جاستاردىڭ زامان تالابىنا ساي ءبىلىم الۋى قازىر ۋنيۆەرسيتەتتەگى وقۋمەن شەكتەلمەيدى. قازىر كاسىبي بىلىممەن قاتار ءوزىن-ءوزى دامىتۋ باعىتىنداعى اقپارات قۇندى بولىپ تۇر. كىم نە دەسە دە, جالعىز سالاداعى بىلىمىڭمەن باسەكەگە قابىلەتتى بولا المايسىڭ. بارلىق جۇمىس بەرۋشى جان-جاقتى بىلىكتى, بەساسپاپ مامان ىزدەيتىن بولعان. وسى رەتتە جاستار قوسىمشا كۋرستاردا جاڭا داعدىلار ۇيرەنىپ, وزدەرىن جەتىلدىرۋگە تىرىسادى. وتاندىق جاستار ۇيىمدارىنىڭ دا بۇل باعىتتا جاڭا جوبالار باستاپ, اۋمالى-توكپەلى كەزەڭدە جاس ازاماتتاردىڭ ۋاقىتتى ءتيىمدى وتكىزۋىنە سەپ بولىپ جاتقاندىعى قۋانتادى.
وسىنداي باستامالاردىڭ ءبىرىن وتكەن ايدا Jas Otan جاستار قاناتى باستاپ كەتىپتى. «سانا» دەگەن اتپەن باستاۋ العان تۇلعالىق دامۋ مەكتەبىنىڭ ۆيرتۋالدى ەسىگى بارلىق جاستاعى ازاماتتارعا اشىق ەكەن. ءۇش ايعا جوسپارلانعان ونلاين وقىتۋ 3 باعىت بويىنشا جۇزەگە اسادى: شەشەندىك ونەر, كوشباسشىلىق پەن ەموتسيونالدى ينتەللەكت جانە ينتەرنەت ماركەتينگ. بۇل تىڭ تاقىرىپتاردىڭ بۇگىنگى زامانعا ساي ماماندارعا كەرەك ەكەنى ايتپاسا دا تۇسىنىكتى. سەبەبى ءبىز جاڭا كوشباسشىلاردىڭ تەحنولوگيانى جەتىك مەڭگەرگەنىن, الەمدەگى سوڭعى جاڭالىقتاردان حاباردار بولعانىن جانە زامان كوشىمەن قاتار جىلجىعانىن قالايمىز. تەحنولوگيا داۋىرىندە الەم ادام ايتقىسىز جىلدامدىقپەن وزگەرىپ كەلەدى. ال سول وزگەرىستەرگە ىلەسە بىلگەندەر عانا باسەكەگە قابىلەتتى بولماق.
Jas Otan-نىڭ بولاشاق ساياسي كوشباسشىلار مەن مەملەكەتتىك قىزمەتكەرلەر باۋلۋداعى تاجىريبەسىن ەسكەرسەك, بۇل قادام سول جاستاردىڭ جان-جاقتى بولۋىنا اسەر ەتەر ەدى. جالپى, جوباعا قاتىسۋعا 2700-دەن استام ادام نيەت بىلدىرگەن ەكەن. سونىڭ ىشىندە 1700-دەن استام قاتىسۋشى قازاق تىلىندەگى كۋرستارعا جازىلسا, 970-كە جۋىعى ورىس تىلىندە ءبىلىم الادى. جاستار قاناتىنىڭ جەتەكشىسى ەلنۇر بەيسەنباەۆ وقۋ باعدارلاماسىنا ەنگەن باعىتتار جاستاردىڭ سۇرانىسىنا ساي ەكەنىن ايتادى.
«نەگىزگى ماقساتىمىز – جاستاردى قازىرگى قوعامعا, ءومىر سالتىنا كەرەكتى مەنتالدىق داعدىلارعا ۇيرەتۋ, ويىن اشىق, تياناقتى جەتكىزىپ, بويىندا بار كوشباسشىلىق قابىلەتىن اشۋعا كومەكتەسۋ. قازىرگى جاستاردىڭ سۇرانىسىنا تولىعىمەن جاۋاپ بەرەتىن باعىتتاردى قامتۋعا تىرىستىق. سونىمەن قاتار ءار مودۋل بويىنشا ەلگە تانىمال تۇلعالار قوناققا كەلىپ, تاجىريبەسىن ورتاعا سالادى. ساباق ونلاين وقىتىلادى, سول سەبەپتى قاتىسام دەۋشىلەردىڭ جاسىنا, تۇرىپ جاتقان جەرىنە بايلانىستى ەشقانداي شەكتەۋ جوق», دەدى ە.بەيسەنباەۆ.
ءار مودۋل سوڭىندا ءۇي جۇمىسىن ۇزبەي ورىنداپ, ساباققا ۇزدىكسىز قاتىسقان جاستارعا مەكتەپ اتىنان سەرتيفيكات تابىستالادى ەكەن.
ونلاين نەمەسە قاشىقتان وقىتۋ ءبىلىم بەرۋ سالاسىنىڭ بولاشاعى ەكەنىن ساراپشىلار بۇرىننان ايتىپ كەلەدى. اعىلشىنشا EdTech نەمەسە ءبىلىم بەرۋ سالاسىنداعى تەحنولوگيا بۇل ماسەلەنىڭ قانشالىقتى وزەكتى ەكەنىن كورسەتكەندەي. پاندەميا سالدارىنان دۇنيە جۇزىندە ءداستۇرلى ءبىلىم بەرۋ مۇمكىن بولماعان تۇستا ونلاين وقىتۋ كومەككە كەلدى. وسىعان دەيىن تەحنولوگيانىڭ بۇل مۇمكىندىگىنە نەمقۇرايدى قاراپ كەلگەن ءبىلىم وردالارى ۇلكەن قيىندىقتارعا تاپ بولعانى جاسىرىن ەمەس. قازىر ماماندار ونلاين وقىتۋ سالاسىنىڭ قارقىنىن 165 ملرد دوللارعا باعالاپ وتىر, ال بەس جىلدان كەيىن بۇل كورسەتكىش ەكى ەسە وسەتىنىن العا تارتادى. جالپى, ونلاين كۋرستار نارىعى كوپتەگەن ەلدە قاتار دامي باستادى. ماسەلەن, 2012 جىلى اقش-تا Coursera پلاتفورماسى پايدا بولدى. سول جىلدارى كورشىلەس رەسەيدە دە قازىر حالىقارالىق دارەجەدە مويىندالعان جوبالار ىسكە قوسىلدى. ازىرگە سالادا امەريكالىق وقىتۋ الاڭدارىنىڭ تانىمالدىلىعى جوعارى بولىپ تۇر. دەگەنمەن ماماندار وڭتۇستىك-شىعىس ازيا ەلدەرىنىڭ پوتەنتسيالىن جوعارى باعالايدى. ونىڭ ىشىندە قىتاي مەن ءۇندىستاننىڭ تەحنولوگيالىق جەتىستىكتەرىنە الەم تاڭعالۋدا. ايماق 2016 جىلى باتىس ەۋروپادان وزىپ كەتكەن. ال 2018 جىلى قىتاي جوبالارىنا قۇيىلعان ينۆەستيتسيا كولەمى اقش-تان دا ارتىق بولعان. ەلەكتروندى وقىتۋعا افريكا ەلدەرى دە بەت بۇرا باستاعان. بۇل الەمدىك ءۇردىس ءبىزدىڭ ەلىمىزدى دە اينالىپ وتپەدى. بيىلعى وقيعالار ەلدەگى ونلاين وقىتۋ سالاسىنىڭ تومەن دەڭگەيىن اشىق كورسەتتى. جوعارى وقۋ ورىندارىنان بولەك, قازاقستان جاستارىنا قىسقا كۋرستاردى قازاق تىلىندە ۇيرەتەتىن ونلاين وقىتۋ پلاتفورمالارى قاجەت-اق.
قازىر باستىسى سالادا باسەكە قالىپتاستىرۋ ءۇشىن وسىنداي باستامالارعا قولداۋ ءبىلدىرۋ ماڭىزدى. ال جاستاردى جاڭا فورماتقا بەيىمدەۋ وزەكتى بولىپ تۇر. جوبا اۆتورى ايگەرىم سەرىكجانوۆا نەگە ءدال وسى باعىتتاردىڭ تاڭدالعانىن ايتىپ بەردى.
«قازىر كوبى ينتەرنەتتە ۇزاق ۋاقىت وتكىزگەندىكتەن, كوپشىلىك الدىندا سويلەۋ داعدىلارىن ۇمىتىپ بارادى, كوبى قىسىلادى. ال جاستار ءۇشىن الەۋمەتتىك قارىم-قاتىناس ورناتا ءبىلۋ وتە ماڭىزدى. سول سەبەپتى شەشەندىك ونەر كۋرستارىن قوسۋدى ۇيعاردىق. سوڭعى جىلدارى ەموتسيونالدى ينتەللەكت ۇعىمى كوبىرەك ايتىلىپ ءجۇر. بۇرىنىراقتا IQ-عا كوپ ءمان بەرەتىن ەدىك, ال قازىر ەموتسيا ماڭىزدى بولىپ تۇر. مىقتى كوشباسشى – ءوز ەموتسياسىن باسقارا الاتىن جانە وزگەلەردىڭ سەزىمىن تۇسىنە بىلەتىن ادام», دەيدى ا.سەرىكجانوۆا.
ال ينتەرنەت ماركەتينگ كۋرستارى تەحنولوگيا عاسىرىندا ءومىر سۇرەتىن ءاربىر جاس يگەرۋگە ءتيىس سالا بولىپ قالدى. قازىر قانداي تىرلىك جاساساڭ دا, ينتەرنەت نە الەۋمەتتىك جەلىدە ايتىپ وتىرۋىڭ مىندەتتى بولىپ قالدى. بىلايشا ايتساق, تسيفرلىق ءىزىڭدى قالدىرىپ كەتۋ كەرەك. جاستارمەن جۇمىستا سوڭعى تەحنولوگيالاردى قولدانا ءبىلۋ – كەز كەلگەن باستامانىڭ تابىستى بولۋىنىڭ كەپىلى. ءبىلىم مەن تەحنولوگيا جايلاپ ەگىز ۇعىمعا اينالىپ بارا جاتقاندا, مۇمكىندىكتەردى جىبەرىپ الماۋ ماڭىزدى.
