكەردىڭ ءوز اۋزىنان ەستىگەن ەدىك. «جايىق» ورتالىعىنىڭ كومەگىنە جۇگىنۋشى ر. ەسىمدى ازامات ءبىر كەزدەرى قالامىزداعى اقشالى كومپانيادا لاۋازىمدى قىزمەت اتقارعان. جاسى وتىزدار شاماسىنداعى ورىس ۇلتىنىڭ وكىلى ءوز الدىنا وتباسىلى, تىرنەكتەپ قول جەتكىزگەن باسپاناسىندا تىنىش ءومىر ءسۇرىپ جاتتى. بىردە ەرتەڭگىلىك جۇمىسقا اسىعىپ, ەسىكتەن شىعا بەرگەندە پاتەردىڭ الدىندا جۇرگەن بەلگىسىز ەكى سۇلۋ بويجەتكەن ونىمەن ك ۇلىپ امانداسادى. ۋاقىتى تىعىز بولسا دا, سۇلۋلىققا كوزى اربالعان جىگىت ءسال بوگەلىپ, ەكەۋدەن نە ماقساتپەن جۇرگەنىن سۇرايدى. ولار ءۇي-ءۇيدى ارالاپ, «قۇداي اكە مەن قاسيەتتى رۋحتى» ناسيحاتتاپ جۇرگەنىن ايتىپ, «كيەلى جازبالار» دەگەن شاعىن كىتاپشانى قولىنا ۇستاتىپ جىبەرەدى...
الگى جىگىت اعاسى ولاردى تاعى ءبىر كورۋدى ارمان ەتەدى. بىردە كىتاپتى اقتارىپ وتىرىپ, ونىڭ مازمۇنى تەرىس پيعىلدا ەكەنىن سەزە قويادى دا, كوڭىلىنە كۇدىك كىرەدى. ويتكەنى, ءوزى ءدىن جولىندا بولماسا دا, اتا-باباسىنىڭ ءداستۇرلى دىنىنە سەنەتىن ەدى. ارادا از ۋاقىت وتكەندە الگى ەكەۋ تاعى كەزىگەدى. وسى جولى ارۋلاردىڭ اڭگىمەسى وعان شىنايى اسەر قالدىرىپ, العاشقىداعى كۇدىگىن سەيىلتەدى. سودان سوڭ الداعى ۋاقىتتا كەزدەسىپ تۇرۋعا ءسوز بايلاسادى. وسى تانىستىق جىگىتتى باسىبايلى شىرماۋعا ءتۇسىرىپ, 3 ايدىڭ ىشىندە ناعىز «ءماسىحشى» بولىپ شىعا كەلەدى. ءبىزدىڭ تىلمەن ايتقاندا, قىپ-قىزىل «سەكتانت». بۇل ءجۇرىسىنىڭ دۇرىس ەمەستىگىن ايتىپ جىلاعان ايەلىنە دە, اتا-اناسىنا قايىرىلمايتىن بولدى. اقىرى, جىلعا جۋىق ۋاقىتتا ءدىني ۇيىمنىڭ تالابىنا ساي وتباسىنان اجىراسۋعا بەل بايلاپ, باسپاناسىن قۇداي جولىنا دەپ «سىيعا» تارتادى. ونىڭ بۇل «ءمارتتىگى» قىزمەت ورنىنا جەتىپ, سوڭى جۇمىستان قۋىلادى. ال بارىنان ايىرىلىپ, ەسىن جيعاندا ءبارى دە كەش ەدى.
ا. ەسىمدى قىزدى دا بۇرىننان سىرتتاي تانۋشى ەدىك. تىلگە شەشەن, پىسىق, ازىلقوي, وزىنە وتە سەنىمدى قىز. ازداپ اقىندىعى دا بار. ەرەكشەلەنىپ جۇرەتىن جاندار وزگەلەردىڭ نازارىنا بىردەن تۇسەتىنى بەلگىلى, ءوزى وقيتىن وقۋ ورنىندا بەلسەندىلەردىڭ قاتارىندا بولدى. ستۋدەنتتەر اراسىنداعى وبلىستىق, رەسپۋبليكالىق ءتۇرلى شارالاردىڭ بەل ورتاسىندا ءجۇرىپ, «جۇلدىز» اتاندى. الايدا, جارقىراعان ءومىردىڭ ساۋلەسى كوپ ۇزاماي تامۇققا اينالدى. جات پيعىلدى ءدىني اعىمدار ءدال وسىنداي قوعامدا بەلسەندى, ومىرگە قۇشتار «قىمبات» جانداردى تورعا تۇسىرۋگە قۇمار كەلەتىنىنە ءسىز سەنبەيتىن شىعارسىز, بالكىم؟
وقۋ ءبىتىپ, جازعى دەمالىسقا شىققان ۋاقىتتا ونىڭ وتباسىندا كەزەكتى ۇرىس-كەرىس ا.-نىڭ اتا-اناسىنان بولەك كەتۋىمەن اياقتالدى. بويىن ىزا مەن كەك كەرنەپ, مۇڭىن شاعار ادام تاپپاي جۇرگەن ساتىندە قالامىزداعى پروتەستانتتىق ۇيىمداعى ايەلمەن تانىسادى. كوپ ۋاقىت وتپەي, قازاق قىزى موينىنا كرەستەن القا تاعىپ, يساعا تابىنىپ, شوقىنۋعا شەشىم قابىلدايدى. دوستارىمەن دە ارالاسۋدان باس تارتادى. ونىڭ شوقىنعانىن ەستىگەن قۇربىلارى مەن باۋىرلارى كومەككە قول سوزسا دا, قايران بولمادى. ساناسىن باتىستىڭ «ءىنجىلى» ۋلاعان ارۋ وقۋدان شىعىپ, ءوزى بارىپ جۇرگەن ۇيىمعا ءدىني قىزمەتكە قابىلدانادى. اقىندىعىن انشىلىككە ايىرباستاپ, سول جەردە ءار جەكسەنبى سايىن ءدىني اۋەندەر ايتۋدى ۇيرەنەدى. ونىڭ ويىنشا, ەڭ دۇرىس, ەڭ تۋرا جول وسى. بولماشى ۇرىستىڭ كەسىرىنەن اتا-اناسىنان تۇبەگەيلى قول ۇزگەن قىزدىڭ بۇگىنگى تاعدىرى ءبىزگە جۇمباق. وتباسىنا ورالعىسى جوق.
بۇل مىڭداعان تاعدىردىڭ ءىشىندەگى بىرەۋى عانا. ءبىر وتباسىنداعى تاربيەنىڭ وسالدىعى بالانىڭ جۇرەگىنە جىلدار بويى داق سالىپ, ەسەيگەن شاعىندا قايعىعا ۇشىراتتى. سوندىقتان, ءار اتا-انا «بالام ەرجەتتى, قىزىم بويجەتتى, قالعان ۋاقىتتا وزدەرى شەشەدى» دەگەن اسىعىس ويدان ادا بولعانى جاقسى. «ايداۋعا كونبەيتىن» ىنجىقتاردان ەمەس, تالانتى مەن تالابى تاۋداي ۇرپاعىمىزدان وسىلايشا ايىرىلا بەرسەك, ءبىزدىڭ كىم بولعانىمىز؟
قاراپايىم كوپشىلىك ءدىننىڭ جەتەگىندە كەتەتىندەر ساناسىن تۇرمىس بيلەگەن جاستار مەن ستۋدەنتتەر, تۇرمىسى تومەندەر, ومىردەن تەپەرىش كورىپ باقىتسىزدىققا ۇشىراعاندار دەپ ويلاپ كەلدى. بۇگىندە باتىستان كەلگەن ءتۇرلى ءدىني ۇيىمداردىڭ ماقساتى مۇلدە باسقا ەكەندىگىنە كوزىمىز جەتتى. ولارعا جۇمىسسىز جاستار ەمەس, بىلىممەن قارۋلانعان, ءوز ويىن وزگەگە اشىق جەتكىزە الاتىن, وزىندىك «مەنى» قالىپتاسقان جاستار قاجەت. جوعارىدا ايتقانداي, وڭاي ولجاعا كەنەلۋ ءۇشىن بيزنەس وكىلدەرىن, اۋقاتتى وتباسىلاردى نەمەسە قالتالى ازاماتتاردى تارتقان ىڭعايلى. ەڭ قيتۇرقىسى, اتا-اناسى مەملەكەتتىك مەكەمەدە جۇمىس جاسايتىن وتباسىلاردىڭ بالالارىن قاقپانعا ءتۇسىرۋ ارقىلى, مەملەكەتتىڭ قۇپيا ىستەرىن قاداعالاۋعا ۇمتىلۋى. بۇل قانشا جەردەن جاسىرسا دا, ايتىلۋى كەرەك اقيقات.
ءيا, ادامزات دىننەن, يماندىلىقتان الشاقتاسا, رۋحاني از-عىندىق باستالادى. رۋحاني ازعىنداۋ – قوعامنىڭ, ۇلتتىڭ ىشتەي ىدىراۋىنا, ءتىپتى, جويىلۋىنا اكەلەتىن نەگىزگى فاكتوردىڭ ءبىرى. ءبىزدىڭ ايتپاعىمىز, جوعارىدا اتالعان مىسالداردان بۇگىنگى وسكەلەڭ ۇرپاق ساباق الۋى ءتيىس. ەڭ باستىسى – دۇرىس ءدىننىڭ ۇلتتى ۇيىتىپ, بىرلىككە ۇندەيتىنىن ەستەن شىعارماسا بولعانى. قازاق ەلى بارشامىزعا ورتاق قاسيەتتى مەكەن بولعاندىقتان, ءدىني اعىمدارعا قارسى كۇرەس – تەك ءبىر عانا مەشىت يمامىنىڭ عانا ەمەس, بارشامىزدىڭ ابىرويلى مىندەتىمىز. التىنداي ساف, گاۋھارداي تازا اسىل ءدىنىمىز ارقىلى ەرتەڭگى كۇنگە الاڭسىز, ۇلتتىق بىرلىگىمىزدى نىعايتىپ جەتكىزۋگە اللا ءناسىپ ەتسىن!
ءلاززات شاعاتاي,
جۋرناليست,
تەمىر قۇسايىن,
«ەگەمەن قازاقستان».
باتىس قازاقستان وبلىسى.
