ايماقتار • 29 قىركۇيەك، 2020

شۋ اۋدانىنداعى گاز ماسەلەسى ءبىر اپتادا شەشىلەدى

25 رەت كورسەتىلدى

شۋ اۋدانىنداعى گاز ماسەلەسى ءبىر اپتادا شەشىلەدى، دەپ حابارلايدى Egemen.kz

جامبىل وبلىسىنىڭ شۋ اۋدانى، تولە بي اۋىلىنا گاز تارتۋ تالاي جىلدان بەرى وزەكتى ماسەلە بولىپ كەلەدى. جەرگىلىكتى تۇرعىندار بۇل جۇمىسقا جاۋاپتى "پاريەۆ" جاۋاپكەرشىلىگى شەكتەۋلى سەرىكتەستىگىنىڭ باعانى شارىقتاتىپ وتىرعانىن ايتىپ، شاعىمدانعان بولاتىن. اتالعان ماسەلە جۋىردا جالپىۇلتتىق "Egemen Qazaqstan" گازەتىنىڭ بەتىندە دە كوتەرىلدى. تولە بي اۋىلىنا گاز تارتۋ ماسەلەسى بويىنشا جامبىل وبلىسىنىڭ اكىمى بەردىبەك ساپارباەۆ جيىن وتكىزدى. اۋىلعا گاز قۇبىرى وسىدان بىرنەشە جىل بۇرىن تارتىلعان. بىراق، كەيبىر ۇيلەر ءالى كۇنگە دەيىن كوگىلدىر وتىنسىز وتىر.

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى قۇدايبەرگەن قورعانباەۆتىڭ ايتۋىنشا، ۇيلەرگە گاز جەتكىزۋگە جاۋاپتى مەردىگەر "پاريەۆ" جشس. باستاپقىدا، ياعني 2016 جىلى اتالعان سەرىكتەستىكتىڭ باعاسى 420 مىڭ تەڭگە بولسا، كەيىننەن ول 570 مىڭ تەڭگەگە دەيىن وسكەن. مەردىگەر كومپانيا وكىلدەرى بۇل رەتتە قۇرىلىس ماتەريالدارىنىڭ قىمباتتاعانىن ايتقان. ەندى بۇل جاعداي تۇرعىنداردىڭ نارازىلىعىن تۋدىرىپ وتىر. قاراپايىم حالىق مۇنداي قاراجاتتى تاۋىپ بەرۋگە ءبارىنىڭ بىردەي شاماسى كەلمەيتىنىن ايتادى.

شۋ قالاسىنان اۋدان ورتالىعى تولە بي اۋىلىنا دەيىن ۇزىندىعى 8،7 شاقىرىم ماگيسترالدى قۇبىردى ساتىپ الۋعا جانە مەملەكەت بالانسىنا قويۋعا وبلىستىق بيۋدجەتتەن 251،1 ميلليون تەڭگە بولىنگەن. بۇل شەشىم "پاريەۆ" كومپانياسى قىزمەتىنىڭ باعاسىن 475 مىڭ تەڭگەگە دەيىن تومەندەتۋگە مۇمكىندىك بەرگەن. بۇل كۇندە تولە بي اۋىلىندا 4200 ءۇي بار بولسا، ولاردىڭ 35،2 پايىزى عانا گازبەن قامتىلعان. قالعان ۇيلەر باعانىڭ قىمباتتىعىنا بايلانىستى گازعا قوسىلا الماي وتىر. ماسەلەنى انىقتاۋ ءۇشىن وبلىستىق تابيعي مونوپوليالاردى رەتتەۋ جانە باسەكەلەستىكتى قورعاۋ جونىندەگى دەپارتامەنت "پاريەۆ" سەرىكتەستىگىنە قاتىستى تەرگەۋ جۇرگىزگەن. ءىس مەركى اۋداندىق سوتىنا جىبەرىلگەنىمەن، اكىمشىلىك-قۇقىقبۇزۋشىلىق قۇرامىنىڭ بولماۋىنا بايلانىستى توقتاتىلعان. دەگەنمەن، قۇدايبەرگەن قورعانباەۆ "پاريەۆ" ءوز مىندەتتەمەلەرىن تولىق ورىنداماعانىن مالىمدەدى. اتالعان كومپانيا تەحنيكالىق قىزمەت كورسەتۋدى جۇرگىزۋگە مۇمكىندىك بەرەتىن شارت جاساسپاعان. بۇل جاعدايدىڭ سالدارىنان اعىمداعى جىلعى قىركۇيەك ايىندا تولە بي اۋىلىندا گاز وشىرىلگەن.

"پاريەۆ" كومپانياسى قىزمەت كورسەتەتىن اۋماقتا تۇراتىن شۋ قالاسىنىڭ تۇرعىندارى دا وسىنداي ماسەلەنى باستان كەشىرگەن. وسى ورايدا، بەردىبەك ساپارباەۆ ماسەلە ءبىر اپتا ىشىندە شەشىمىن تابۋى كەرەكتىگىن جەتكىزدى.

"كومپانيانىڭ قىزمەتتەرى باسقا اۋداندارعا قاراعاندا نەگە قىمبات ەكەنىن سارالاڭىزدار. قورداي اۋدانىندا وسى سەكىلدى قىزمەت قۇنى 350 مىڭ، ال شۋ اۋدانىندا جارتى ميلليوننان اسادى. ولاردىڭ گازى التىن ەمەس شىعار؟ نەلىكتەن تۇرعىندار ەكى اپتا بويى گازسىز قالادى؟ تۇرعىندار قىزمەتتەرگە ۇزدىكسىز اقى تولەيدى، سوندىقتان گاز دا تۇراقتى بەرىلۋى ءتيىس. ولاردىڭ نارازىلىعى ورىندى. بارلىق كىنالىلەر ءادىل جازاعا تارتىلۋى كەرەك. ەشكىمگە حالىقتى الداۋعا جول بەرىلمەيدى"، دەدى ول.

سونداي-اق اكىم بۇل ماسەلە ءوزىنىڭ جەكە باقىلاۋىندا بولاتىنىن ايتتى.

سوڭعى جاڭالىقتار

تارازدان كەلگەن ۇرى ۇستالدى

ايماقتار • بۇگىن، 20:35

زاڭسىز اڭ اۋلاۋ تيىلماي تۇر

ايماقتار • بۇگىن، 17:22

باستاما باياندىلىعىمەن قۇندى

ايماقتار • بۇگىن، 13:56

ۇقساس جاڭالىقتار