قاراقشىلاردىڭ ارەكەتى ىسكە اسپادى

الماتى قالالىق  ءىىد ۇيىمداس­قان قىلمىسپەن كۇرەس باسقارماسى مەن “ارلان” ارناۋلى بولىمشەسىنىڭ قىزمەتكەرلەرى ءۇشىن ناۋرىز ايى­نىڭ سوڭعى كۇنىنىڭ قيىندىعىمەن قوسا, جەتىستىگى مەن قۋانىشى دا مول بولدى. “قازكوممەرتسبانكتىڭ” قاۋىپ­­­سىزدىك قىزمەتى وكىلدەرىنىڭ حابارىن العان بويدا, شۇعىل تۇردە بانككە جەتكەن ولار جەكە كاسىپكەر مەن ونىڭ اپكەسىن بەس جاستاعى قىزى­مەن بىرگە قاراقشىلار قولى­نان قۇتقارىپ الدى. بۇل وقيعادان بۇرىن دا اۋىر قىلمىستارعا بارىپ, جاۋاپقا تارتىلعان قاراقشىلاردى قۇرىقتاۋ, ايتۋعا وڭاي بولعانىمەن, ءىس جۇزىندە, ارينە, وڭاي سوقپاعانى ءسوزسىز. “قىل­مىسكەرلەر قايتكەندە دە ءوز­­دەرى كوزدەگەن ارام ويلى ماقساتىنا جەتپەك بولىپ, بارىنشا قارسىلىق كورسەتتى”, دەيدى ۇيىمداسقان قىل­مىس­پەن كۇرەس باسقارماسىنىڭ باس­تىعى, پولكوۆنيك كوزلوۆ. وقي­عانىڭ قاۋىپتى جاعدايعا ۇلاسۋىنا تاعى دا اڭعالدىق سەبەپ بولعان ءتارىزدى. ەلەكتر قۇرىلعىلارىن ءجون­دەۋمەن اينالىساتىن جەكە كاسىپكەر مەن ونىڭ جيىرما بەس جاستاعى اپكەسى قاراقشىلار قولىنا باي­قاۋسىزدا تۇسكەن. وزدەرىن “كليەنت­پىز” دەپ تانىستىرعان قاراقشىلار مامانداردى الدىن-الا جالعا العان ۇيگە الداپ شاقىرعان. پاتەرگە العاش كىرگەن روماندى ولار بىردەن سوققىعا جىعىپ, سىرتتا جەڭىل ماشينەدە ونى كۇتىپ وتىرعان اپاسى مەن ونىڭ بەس جاستاعى قىزىن ۇيگە شاقىرۋعا بۇيىرادى. جاس ايەل مەن ونىڭ قىزىن قوزعالمايتىنداي ەتىپ بايلاپ تاستاعان بۇزاقىلار, كاسىپ­كەر جىگىتكە وزدەرىمەن بىرگە بانككە بارىپ, ونىڭ ءوز ەسەپ-شوتىنان 17 ميلليون تەڭگە الۋىن بۇيىرادى. ءبىرشاما ۋاقىتتان بەرى ولاردى سىرتتاي باقىلاپ جۇرگەن قاراق­شى­لار, ولاردىڭ اكەلەرىنىڭ ءۇيىن ساتىپ, اۋقىمدى قاراجاتتى يەلەن­گەن­دىگىنەن حاباردار بولاتىن. سۋىق قارۋ مەن جانە الدەبىر سۇيىق تول­تىرىلعان شپريتستەرى بار قىلمىس­كەرلەر كاسىپكەر جىگىتتى “ەگەر ايتقانىمىزدى ورىنداماساڭ, وندا اپكەڭە جانە ونىڭ كىشكەنە قىزىنا ينەكتسيا ارقىلى سپيد-قاتەرلى دەرتىن جۇقتىرامىز” دەپ ۇرەيىن الىپ, قورقىتقان. باۋىرلارىنىڭ ءومىرى ءۇشىن قاتتى الاڭداعان جىگىتتىڭ ولاردىڭ بۇيرىعىنا كونبەسكە امالى دا قالماعاندىعى بەلگىلى. ءبىر قۇپتارلىعى, رومان بانككە كەلگەن­نەن كەيىن ءوزىن جانە باۋىرلارىن قىلمىسكەرلەر قولىنان قۇتقارۋ­دىڭ ەڭ ۇتىمدى امالىن تاپقانداي بولادى. ەسەپ-شوتتان اقشا الۋعا ارنال­عان قاعازدى تولتىرىپ تۇرىپ, ونىڭ استىنا قاراقشىلارعا بايقات­پاي “مەن قاراقشىلاردىڭ نىسانا­سىن­دا تۇرمىن, تۋىستارىما دا ۇلكەن قاتەر ءتونىپ تۇر” دەپ جازىپ بەرەدى. “بۇل ورايدا, ارينە “قاز­كوم­مەرتسبانك­تىڭ” وپەرا­تسيالىق ءبولىمى قىز­مەت­كەر­لەرىنىڭ جانە ءبولىم باستى­عىنىڭ, بانكتىڭ قاۋىپسىزدىك قىزمەتى وكىلدەرى­نىڭ كاسىبي شەبەر­لىگىن, ءوز ىستەرىنە دەگەن جوعارى جاۋاپ­كەرشى­لىگىن اتاپ ءوتۋ قاجەت” – دەيدى الماتى قالالىق ءىىد ءباسپاسوز قىزمەتىنىڭ جەتەكشىسى سالتانات ازىربەك. ءسويتىپ, ۇيىمداسقان قىلمىس­پەن كۇرەس باسقارماسى مەن “ارلان” ارناۋلى بولىمشەسى وكىلدەرىنىڭ شۇعىل دا باتىل قيمىلى ناتيجە­سىندە قىلمىسكەردىڭ ءبىرى پاتەردە, وزگەلەرى بانكتىڭ ىشىندە قولعا ءتۇستى. باقىت بالعارينا, الماتى.