ايماقتار • 29 قىركۇيەك، 2020

ارقالىق قۇس فابريكاسى كارانتينگە جابىلدى

36 رەت كورسەتىلدى

ارقالىق قۇس فابريكاسى قوستاناي وبلىسى اكىمىنىڭ قاۋلىسىمەن كارانتينگە جابىلىپ، ۋاقىتشا جۇمىسىن توقتاتتى، دەپ حابارلايدى Egemen.kz

ءبىر جەتىنىڭ ىشىندە مۇندا 296 مىڭ 446 قۇس قىرىلىپ قالعان. فابريكا ورنالاسقان ارقالىققا قاراستى رودينا اۋىلىندا دا كارانتين جاريالاندى. قازىر قۇس فابريكاسىنداعى ولگەن قۇستار ورتەلىپ، دەزينفەكتسيالاۋ جۇمىستارى ءجۇرىپ جاتىر. رودينا اۋىلىنىڭ شەكاراسىنا توسقاۋىل بەكەتتەرى قويىلدى. كىرگەن-شىققان تۇرعىندار قاداعالاۋعا الىنىپ،  جەرگىلىكتى تۇرعىندارعا ءتۇسىندىرۋ جۇمىستارى ءجۇرىپ جاتىر. كارانتين ايماعىنان قۇس ەتى مەن جۇمىرتقا الىپ شىعۋعا تىيىم سالىندى.

"بۇگىنگى تاڭدا وبلىستاعى  جەكە سەكتورلاردا بارلىعى 3284 باس قۇس ءولدى. 4 اۋىلدىق ەلدى مەكەنگە وبلىس اكىمىنىڭ شەشىمىمەن كارانتين جاريالاندى. ءباسپاسوز بەتتەرىندە رەسپۋبليكا بويىنشا ەڭ كوپ قۇس قىرىلعان ايماق قوستاناي وبلىسى دەگەن اقپارات ءجۇر. بۇعان سەبەپ بولىپ وتىرعان ارقالىققا قاراستى رودينا اۋىلىندا ورنالاسقان "اگروينتەرقۇس" جاۋاپكەرشىلىگى شەكتەۋلى سەرىكتەستىككە تيەسىلى قۇستاردىڭ قىرىلۋى. نەگىزىندە جەكە سەكتوردى ءبولىپ الاتىن بولساق، بۇگىنگە دەيىن 3284 باس قۇستىڭ ءولىمى تىركەلىپ وتىر. ء بىزدىڭ كورسەتكىشىمىزدى كوتەرىپ جىبەرىپ وتىرعان سول جالعىز كاسىپورىن. سوڭعى مالىمەت بويىنشا، ارقالىق قۇس فابريكاسىندا ولگەن قۇستىڭ سانى 296 مىڭ 446 باس. وعان جەكە سەكتوردا ولگەن قۇستى قوساتىن بولساق، وبلىستا قىرىلعان قۇستىڭ سانى 299 730-عا بارىپ"، تىرەلەدى دەدى ۆەتەريناريا باسقارماسى باسشىسىنىڭ ورىنباسارى باۋىرجان بەكەت.

قۇس تۇماۋى دەرتىنىڭ قوزدىرعىشىن نەگىزىنەن سۋدا جۇزەتىن جابايى قۇستار تاسىمالدايدى ەكەن. بىراق  وزەن-كولدەردى تەكسەرىپ شىققان ماماندار جابايى قاناتتىلاردىڭ ولىگى كوزگە شالىنباعاندىعىن ايتادى. مۇنىڭ سىرتىندا، قۇس تۇماۋى بەلگىلەرىنىڭ تورعاي، كوگەرشىندەردەن تابىلعانى تۋرالى مالىمەت بار. ارقالىق قۇس زاۋىتىندا قۇس ازىعىن،  جەم قوسپالارىن دايىندايتىن تسەحتارعا اۋرۋ تورعاي نەمەسە كوگەرشىن كىرىپ كەتۋى مۇمكىن، قۇستاردىڭ قىناداي قىرىلۋى سودان بولۋى  مۇمكىن دەگەن بولجام بار.

ايماقتاعى 4 ءىرى قۇس فابريكاسىن قوسقاندا قوستاناي وبلىسىندا جالپى سانى 5 ملن 52 مىڭ قۇس بار. اۋىلشارۋاشىلىق كاسىپورىندارى 2 ميلليوننىڭ ۇستىندە قۇس باعىپ وتىر. جەكە  شارۋا قوجالىقتارىندا 32 مىڭ، ال جەكە سەكتوردا 2 ملن 900 مىڭنىڭ ۇستىندە قۇس بار.

قازىر وبلىس اۋماعىندا بەكىتىلگەن ەرەجەگە سايكەس، ىندەتتىڭ تارالۋ قاۋپى بار بۋفەرلىك زونا انىقتالىپ، ىندەت وشاعىنىڭ اينالاسىندا 20-25 شاقىرىم قاشىقتىقتا ورنالاسقان ەلدى مەكەندەردىڭ قۇستارىنا مىندەتتى تۇردە ۆاكتسينا ەگۋ جۇمىستارى باستالدى.

"بۇگىنگى تاڭدا ءبىز قۇس تۇماۋىنا قارسى 366 مىڭ 218 دوزا ۆاكتسينا الدىق.  بۇل وتار قالاسىنداعى وباعا قارسى ستانتسيادا جاسالعان ءوزىمىزدىڭ وتاندىق ۆاكتسينا. وتە ءتيىمدى ۆاكتسينا ەكەنىن كورسەتىپ وتىر. جەكە سەكتورلاردا 138 مىڭ 393 باس قۇسقا ۆاكتسينا ەگىلدى وتىر. قۇس فابريكالارىنداعى 196 مىڭ 286 باس قۇستى قوسقاندا، بارلىعى 334 679 قۇسقا ۆاكتسينا ەگىلدى. "ساقتانساڭ، ساقتايدى" دەمەكشى، وبلىستاعى "جاس قانات"، "سەۆەر پتيتسا" سياقتى ءىرى قۇس فابريكالارى قاۋىپتى ايماققا ەنبەسە دە ىندەتتىڭ الدىن الۋ ماقساتىندا ءوز قارجىلارىنا ۆاكتسينا ساتىپ الىپ، ەگۋ جۇمىستارىن جۇرگىزىپ جاتىر"، دەدى ۆەتەريناريا باسقارماسى باسشىسىنىڭ ورىنباسارى.

ال ارقالىقتاعى  "اگروينتەرقۇس"  بارلىعى 500 مىڭنىڭ ۇستىندە قۇس بار. مۇنداعى قىرىلعان قۇستاردى ورتەۋ، دەزينفەكتسيالاۋ بارىسى اۋىل شارۋاشىلىعى مينيسترلىگىنە قاراستى اۋماقتىق ينسپەكتسيانىڭ باقىلاۋىمەن جۇرگىزىلىپ جاتىر. بۇل جۇمىستاردى قوستاناي وبلىسىندا ورنالاسقان رەسپۋبليكالىق ەپيزوتيالىق وتريادتىڭ فيليالى اتقارىپ جاتىر.    

"ىندەت وشاعىنا اينالعان قۇس فابريكاسىنداعى قۇستار تەگىس جويىلا ما، الدە ساۋ قالعان قۇستار قالا ما؟" دەگەن ماسەلەنى ۆەتەريناريالىق كوميتەت شەشەدى.

29-قىركۇيەكتە وڭىرلىك كوممۋنيكاتسيا قىزمەتىندە ءباسپاسوز جيىنىن وتكىزگەن ارقالىق قالاسىنىڭ اكىمى قايرات ابىشەۆ "اگروينتەرقۇس" سەرىكتەستىگىندەگى قۇس قىرعىنىنا قاتىستى ساۋالعا جاۋاپ بەردى.  

"بۇگىنگە دەيىن 360 مىڭنان استام قۇس قىرىلىپ قالدى. ولگەن قۇس تۇگەل جويىلىپ، اكت قۇجاتتارى تولتىرىلدى. ارقالىق قۇس زاۋىتىنا رەسپۋبليكالىق بيۋدجەتتەن وتەماقى تولەنەدى. قۇس قىرىلىپ قالدى ەكەن دەپ، كاسىپورىن جۇمىسىن توقتاتپايدى. بۇل فابريكانىڭ ارقالىق تۇرعىندارى ءۇشىن ماڭىزى زور. ويتكەنى 250 ادامدى جۇمىسپەن قامتىپ وتىر. تاياۋ كۇندەرى تازالاۋ، دەزينفەكتسيا جۇمىستارى جۇرگىزىلەدى. ال قازان ايىنىڭ سوڭىنا تامان جاڭادان قۇس اكەلەمىز. كاسىپورىنمەن بىرلەسە وتىرىپ، 3-4 ايدىڭ ىشىندە قۇس سانىن قايتا قالپىنا كەلتىرەمىز. جۇمىسشىلار قىسقارمايدى"، دەدى قايرات ابىشەۆ.

ۆەتەرينار ماماندار قۇس تۇماۋى ىندەتىنىڭ قوستاناي وبلىسىندا بۇرىن-سوڭدى بولماعانىن ايتادى. بۇگىندە وبلىستىڭ 8 اۋدانىنا قاراستى 59 ەلدى مەكەندە 129 ۆەتەرينار مامان ۆاكتسينا ەگۋ جۇمىستارىمەن اينالىسىپ جاتىر.  

سونىمەن قاتار رەسپۋبليكالىق ەپيزوتيالىق جاساق ىندەت وشاقتارىنا اينالعان مەكەندەردى دەزينفەكتسيالاپ، قۇس ولىكتەرىن ورتەپ، قۇسىنان ايىرىلعان وتباسىلاردىڭ ءتىزىمىن جاساۋدا. بۇل ءتىزىمدى كەيىن وبلىستا قۇرىلعان ارنايى كوميسسيا قاراپ، تاۋىعىنان ايىرىلعان 2384 ۇيگە  رەسپۋبليكالىق بيۋدجەتتەن وتەماقى تولەنەتىن بولادى.

الايدا ارقالىق قۇس فابريكاسىنداعى قىرىلعان قۇستاردى ناقتى سانى تۋرالى مالىمەتتەردە بىرىزدىلىك جوق. "اگروينتەرقۇس" سەرىكتەستىگى وكىلدەرىنىڭ  ايتۋىنشا، بۇگىنگە دەيىن 414 مىڭ قۇس قىرىلىپ قالعان. 

سوڭعى جاڭالىقتار

قوستانايعا العاشقى قار ءتۇستى

ايماقتار • بۇگىن، 10:02

ۇقساس جاڭالىقتار